1 Akale Jesu wakangwina mubwato akatalukila museli akaswika muguta lyokunaibo. 2 Akale pakalepo, bakabuza igosha kwaali, lililele pabushasha bwalyo, akale Jesu abona kudimbwa kwabo, wakati kugosha, "Shanta mwananhulumyana wangu, luchinyo lulo lwalekejelwa."

3 Akale ilingani, bamwe babakwali bakalebeleka mumyoyo yabo beti, "Yoyu unhu ukumutuka Mwali."

4 Koga Jesu eziba indangalilo jabo, wakati, "Ini muyeya yezwi mumyoyo yenu" 5 Ini zwilelu, kuti, "Luchinyo lulo lwalekejelwa kana kuti, ‘Milika ukwende?’ 6 Koga kutila kuti muzibe kuti Mwananhulumyana woNhu unesimba penyika yopano lyokulekejela luchinyo," kova eti kugosha, "nyamuka utole bushasha bubo, unde kungumba kuko."

7 Wakanyamuka akenda kusha kukwe. 8 Mabunga paakazwibona yezwi, akatya, akale akakuja Mwali, iye wakapa masimba akadai kubanhu.

9 Jesu epinda eva kwakabeli, wakabona unhulume waluwhi Mateo eligele mungumba yokutelela, wakati kwaali, "Nditobele."

Wakanyamuka akoontobela. 10 Akale wakati eli mungumba belikumulya, kwakezha batelesi nabachinyi banji, bakagala pasi naJesu nabalayijwa babe. 11 BaFalisi bazwibona yezwi bakati kubalayijwa babe, "Undayiji wenu ini, elya nabatelesi nabachinyi"

12 Paakazwiwha yezwi, wakati kwabali, "Bana buchilo bubuya abatopyanga undapi, koga yabo banolwala. 13 Indani, munolayijwa kuti yezwi zwinolebani kuti ‘Ndinoda ishe, kusi umpilo.’ Nokuti andijakezha koshoba bakalulama, koga bachinyi."

14 Kova balayijwa baJoni umbhabhatizi bezha kwaali, beti, "Ini isu nabaFalisi tizwiminya kulya tunjinji, koga balayijwa babo abatozwiminya kulya"

15 Jesu wakati kwabali, "Bakokwa pamuchado bangalila na, kana unkwasha ukumuchada echimukati mwabo?" Mazhuba anooswika paachobhiswa umulobolwa pakati pabo, ndipo pabachazwiminya kulya.

16 Akale akuna angabiga chigamba chipya pechimbalo chilokulumpala nokuti chigamba chino jeluka pechimbalo, akale kujeluka kunoba kukulwana. 17 Nokudalo iwaini impya aitodilwa mumikabo yantolo, zwingodalo mikabo inokwamuka, iwaini kova ikutuka, neebo mikabo inofa, koga iwaini impya inodilwa mumikabo mipya, zwingodalo yezwi zwibili zwinolondoteka.

18 Echinolebeleka kwabali, kwakaswika untongi akafhigama mbeli kukwe, akati, "Mwananhukajana wangu washaika ngweno ali, koga ande, ungobiga luboko lulo panaiye, unolalama."

19 Jesu wakanyamuka akontobela nabalayijwa babe.

20 Akale ilingani, umwe unhukaji wakabajiijwa nokubhuda ilopa kwamakole igumi namabili, wakasendela mushule mumwe, akabhata lupeto lwechimbalo chiche, 21 wakati mumwoyo uwe, "Ndingobhata chimbalo chiche chete, ndochila."

22 Jesu wakachingunuka, paakombona, wakati: "Shanta, mwananhukajana, kudimbwa kuko kwakuchilisa." Pakalepo unhukaji yoyo wakachila.

23 Jesu paakaswika kungumba yontongi, akale akabona baliji bemitetele bopedilwe nabanhu banjinji pelina iditi, 24 wakati, "bhudani, nokuti unsichana yoyu aajafa, koga ulele." Ibo bakonseka. 25 Ibunga lyabhisilwa pazhe, Iye wakangwina mumba akabhata luboko lwonsichana, unsichana akamuka. 26 Akale chisumo yechi chakawhikwa munyika yeyo yose.

27 Akale Jesu wakati ekwenda endila mbeli epinda yopo, mapofu mabili bakontobela, beshomeja beti, "Mwananhulumyana waDavidi, tiwhile ishe!"

28 Angwina mungumba, mapofu bakenda kunaiye, Jesu akati kwabali, "Munodimbwa kuti ndingatubula kuta yezwi na"

Bakati kwaali, "Eya, Tezi."

29 Kova eguma mesho abo, eti, "Ngezwitike kwamuli sokudimbwa kwenu." 30 Mesho abo akazhulika bakabona. Jesu wakabalaya zwinesimba, eti, "Akutokwelela kuti pebe nonhu uchazwiziba yezwi."

31 Koga pabakabhuda yopo, bakamwalaja impuwo yiye munyika yeyo yose.

32 Bechinobhuda kuti bende, pakalepo, kwakabuzwa kwaali usakabelebeleka wakaba elinamadimoni. 33 Palyakabhiswa idimoni, usakabelebeleka wakalebeleka, mabunga akashama, eti, "Apana zwakadai zwanu zwabonwa muIzilayeli."

34 Koga baFalisi bakati, "Unobhisa madimoni nesimba lyontungamili wamadimoni."

35 Akale Jesu wakangwina mumakuta nomumizi yose, elayija mumasinagogo abo, akale ebhaunula iNdebo iMbuya yobushe bokudenga, echilisa malwaji wose namanyajo ose. 36 Paakabona mabunga abanhu, wakabawhila ishe, nokuti bakabaka shungulujwa akale bakajiila beli semhwizi jisina undyisi. 37 Kova eti kubalayijwa babe, "Kuvuna kukulwana, koga bashingi bashoma, 38 nokudalo namatani kunaTezi mweni wegoloka kuti etumije bashingi koovuna igoloka lilye."