1 Jesu ebona ibunga, wakatanha idunhu, paakati agala pasi, balayijwa babe bakezha kwaali. 2 Akale wakalebeleka ebalayija eti,

3 "Balokombolelwa basheti mumpepo,

nokuti bushe bwedenga ngobwabo"

4 Balokombolelwa yabo banolila,

nokuti banoonyalajwa.

5 "Balokombolelwa yabo banyolo,

nokuti banootambula inyika"

6 Balokombolelwa yabo banenzhala nenyota yobululami,

nezwo banogunchwa.

7 Balokombolelwa yabo baneshe,

nokuti banoowhilwa ishe.

8 Balokombolelwa bana mwoyo unchena,

nokuti banoobona Mwali!

9 "Balokombolelwa yabo banobuza lunyalalo,

nokuti banoowhi bana baMwali"

10 "Balokombolelwa banoshungulujwa pezhulu pobululami,

nokuti bushe bwedenga ngobwabo"

11 "Mulokombolelwa imwi, kana mutukwa, mushungulujwa, nokulebelwa zwose zwibi zwokuniepa pezhulu pangu" 12 Shantani akale munakilwe, nokuti indipilo yenu ihulwana kudenga, nokuti bapolofeti bakabelipo mbeli kwenu bakashungulujwa bo.

13 "Imwi mumunyu wenyika, asi kana munyu washampuka, ungatubula kubwiliza kulwela na? Auchina nshingo, kuzhe kokuti ulashwe pazhe pauchatobwa nabanhu"

14 "Imwi mumwenje wenyika. Iguta lilobakilwa pedunhu alitosisika" 15 Akale banhu abatotutumisa chimuniko kova bechitibhikila nehali, asi banochibiga pechitala, kutila kuti chimunikile bose mumba. 16 "Mwenje wenu ngaupenye mbeli kwabanhu, kuti bebone mishingo yenu mibuyanana akale bepe lukujo kunaTate benu baiko kudenga"

17 Musiyeye kuti ndezha kobhisa mulawo waMozesi, newhalo jabapolofeti. Andijezha koozwibhisa koga koozwizhajikija. 18 Chokomende ndinoti kwamuli, kuswikila idenga nenyika zwapela, apana kana limwempela ibala lyomulawo linoobhiswa kuswikila zwose zwazhajikijwa. 19 Aani naani usinotobeleja umwe wemilawo yeyi kojoba ulintukutuku, elayija banhu kuti bete alo, unooba untukutuku mubushe bwedenga, asi iye unolondota akale elayija banhu kuti bete alo, ndiye uchoowhi unkulwana mubushe bwedenga. 20 Nokudalo ndinomubuja kuti, kuzhe kokuti bululami bwenu bupinde bululami bwabakwali nobwabaFalisi, chokomende amutoomungwina mubushe bwedenga.

21 "Mwakawha zwakababujwa banhu bantolo kuti, ‘Usibulaye, wose unobulaya unhu unoopiwa untongo uwe.’ 22 Koga imi ndoti kunamwi, wose unonyemela mwanakwaina unoopiwa untongo, akale yoyo unotuka mwanakwaina unoosengwa pegota, akale yoyo unoti, ‘Iwi lema!’ unokwelela kuposelwa mumoto wegehena. 23 Kana usenga umpilo uwo kudebulilo, kova ukumbuluka kuti mwanakwaina uwo ulokunyemela, 24 siya chipo chicho mbeli kwedebulilo, unde unowhanana nomwanakwaina uwo, ndipo pauchoobuya, upila chipo chicho.

25 "Ita bukwaina nontamijili uwo, nokukambija muchimunzila mukwenda mose munda kugota, nokuti untamijili uwo unokupila kuntongi, akale untongi kundindi, akale iwi unobigwa muntolongo. 26 Chokomende ndoti kunawi, autoobhuda mukati, kuswikila walipa imali yose kunoswika pekobeli lyopejisila.

27 "Mwakawha zwakalebwa kuti, ‘Musipombole.’ 28 Koga ndinoti kwamuli, wose unolinga unhukaji oondakamila, wapombola naye kale mumwoyo uwe. 29 Kana izhisho lilyo lyokululyi likuchinyisa, libhise ulilashe nokuti zwibuyanana kwauli kuti ulashikilwe nechimwe chibabi chombili uwo, kuna kuti umbili uwo wose ulashilwe mugehena. 30 Kana luboko lulwo lwokululyi lukuchinyisa, ludumule ululashe, nokuti zwibuyanana kwauli kuti kulashike chimwe chibabi chombili uwo, pana kuti umbili uwo wose unde mugehena.

31 "Zwakalebwa kabili kuti, ‘Aani nani unoshima unkaji uwe, ngeumpe lukwalo lokushima.’ 32 Koga ndinoti kwamuli, wose unoshima unkaji uwe, kuzhe kokuti wapombola, unounta imhombwe, akale upi azwe unolobola unhukaji washimwa neebo unoba apombola.

33 "Mwakawha kabili kuwhi kubanhu bantolo, ‘Musikowhe maniepwa, asi zhajikijani ikowhe lyenu kunaTezi.’ 34 Koga ndinoti kunamwi, musikowhe nalini, kana nedenga, nokuti ndicho chigalo chobushe bwaMwali, 35 kana nenyika, nokuti chibhula chiche chokutobelela makumbo awe, kana neJelusalema, nokuti iguta igulwana lyaShe unkulugulu. 36 Usikowhe nonsholo uwo, nokuti auna isimba lyokushandula ivuji kuti libe jena kana kuba idema. 37 Zwaunoleba ngezwibe ‘Eya’ kana ‘Ne’ zwimwe zwinopinda yezwi zwinobeva kumbengi.

38 "Mwakawha kuti kwakawhi, ‘Izhisho nezhisho akale izhino nezhino.’ 39 Koga ndinoti kunamwi, musimisikijane noyo umbi. Asi kana umwe angokuloba pedama lyokululyi, shanduka umpe limwe bo. 40 Kana umwe angokusungisa kova ekutolela chibaki chicho, undekeje etole neshashiko iyo neebo. 41 Kana unhu akumanikija kuti unde naye unshizho umwempela, inda naye mishizho mibili. 42 Umpe iye unokukumbila, usiuminye neebo yoyo unocheneka.

43 "Mwakawha kuti kwakawhi, ‘ida umbakijani uwo, koga ubenge umbengi uwo.’ 44 Koga ndinoti kwamuli, idani babengi benu, banamatileni yabo banomuyangatisa, 45 kuti mube bana baTate benu baiko kudenga, nokuti unota izhuba lilye lije kubabi nokubabuya, akale unopa ivula kubalulami nabasilolulama. 46 Kana muda banomuda, mowana indiponi! Ibo batelesi abatota alo na? 47 Akale kana mumusa banakwaina benu chete, ini zwamukumuta kupinda bamwe? Nabokuzhe abatota zwakalezo na? 48 Nokudalo imwi ibani banhu balopelelela, saTate benu bokudenga balopelelela.