1 Jesu wakabhuda muTempeli, akakwenda eva peTempeli, bakezha balayijwa babe bakontondeja zwibakwa zwetempeli. 2 Koga wakabashandula eti, "Muzwibweni zwose yezwi na? Chokomende ndinoti kwamuli, apana ibwe kana limwempela lichoosala pezhulu pelimwe lisakakolomolwa."

3 Eligele pasi Mudunhu lyeOlivi, balayijwa babe bakezha kwaali musiswa beti, "Tibuje, yezwi zwinootikana lini, akale chitondejelo chokuzha kuko ngechipi akale nechokupejeleja konshaji?" 4 Akale Jesu wakabashandula, eti, "Chenjelani kuti pesibe nouchamulasha. 5 Banji banoozha muzina lyangu beti, ‘Imi ndimi Kristo,’ banoolasha banji. 6 Moowha zwejihondo namalebwalebwa ejihondo, koga musitye, nokuti yezwi zwilokwelela kutikana, koga mapejelejo anoba asanu aswika. 7 Luji lunoomukila lumwe luji, bushe bunoomukila bumwe bushe, kunooba nebhamba akale nokuteketa kwenyika kubugalo bulosiyana siyana. 8 Zwose yezwi zwinanga samatangisilo okulwaja kwemimba."

9 "Pakalepo banomupila kuti muyabuliswe, bemubulaye akale moobengwa nenduji jenyika jose pezhulu pangu. 10 Banji banoowa, akale banoochetana nokubengana. 11 Akale bapolofeti banji bamaniepwa banoobhuka akale banoolasha banji. 12 Nokuti bubi bunoowanda, ludo lwabanji lunooshomopala. 13 Koga yoyo uchasungwala kuswikila kumapejelejo, unoochijwa. 14 Akale iNdebo iMbuya yeyi yobushe inoobhaunulwa kunyika jose, sobusumikiji kunduji jose, yopo ndipo pakuchaswika umpejelejo."

15 "Sokudalo mungobona chinhu chineshambwa chinobuza kupalaja chakalebwa nompolofeti Daniyele, chilimile mubugalo buchena (unobala ngewhisise), 16 yabo baimo muJudiya ngebetizhile kumatunhu, 17 iye upo pezhulu pengumba esibhuluke kuti enotola zwinoba zwili mungumba yiye, 18 ukokuminda esibwilile kusha kunotola ishashiko yiye. 19 Lutaka, kuna yabo banemimba nabanomwisa mumazhuba yayo! 20 Namatani kuti kutizha kwenu kusibe nonshaji wemhepo kana nezhuba lyeSabata. 21 Noyo unshaji kunooba nenjabulo ihulwana zwisanu zwabaipo kuvila kumatangisilo enyika kuswikila ngweno, mane azwitobaipo akale. 22 Akale ngana mazhuba yayo asakashomopajwa, akuna unhu umwempela waluchijwa, koga pezhulu paabo bakashalwa mazhuba yayo anooshomopajwa."

23 "Kojoba kana umwe angoti kwamuli, ‘Lingani, hoono Kristo!’ kana kuti, ‘Hondiya yokuya!’ Musizwidimbwe. 24 Kunoozha baKristo bamaniepwa nabapolofeti bamaniepwa, bachoota zwitondejelo nezwishamiso zwikulwana, kutila kulasha, kana zwitubulika naabo bakashalwa. 25 Iwhani, ndamubuja mbeli konshaji."

26 "Nezwo bangoti kwamuli, ‘ilingani umo mugwegulu,’ musinde, kana beti, ‘ilingani wimo mungumba jomukati musizwidimbwe. 27 Sezwinota lupalanganda, lunochenesa kubuvezhuba luswika kubumililo, kunooba alo pakuzha kwoMwananhulumyana woNhu."

28 "Pose pana chafa, panobungana magola."

29 "Pakalepo kuvila munjabulo jamazhuba yayo, izhuba linoojima, mweji autopenya, akale nenyenyeji jinoombwela jiva kudenga, akale namasimba amatenga anoozobanyiswa. 30 Noyo unshaji kunooboneka chitondejelo choMwananhulumyana woNhu kudenga, nenduji jose jopasi jinoolila, jibona Mwananhulumyana woNhu ezha eli pamakole edenga, eli nesimba nokungaima kukulugulu, 31 akale unootuma ingilozi jije jilija lukwembo lukulwana, jinoobunganisa bakashalwa babe kuva kumatibi mana enyika, beva kubhazu limwe lyedenga kunoswikila kunelimwe."

32 "Iwanani indayijo kunkuyu, inhabi jingonyolopa akale pajinotanga kukwinila, munova mwaziba kuti izhizha lyaba pelyo. 33 Nezwo, mungobona yezwi zwinhu zwose, zibani kuti wabapelyo, pankoba womene. 34 Chokomende, ndinoti kwamuli, yechi chizekululu achitoopela zwisanu zwatikana zwose yezwi. 35 Idenga nenyika zwinoopinda, koga mawhi angu aatoopinda."

36 "Koga apana unoziba yelyo izhuba nooyo unshaji, kojoba ingilozi jedenga kana Mwananhulumyana, koga Tate chete. 37 Somumazhuba aNowa, ndimo mukuchaba kuzha kwoMwananhulumyana woNhu. 38 Somumazhuba yayo izhame lisanu lyaswika, bakabelya nokunwa, bakabelobola nokulobolwa, kuswikila izhuba lyaakangwina mubwato bukulwana Nowa, 39 akale abajakaziba kuswikila izhame lyaswika, likabakukulula bose, ndimo mukuchaba pakuzha kwoMwananhulumyana woNhu. 40 Pakalepo banhulume babili banoba belimuminda, umwe unotolwa akale umwe unosala. 41 Banhukaji babili bekwiya pegwiyo, umwe unotolwa umwe unosala. 42 Nokudalo ilindani, nokuti amutoziba kuti Tezi wenu unozha nelipi izhuba. 43 Koga zibani yezwi, kuti ngana mweni wengumba akabeziba kuti imbava inozha nonshaji upi wobusiku, walulinda, aajaluleka imbava ingwina mungumba iye. 44 Nokudalo imwi bo, galani mwakalonganya, nokuti Mwananhulumyana woNhu unoozha nonshaji wamusilolingilila."

45 "Ndiani biya unshingi ulobimbika akale eli unchenjevu, wakapiwa unshingo wokulondota bashingi, kuti ebape zwokulya zwakakwelela kunabamwe bashingi nonshaji ulokwelela? 46 Ulokombolelwa unshingi yoyo unoti kana tezi eswika ongwane eta sokubujwa kukwe. 47 Chokomende ndinoti kwamuli, unoonta umbhati wefuma iye yose. 48 Koga kana yoyo unshingi umbi angoti nechomumoyo uwe, "Tezi wangu wajilwa kuzha, 49 akale kova etanga kuloba bashingikwaina, nokulya nokunwa nabakolwi, 50 tezi wonshingi yoyu unoozha nezhuba lyaasinoyeesela nonshaji waasinoziba, 51 unoompa chilango akale unoombiga nabachengeji, yoko banhu kubachabekwiila nokuziya meno."