1 Ngweno kwakezha kunaJesu bamwe baFalisi nabakwali beva kuJelusalema, bakati kwaali, 2 "Ini balayijwa babo besinotobeleja ingalilo yabakulwana? Nokuti abatoshamba maboko pabanolya."

3 Iye wakabashandula eti, "Imwibo ini mutaluka mulawo waMwali pezhulu pengalilo yenu?" 4 Nokuti Mwali wakalaya eti, "Lemekeja tate namai babo, akale, yoyo unolebeleka bubi natate babe kana amai babe, chokomende ngebulayiwe." 5 Koga imwi moti: Aani naani unoti kuna tate babe kana amai babe, yecho chinova kunami chabekwelela kumubhancha umpilo kunaMwali, 6 iye aachinosungilwa kukuja tate babe, sezwo nokuda kwengalilo yenu, mwata kuti iwhi lyaMwali lisibe nonshingo. 7 Imwi, bachengeji, Izaya wakapolofita ichokomende pezhulu penu, paakati,

8 "Yaba banhu banondikuja nemilomo yabo,

koga moyo wabo ukokule nami,

9 banondinamata zwisinalubhancho,

banolayija indayijo inova mundangalilo jabanhu!’"

10 Jesu wakashobela banhu kwaali akati kwabali, "Iwhani akale muwhisise, 11 achitoba chinongwina mundomo chinoswibhisa unhu, koga chinova mundomo, yechi ndicho chinoswibhisa unhu."

12 Pakalepo balayijwa bakezha kwaali beti, "Unozwiziba na kuti baFalisi babipilwa pabawha yezwi zwalebelekwa?"

13 Wakashandula eti, "Chose chibyalwa chisakabyalwa naTate bangu bokudenga chinoosipulwa. 14 Basiyeni bakadalo, batungamili mapofu. Akale kana ibhofu lingotungamila ibhofu, bose banowila mugwizhana."

15 Koga Pita wakati kwaali, "Pandulula unkwejaniso yoyu kwatili."

16 Jesu wakati, "Namwibo amujanu mwawhisisa? 17 Amubweni na kuti zwose zwinongwina nopandomo zwinonda muntumbu, zwitukopindilila zwindila mbeli? 18 Koga zwinobhuda mundomo zwinova mumwoyo, yezwi zwinoswibhisa unhu. 19 Nokuti mumwoyo ndimo munova indangalilo imbi, kubulaya, kupombola, buhungu, bubava, busumikiji bwamaniepwa, nokunyeya. 20 Yezwi ndizwo zwinoswibhisa unhu, koga kulya usashamba maboko akutoswibhisa unhu."

21 Jesu wakabhuda kwakale akenda kudunhu lyokuTile neSidoni. 22 Akale ilingani, unhukaji uNkenani waluva munyika yeyo wakezha ekwiila eti, "Ndiwhile ishe, Tezi, Mwananhulumyana waDavidi, mwananhukajana wangu ulobhatwa nesimba nedimoni."

23 Koga aajakonshandula kana iwhi limwempela. Akale balayijwa babe bakezha bakombweta beti, "Untatamile nokuti umutitobela ekwiila."

24 Wakashandula eti, "Ndakatumwa chete kumhwizi jakalashika jengumba yaIzilayeli."

25 Asi wakezha, akafhigama mbeli kukwe eti, "Tezi, ndibhanche."

26 Wakashandula eti, "Akujilolulama kuposela imbwa kulya kwabana."

27 Wakati, "Eya, Tezi, kojoba alo, naijo imbwa jinolya tufwapifwapi tunombwelela mudako lyetebuli lyamatezi ajo."

28 Kova Jesu onshandula eti, "Amwe mai, kudimbwa kwenu kukulwana! Ngachitike chido chenu." Mwananhukajana wabo wakachila pakalepo.

29 Kuva yopo Jesu wakakwenda etobeleja igungwa lyeGalili. Akatanha mudunhu, akagala pasi pakalepo. 30 Mabunga makulwana akezha kwaali, ezha namakosha, balolwajiswa, mapofu, basinolebeleka, nabamwe banjinji, akale bakababiga pelyo namakumbo awe, akabachilisa, 31 zwokuti ibunga lyabanhu lyakachenama, pabakabona basinolebeleka belebeleka, balokubajika bebabapumbulu, makosha ekwenda, mapofu ebona, bakatunhumwija Mwali wabaIzilayeli.

32 Jesu wakashoba balayijwa babe kwaali, akati kunaibo, "Ndinowhila ishe ibunga, nokuti babeli nami kwamazhuba matatu, akale abachina zwokulya, namibo anditoda kubabwiliza nenzhala, nokuti chimwe chilo bangazilika munzila."

33 Akale balayijwa babe bakati kwaali, "Yomuno mugwegulu tozwiwana kupi zwinkwa zwingaguncha ibunga igulwana lyakadai?"

34 Jesu wakati kwabali, "Munazwinkwa zwingana"

Bakati, "Zwishanu nezwibili notukobe tushomanana."

35 Wakalaya ibunga kuti ligale pasi, 36 akatola zwinkwa zwishanu nezwibili nehobe, akaboka, akazwipemula akapa balayijwa babe, balayijwa bakapa mabunga abanhu. 37 Bose bakalya bakaguta, akale bakabunganisa zwipemu zwakasala, zwikazhaja zwitundu zwishanu nezwibili. 38 Yabo bakalya, bakababeli banhulume zwiulu zwina, kusinolabwa banhukaji nabana.

39 Akonekana namabunga, wakangwina mubwato akenda kunyika yokuMagadani.