1 Akale baFalisi nabaSadusi bakezha kunaJesu, koonkweja beti, ebatondeje chitondejo chinova kudenga. 2 Wakabashandula eti, "Kungoba madeko moti, ‘mamililo okuzhe anobeli mabuya, nokuti idenga ishaba.’ 3 Akale zhingwanangwana moti, ‘nasi kuzhe kunobeli nebhepo nokuti idenga ishaba akale linotyisa.’ Moziba kubhaunula kulingika kwedenga, koga, amutotubula kubhaunula zwiboneso zwonshaji. 4 Chizekululu chibi akale chobupomboli chinoda chitondejelo, apana chitondejelo chamuchapiwa kuzhe kwechitondejelo chaJona."

Nokudalo wakabasiya akenda.

5 Balayijwa babe pabakaswika museli, bakabakanganwa kubuza zwinkwa. 6 Jesu wakati kwabali, "Lingisisani akale muchenjelele unkukumuso wabaFalisi nabaSadusi."

7 Bakalebeleka chabochabo beti, "Atijabuza chinkwa."

8 Koga Jesu ezwiziba yezwi wakati, "A banhu banakudimbwa kushoma, ini mulebeleka pakati penu kuti amuna zwinkwa? 9 Amujanu mwawhisisa nanasi? Amuchinokumbuluka kuti ndakaguncha banhu zwiulu zwishanu nezwinkwa zwishanu, akale kuti zwaluba zwingana zwizuma zwamwakabunganisa? 10 Kana zwinkwa zwishanu nezwibili zwakaguncha banhu zwiulu zwina, akale zwitundu zwingana zwamwakabunganisa? 11 Ini musinowhisisa kuti andijikumuleba nozwezwinkwa? Chenjelelani unkukumuso wabaFalisi nabaSadusi."

12 Ndipo pabakawhisisa kuti aajakabebabuja kuti bechenjelele unkukumuso wechinkwa, koga zwendayijo yabaFalisi nabaSadusi.

13 Ngweno Jesu paakaswika mudunhu lyeKesaliya Filipu, wakabhuza balayijwa babe eti, "Banhu banoti Mwananhulumyana woNhu ndiani?"

14 Ibo bakati, "Bamwe banoti Joni umbhabhatizi, bamwe banoti Elija, bamwe bo banoti Jelemiya, kana umwe wabapolofeti."

15 Wakati kwabali, "Koga imwi munoti ndimi aani?"

16 Simoni Pita wakashandula eti, "Ndiwi Kristo, Mwananhulumyana waMwali umpenyu."

17 Jesu wakonshandula akati, "Ulokombolelwa iwi, Simoni mwananhulumyana waJona! Nokuti umbili nelopa azwijakutondeja yezwi, asi Tate bangu bayiko kudenga. 18 Ndokubuja kuti, ndiwi Pita, pamwala yoyu ndoobaka igubungano lyangu, akale masimba olufu aatolizunda. 19 Ndokupa isimba lyobushe bwedenga, chose chauchasunga penyika, nokudenga chinoosungwa, akale chose chauchasungunula penyika, chichasungunulwa nokudenga."

20 Ndipo paakava alaya nesimba balayijwa babe kuti besibuje kananhu kuti iye ndiye Kristo.

21 Kuva yoyonshaji Jesu wakatanga kubuja balayijwa babe kuti unokwelela kunda kuJelusalema kunosheteswa nozwinhu zwinji nabakulwana, nabatebuji bakulwana, nabakwali bomulawo, akale ebulayiwe, nezhuba lyatatu etukomuswa.

22 Kuva yopo, Pita wakonsengela kumbali, akatanga kuunkalalila eti, "Mane, Tezi! Yezwi azwitofa zwatikana kunawi."

23 Iye wakachebuka akati kuna Pita, "Bhuda mushule mwangu, iwi Satani, unkoneji kwandili, nokuti auko kubhazu lyaMwali koga lyabanhu."

24 Ngweno Jesu wakati kubalayijwa babe, "Kana unhu eda kunditobela, ngeezwilamwe, enyamule unchinjikwa uwe, enditobele. 25 Nokuti yoyo unoda kuchija bupenyu bubwe, unoobulashikilwa, koga yoyo unolashikilwa nobupenyu bubwe nokuda kwangu, unoobuwana. 26 Zwinobhanchani kuti unhu ewane zwose zwopasi, koga elashikilwe nobupenyu bubwe? Mane pe, nokuti apana zwaungape kuti ubuwane bupya bupenyu. 27 Nokuti Mwananhulumyana woNhu unoozha nokungaima kwaTate elinengilozi jije, akale kova elipa wose unhu zwinokwendelana nozwaakata. 28 Chokomende, ndinoti kwamuli, pana bamwe bamile yopa basinoofa, kuswikila babona Mwananhulumyana woNhu ezha mubushe bubwe."