1 Nooyo unshaji balayijwa babe bakenda kuna Jesu, bakati, "Ndiyani unkulwana kasa mubushe bwedenga?"

2 Iye wakashoba mwanantukutuku, akomisa pakati pabo, 3 akati, "Ndinolebesa nditi kunamwi, kuzhe kokuti mushanduke mube sabana batukutuku, amutoobungwina bushe bwedenga. 4 Yoyo unozwininipisa somwana yoyu, ndiye unkulwana kasa mubushe bwedenga. 5 Aanizwe unotambula mwana unanga soyu muzina lyangu, unooba atambula imi."

6 "Asi yoyo unotisa kuti umwe wabatukutuku yaba banodimbwa kunami kuti bechinye, zwingaba zwibuyanana kuna iye kuti igwiyo igulwana lisungililwe munchibha uwe, eposelwe pasi mugungwa. 7 Lutaka kunyika pezhulu polukwejo lokuchinya! Nokuti zwinokwelela kuti lukwejo luzhe, koga lutaka kunoyo unhu, unobuza lukwejo!"

8 "Luboko lulwo kana igumbo lilyo zwikungwinisa muluchinyo, dumula ulashe, zwibuyanana kwauli kuti ungwine kubupenyu ulichilema kana kuti uligosha, pana kuti ulashilwe mumoto usinopela ulinamaboko mabili kana makumbo mabili. 9 Kana izhisho lilyo likungwinisa muluchinyo, libhise ulilashe, zwibuyanana kwauli kuti ungwine kubupenyu uli nezhisho limwempela chete, pana kuti uposelwe mumoto wegehena ulinamesho mabili."

10 Lingani kuti musilingilepasi umwe wabatukutuku yaba, nokuti ndinoti kwamuli, ingilozi jabo jikwo kudenga jinogala jibona chiso chaTate Bangu baiko kudenga. 11 *Nokuti Mwananhulumyana woNhu wakezha koochija balolashika.

12 "Motini imwi? Kana unhu eli nemhwizi izana, kova imwe yajo ilashika, aatosiya na jili makumi mashanu ana makumi mana neshanu nena jimo mumatunhu, enda kunopyanga yendiya yakalashika? 13 Kana akayiwana, chokomende, ndinoti kwamuli, unoshantilwa nayo kasa kupinda yeji makumi mashanu ana mana neshanu jinena jisakabalashika. 14 Nokudalo akutoba kuda kwaTate Bangu baiko kudenga kuti umwe wabatukutuku yaba epalale."

15 "Kana mwanakwaina uwo akuchinyila, inda unombuja paaleswa. Angokuwhilila, unobawana mwanakwaina uwo. 16 Koga kana esinokuwhilila, tola umwe kana babili, bende nawi kuti zwilebo zwose zwisimatijwe nabanhu babili kana batatu sabasumikiji. 17 Kana angolamba kubawhilila, ibuja beGubungano, angolamba kuwhilila beGubungano, untoleni sonhu wamusinani naye unanga sowokuzhe kana untelesi.

18 "Chokomende ndinoti kwamuli, Chose chamuchasunga pasi yopano, nokudenga chinooba chasungwa, nezwo zwamuchasungunula pasi yopano, nokudenga zwinooba zwasungunulwa neebo."

19 "Akale ndinoti kwamuli, kana babili bavumilana pasi yopano panachipi chabanokumbila, banoozwitilwa naTate Bangu baiko kudenga. 20 Nokuti panababili kana batatu bakabungana muzina lyangu, nami ndipo pakati pabo."

21 Pakalepo Pita wakoondila, akati kwaali, "Tezi, ndondekejela kujine kube lini mwanakwaina wangu unondichinyila? Biya ndundekejele kujine kube tushanu tuna tubili na?"

22 Jesu wakati kunaiye, "Andijikumuti kunawi, tushanu tuna tubili, koga makumi mashanu ana makumi mabili anokwilikanywa tushanu tuna tubili. 23 Nokudalo bushe bwedenga bungakwejaniswa sashe wakabeda kuziba kuti bashingi babe bakaba belina imalini iye. 24 Wakati atanga kubala imali jije, umwe wakabuzwa kunaiye wakabeli nechikwelete chikulwana*chezwiulu nezwiulu zwemali. 25 Nokuti wakaba esina imali yokulipa, nokudalo tezi uwe wakaleba kuti iye, unkaji uwe, bana babe bose, naizwo zwose zwaananazo zwitengeswe kutila kuti elipe chikwelete. 26 Unshingi wakawila pasi nezwivi akabweta eti, ‘Tezi nditileni moyo undefu nche, ndomulipa zwose.’ 27 Neshe, tezi bonshingi bakonsupula, bakondekejela chikwelete chiche."

28 "Koga unshingi wakaleyondiya wakati abhuda yopo, wakashangana noumwe unshingikwaina, wakabeli nechikwelete chiche chitukutuku chemali yamakobeli izana *yamadinali. Wankosina kangoto, eti, ‘Ndipe mali yangu!’ 29 Koga unshingikwaina uwe wakawila pasi, eti, ‘Ndakubweta, iba nomwoyo undefu nami, ndichamulipa.’ 30 Wakalamba, akanoumbiga muntolongo kuswikila alipa chikwelete chiche. 31 Bamwe bashingikwaina pabakabona zwaluba zwatikana, zwakabalwaja kasa, bakanobuja tezi wabo zwose zwakabatikana. 32 Kova tezi onshoba, akati kwaali, ‘Iwi nshingi unamwoyo umbi! ndakakulekejela chikwelete chose nokuti wakandibweta, 33 Aujakabekwelela, na kuti iwi utilebo unshingikwaina uwo ishe, sezwindakata pandakakutilabo ishe?’ 34 Mukulutila kasa tezi, wakompila mumaboko abashingi bomutolongo kuti boyangatise kuswikila alipa chikwelete chose.

35 "Neebo Tate Bangu bokudenga, banoomuta alo mose, umwe noumwe, kana musinolekejela banakwaina benu nemyoyo yenu."