1 Akale Jesu wakalebeleka nabo nemikwejaniso, eti, 2 "Bushe bwokudenga bungakwejaniswa naTezi, wakalonganyila mwananhulumyana uwe mabhiko okulobolana. 3 Wakatuma bashingi babe kunoshoba yabo bakabakakokwa kumabhiko okulobolana, koga ibo abajakezha. 4 Wakatuma kabili bamwe bashingi, eti, ‘Bujani bakakokwa kuti ndalonganya kale chilayilo changu, inkabe namanamani alokola abulayiwa, zwose zwalonganywa izhani kumabhiko okulobolana.’ 5 Koga abajakazwiwhilila, wokutanga wakenda kuminda uwe, umwe wakenda kunshingo uwe. 6 Bamwe ndibo bakabhata bashingi babe, bakaba shunguluja, nokubabulaya. 7 She wakanyema, akatuma balwi babe kuti benopalaja babulayi yabo, nokupisa iguta igulwana lyabo. 8 Wakati kubashingi babe, ‘mabhiko alonganywa, koga bakabakokwa abajakabekwelela. 9 Nokudalo indani panoshangana jinzila, mukoke banhu banji bamuchawana kuti bezhe kumabhiko okulobolana.’ 10 Bashingi yaba bakabhuda, bakenda kumigwagwa, bakanoshoba bose babakabona, babi nababuya, ingumba yamabhiko yakava yazhala nabakokwi."

11 "She paakangwina kuti ebone baluba bakakokwa, wakabona umwe unhu usakabakambala chimbalo chamabhiko okulobolana, 12 wakati kwaali, ‘nkwaina, ani biya wangwina chini yomuno usina chimbalo chamabhiko okulobolana?’ Koga iye wakapelelwa namawhi. 13 She wakati kubashingi, ‘Unsungeni makumbo namaboko, muumposele munhilima yopazhe, yomo banhu banooba nokulila nokuziyanisa meno.’ "

14 "Nokuti balokokwa banji, koga banoshalwa bashoma."

15 BaFalisi bakenda, bakanolangana kuti bangonteya chini mukulebeleka kukwe. 16 Bakatumila kwaali balayijwa babo nabamwe bebhazu lyaHelodi, beti, "Ndayiji, tinoziba kuti ndiwi unoleba ichokomende, akale unolayija inzila yaMwali nechokomende, aunani kuti banhu banotini akale aunani nezwaali unhu. 17 Nokudalo tibuje kuti umuyeyani. Zwimomumulawo kulipa untelo kunaKesali kana ne?"

18 Koga Jesu eziba bubi bwabo, wakati, "imwi bachengeji, ini mundikweja? 19 Nditondejeni ikobeli lyontelo."

Ibo bakontambika ikobeli. 20 Jesu wakati kwabali, "Untojaniso wani yoyu, akale izina lyani lipo yopa?"

21 Bakati, "Ngezwa Kesali."

Iye akati kwabali, "Nokudalo ipani Kesali zwaKesali, mupe Mwali zwaMwali."

22 Pabakawha yezwi bakachenama, bakonsiya, bakenda.

23 Nelyakalelo izhuba baSadusi yabo banoti akuna kumuka kubafi, bakezha kuna iye, bakombhuza, 24 beti, "Ndayiji, Mozesi wakati, ‘Kana unhulume angofa esina bana, ununa uwe ulokwelela kungwina inchilikaji, kuti ezwalile unkulu uwe bana.’ 25 Ngweno kwaluba unkulu wakabeli nabanuna babe bashanu nomwempela pakati pedu, unkulu wakalobola, akoofa, ajakasiya mwana, unkaji uwe wakongwinwa nonuna. 26 Zwakatikana kuna wechibili, nowechitatu, kuswikila kuna wobushanu tuna tubili. 27 Mushule mwabo bose unhukaji wakafa. 28 Mukumuka kwabakafa, unooba unkaji wani pabashanu nababili yaba? Nokuti bose bakabondobola."

29 Jesu wakabashandula eti, "Mwaleswa pezhulu pokusoziba makwalo nesimba lyaMwali wenu. 30 Nokuti mukumuka kwabakafa akuna kulobola kana kulobolwa, koga banooba sengilozi kudenga. 31 Panezwokumuka kuna bakafa, amujakabala na zwakalebwa naMwali kwamuli, 32 ‘Ndimi Mwali waAbhulahamu, naMwali waIsaki, naMwali waJakobe?’ Atoba Mwali wabakafa, koga ngowabapenyu."

33 Palyakati ibunga lyabanhu lyazwiwha, lyakachenamiswa nokulayija kukwe.

34 Koga baFalisi pabakawha kuti wakabazunda nendebo baSadusi, bakabungana. 35 Umwe wabo wakaba eli mhizha yomulawo, wakabhuza onkweja, eti, 36 "Ndayiji, ngoupi mulawo unkulwana mumilawo?"

37 Iye wakati kwaali, "Ida Tezi Mwali uwo, nomwoyo uwo wose, nompepo uwo wose, nendangalilo iyo yose. 38 Yoyu ndiwo mulawo unkulwana akale wotanga. 39 Wabili unokwelana noyu, unoti, ‘Ida umbakijani uwo sobunozwida iwi.’ 40 Pana yeyi milawo mibili ndipo pamile mulawo wose nendayijo jabapolofeti."

41 Ngweno baFalisi bakashangana pamwempela, Jesu akabhuza umbuzo, 42 eti, "Munotini nezwaKristo? Mwananhulumyana wani?"

Bakati kwaali, "Mwananhulumyana waDavidi."

43 Wakati kwabali, "Ani ini iye Davidi etungamililwa noMpepo, unounshoba eti Tezi, elimukuti:

44 Tezi wakati kunaTezi wangu,

Gala kululyi lwangu,

kuswikila ndabiga babengi babo pasi pamakumbo awo"

45 Kana Davidi ounshoba eti, ‘Tezi, angaba mwananhulumyana uwe chini?"

46 Apana wakatubula kuunshandula, kuvila izhuba yelyo apana unhu wakanyengula kuumbhuza kabili.