1 "Chenjelani kuta mishingo yenu mbeli kwabanhu kuti mubonwe naibo, amutowana indipilo inova kuna Tate benu baiko kudenga.

2 "Nezwo, kana mupa zwipo kubasheti, musilije lukwembo, sezwinotiwa nabachengeji mumasinagogo nomumigwagwa, betila kuti bekujwe nabanhu. Chokomende, ndinoti kwamuli, indipilo yabo bakaitambula kale. 3 Asi iwi, paunopa chipo chokubhancha, luboko lulwo lwechesho lusizibe kuti luboko lulo lwolulyi lukumutani, 4 kutila kuti kubhancha kukwo kube musiswa, akale Tate babo banobona zwimomusiswa banookupa indipilo yiyo."

5 Akale pamunonamata, amutokwelela kuba sabachengeji, banoda kuma benamata mumasinagogo nopalujibo lwemigwagwa, kuti bebonwe nabanhu. Chokomende ndinoti kwamuli, batambula kale indipilo yabo. 6 Koga paunonamata, ngwina mungumba yiyo, uzwikonyele, unamate kuna Tate babo musiswa, akale Tate babo, banobona zwomusiswa, ndibo banokupa indipilo yiyo.

7 Akale mukunamata musilundike mawhi manji sezwinota bokuzhe, nokuti banoyeya kuti banowhikwa pezhulu pamawhi abo manji. 8 Musibe saibo, nokuti Tate benu banoziba zwamunoshaka musanu mwabakumbila. 9 Nokudalo namatani ali,

Tate bedu bokudenga,

izina lyenu ngalikujwe,

10 bushe bwenu ngabuswike,

chido chenu ngechitiwe penyika sokudenga.

11 Tipeni nasi chinkwa chedu chemisi nemisi,

12 akale tilekejeleni luchinyo lwedu,

sezwo tilekejela banotichinyila bo.

13 Musitilekelele tiwila mukukwejwa,

koga mutisungunule kububi.

14 Kana mulekejela banhu banomuchinyila, Tate benu bokudenga banomulekejela neebo. 15 Asi kana musinolekejela banhu banomuchinyila, naTate benu bokudenga, abatomulekejela luchinyo lwenu.

16 "Akale pamunozwiminya kulya, musishetuluke sabachengeji, nokuti banonyangabala kumesho kwabo betila kubonwa nabanhu kuti bakumuzwiminya kulya. Chokomende ndinoti kwamuli, batambula indipilo yabo kale. 17 Asi kana uzwiminya kulya, shamba kumesho ugube mafuta munsholo, 18 kuti kuzwiminya kuko kulya kusibonwe nabanhu, koga naTate babo bomusiswa, akale Tate babo banobona musiswa, ndibo bachakupa indipo yiyo."

19 "Musizwibunganisile bufumi penyika, pana makube nengula zwinolya akale nembava jinobulaya ingumba jikwiba. 20 Asi zwibunganisileni chuma kudenga, kusina makube nengula zwinolya, akale kusina imbava jinobulaya jingumba nokukwiba. 21 Nokuti yopo pana ifuma yiyo, ndipo pachabelina moyo uwo."

22 "Izhisho chimuniko chombili. Kana izhisho lilyo lilibhenyu, umbili uwo wose unomunikilwa. 23 Asi kana izhisho lilyo lililibi, umbili uwo wose unoba munhilima. Kana mwenje umomwauli uli nhilima, biya inhilima yeyo inobeli ihulwana zwilichini!"

24 "Akuna unhu angashingila matezi mabili, nokuti angabenga umwe akale akada umwe, kana kuti angazwipila kunaumwe eshunda umwe. Amungashingile Mwali nemali."

25 Nokudalo ndomubuja kuti, lekani kuzwinyaja nezwobupenyu bwenu, zwokuti molyani, kana kuti monwani, kana nezwombili wenu zwokuti mombalani. Bupenyu abutobabukulwana kupinda zwokulya kana umbili kupinda zwokumbala na? 26 Lingani inyuni jedenga, ajitobyala akale ajitovuna, kana kubunganya mumakombana, koga Tate benu bokudenga banojichelela. Imwi amutodikana kujipinda na? 27 Akale ndiyani pakati penu angapamija unshaji wobupenyu bubwe nokuzwinyaja?

28 "Ani ini muzwinyanja nezwombala? Lingani maluba eshango kuti anokubuka chini, aatoshinga nesimba kana kuluka." 29 Asi ndomubuja kuti, kojoba iye Solomoni mukushongeka kukwe aajakambala selimwe lyawo. 30 Koga kana Mwali embajika ali buhwa bwomuminda, ibo bunoti nasi bupenyu, mangwana bwaposelwa mumoto. Aatomumbajika zwibuyanana na? Imwi bana kudimbwa kutukutuku!

31 "Nokudalo musizwinyaje muti, tolyani akale tonwani kana kuti, tombalani?" 32 Nokuti bokuzhe banozwishaka zwose yezwi zwinhu, akale Tate benu bokudenga banozwiziba kuti mozwidabo zwose yezwi. 33 "Asi shakani bushe bwaMwali kutanga akale nobululami bubwe, zwose zwinhu yezwi zwinoba zwenu akale. 34 Nokudalo musizwinyaje nezwamangwana, nokuti lyamangwana linozwinyajila zwalyo. Lekeja injabulo jeelyo izhuba jizhulile yeelyo izhuba."