1 Noyonshaji Helodi untongi, awha nezwempuwo yaJesu, 2 wakati kubashingi babe, "Yoyu ndiye Joni uMbhabhatizi, wamuswa mubafi, ndizwo isimba lyokuta mishingo lilimunaiye."

3 Nokuti Helodi wakasunga Joni akombiga muntolongo pezhulu paHelodiyasi, unkaji waFilipu, mwanakwaina uwe. 4 Nokuti Joni wakati kunaiye, "azwimo mumulawo kuti uuntole," 5 Kojoba wakabeda kubulaya Joni, koga wakabetya banhu, nokuti bakabountola sompolofeti.

6 Koga nezhuba lyokuzwalwa kwaHelodi, mwananhukajana waHelodiyasi wakazana mbeli kwabo, akashantisa Helodi, 7 mane akoombimbisa nekowhe kuti unompa kana chipizwacho chaachakumbila.

8 Sokubujwa namai babe, wakati, "Ndipeni ngweno mundyilo unsholo waJoni uMbhabhatizi."

9 She wakawushubala, asi pezhulu pekowhe, akale nabashanyi baluba naye, wakalaya kuti epiwe. 10 Wakatuma balwi akale Joni kova edumulwa unsholo elimuntolongo, 11 Akale unsholo uwe wakabuzwa ulimundyilo ukapiwa unsichana, iye akoonsenga kunamai babe. 12 Balayijwa babe bakezha bakatola untumbu uwe bakonjika, bakenda bakanobuja Jesu.

13 Wakati Jesu azwiwha yezwi, wakabhuda yopo nobwato akenda kubugalo bwegwegulu eli ega. Koga ibunga lyabanhu palyakazwiwha, lyakontobela namakumbo liva mumakuta. 14 Paakabhuluka, wakabona ibunga igulwana lyabanhu, akabawhila ishe, akachilisa banolwala.

15 Kwaba madeko, balayijwa babe bakenda kunaiye, bakati, "Lingani yokuno kwatili kuzhe, unshaji wenda, lekejani banhu bende kumisha benotenga kulya kwabo."

16 Jesu wakati, "Abatokwelela kunda, imwi bapeni zwokulya!" 17 Bakati kunaiye, "Tina zwinkwa zwishanu nehobe imbili chete."

18 Iye akati, "zwibuzeni yokuno kwandili." 19 Wakabuja ibunga lyabanhu kuti ligale pasi pabuhwa, akatola zwinkwa zwishanu nehobe mbili, akalinga kudenga, akazwikombolela, akazwimedula zwinkwa akazwipa kubalayijwa babe, balayijwa bakapa ibunga lyabanhu. 20 Bose bakalya bakaguta, bakanunga zwifwapi zwakabasala bakazhaja zwizuma igumi nezwibili. 21 Bose bakalya bakabeswika banhu zwiulu zwishanu zwabanhulume, kusinobalwa banhukaji nabana.

22 Pakalepo Jesu wakabuja balayijwa babe kuti bengwine mubwato, bevubukile museli bende mbeli kukwe, iye wakabuja banhu kuti bemwayike. 23 Wakati abuja banhu kuti bemwayike, wakatanha mudunhu eli ega kunonamata. Kwakati kwaba madeko, iye wakaba eli ega. 24 Koga bwato bwakabakwenda nshizho kuva kunyika, bwakabe sundilwa yoku noku namakampo nokuti ibhepo lyakabepunga likalingana nabo.

25 Kwaba kumijelo wakaswika kwabali, ekwenda namakumbo pezhulu pegungwa, 26 Balayijwa babe pabakombona ekwenda mugungwa, zwakabatyisa, bakati, "Ishaku!" bakalila mulutyo.

27 Pakalepo Jesu wakalebeleka nabo, eti, "Simani, ndimi, musitye."

28 Pita wakashandula, eti, "Tezi, kana uli iwi, leba kuti ndizhe kwauli ndili pezhulu pevula."

29 Wakati, "izha." Pita wakabhuda mubwato, ekwenda pezhulu pevula, enda kuna Jesu. 30 Koga paakabona isimba lyebhepo, wakatya, akatanga kumila, akashomeja eti, "Tezi, ndichije!"

31 Nokukambija Jesu wakatambunuja lubokolulwe akoombata, eti kwaali, "Iwi una kudimbwa kutukutuku, ini wakahajika?"

32 Pabakangwina mubwato ibhepo lyakanyalala. 33 Baluba mubwato bakonamata, beti, "chokomende Iwi uMwananhulumyana waMwali!"

34 Pabakati bavubukila museli, bakaswika munyika yeGenesaleti. 35 Pabakati bonziba banhu bobugalo yobo kuti ndiani, bakatumila iwhi munyika yeyo yose, bakabuza balwaji bose kunaiye. 36 Bakombweta kuti ebavumije kubhata umpeto wechimbalo chiche, banji bakabhata bakachila.