1 Wakashoba balayijwa babe bali gumi nababili, akabapa isimba pezhulu pemipepo mibi kuti beibhise, nesimba lyokuchilisa bulwaji bwose bunonyaja mbili. 2 Mazina abapositoli baligumi nababili ndiwo yaya, wokutanga ndiSimoni unowhi Pita, naEndulu mwanakwaina uwe, Jemusi mwananhulumyana waZebhediya, naJoni ununa uwe, 3 naFilipu, naBhatilomeyo, naTomasi, naMateo untelesi, naJemusi mwananhulumyana waAlufiyasi, naTadeyusi, 4 naSimoni wamakatakata, naJudasi Sikaliyoti, wakacheta Jesu.

5 Yaba igumi nababili, Jesu wakabatuma, akabalaya eti, "Musinde pelyo naBokuzhe, musingwine muguta lyabaSamaliya, 6 Koga indani kumhwizi jakalashika bali baIzilayeli." 7 Pamunokwenda, bhaunulani muti, "Bushe bwedenga bwaba pelyo." 8 Chilisani banolwala, chenesani banamapelembuji, musani bakafa, mubhise madimoni nokuti yezwi mwakazwipiwa pesina indipo, namwibo zwipeni pachena. 9 Musinyamule indalama, isiliva, imhangula kana makobeli muhobhodo jenu, 10 musinyamule chikwama palwendo lwenu, zwimbalo zwibili, zwikwabaila, iswimbo, nokuti unshingi unokwelela kuwana indipo.

11 Lyose iguta, kana unsha wamunongwina, pyangani yopo palokwelela bwezi bwenu, mugale pakale kuswikila mwakwenda. 12 Pamunongwina mumba, bamuseni. 13 Kana ingumba ikakwelela, lunyalalo lwenu ngalube mukati, koga kana isilokwelela, lunyalalo lwenu ngalubwilile kunamwi. 14 Kana umwe esamutambula akale esinowhilila mawhi enu, kuhumulani ihuluba pamakumbo enu pamunobebhuda muneyo ingumba kana iguta. 15 Chokomende ndinoti kwamuli; Nezhuba lyontongo, inyika yeSodoma neGomola inoolelupilwa kupinda yelyo iguta.

16 Lingani, ndomutuma semhwizi mukati mwamapele, nokudalo chenjelani senyoka akale mube babuya senjiba. 17 Bachenjeleleni banhu, nokuti banoomusenga mbeli kwamakota, kova bemunabha mumasinagogo abo, 18 Munoosengwa kubatongi nokumashe pezhulu pangu, kuti mooba basumikiji kwabali nokuna Bokuzhe. 19 Kana bamusenga musizwinyaje kuti molebeleka chini, kana kuti monolebeleka mutini, nokuti panoyo nshaji munoopiwa zwamuchaleba, 20 nokuti amutoba imwi muchalebeleka, koga uMpepo waTate benu ndiye unoolebeleka nomunamwi.

21 Mwanakwaina unoopila mwanakwaina uwe kuti ebulayiwe, natate banoodalo kumwana wabo. Bana banoomukila bazwali babo nokubabulayisa. 22 Munoobengwa nabose pezhulu pezina lyangu, asi iye unooma akasima kuswikila kumapejelejo ndiye uchoochijwa. 23 Kana muyangatiswa muguta munalimwe iguta, tizhilani kunelimwe guta, chokomende, ndolebesa nditi kwamuli, "Amutoopeja kungwina mumakuta ose omuIzilayeli esanu aswika Mwananhulumyana woNhu."

24 Undayijwa aangabe pezhulu pondayiji uwe, kana nshingi kuba pezhulu patezi uwe. 25 Zwilokwana kuti undayijwa ebe sondayiji uwe, nonshingi ebe satezi uwe. Kana beshoba mweni wengumba beti ndiBheluzabheli, namwibo banomulebela bubi bukulwana imwi bengumba iye.

26 "Nokudalo lekani kubatya, nokuti apana zwilofumikwa zwichoolekwa kuti zwibhiswe pachena, kana zwilosisika zwichooleka kuzibwa, 27 Zwandinomubuja munhilima, zwilebeni pachena, zwamunowha benyebeza, zwilebeni mulipezhulu pedenga lyengumba. 28 Musitye yabo banobulaya umbili koga besinotubula kubulaya umpepo, asi ityani kasa yoyo unamasimba okupalaja umpepo nombili mugehena, 29 Tutiti tubili atutotengeswa nepeni na? Koga apana kangawila pasi Tate benu besinoda. 30 Koga nevuji lyose lyomunsholo mwenu lilobalwa, 31 Nokudalo musitye, imwi mulokosha kupinda tutiti tunji.

32 "Akale unhuwose unondipupula pambeli pabanhu, namibo ndinoompupula pambeli paTate bangu baiko kudenga. 33 Asi wose unondilamba pambeli pabanhu, namibo ndinoondamba pambeli paTate bangu baiko kudenga.

34 "Musiyeye kuti ndakezha kwobuza lunyalalo penyika, andijakezha kwobuza lunyalalo, koga igwalabaza. 35 Nokuti ndakezha koopambulanya mwananhululumyana natate babe, mwananhukajana namai babe, nonkajiwomwana namezwale babe. 36 Babengi bonhu banobeli yabo bemhuli yiye.

37 "Iye unoda tate babe namai babe kupinda imi, aajilokwelela kuba wangu, neebo iye unoda mwananhulumyana uwe, kana mwananhukajana uwe, kupinda imi, aajilokwelela kuba wangu. 38 Aani nani usinotola unchinjikwa uwe enditobele, aajilokwelela kuba wangu. 39 Yoyo unowana bupenyu bubwe, bunoondashikila, koga aani nani unolashikilwa nobupenyu bubwe pezhulu pangu, unoobuwana.

40 "Iye unomutambula, unobetambula imi, neebo iye unotambula imi unotambula iye wakandituma. 41 Iye unotambula umpolofeti nokuti umpolofeti, unoopiwa indipo yompolofeti, nooyo unotambula unhu wakalulama nokuti unhu ulolulama, unoopiwa indipo yonhu wakalulama. 42 Wose unhu unopa unkombe wevula inotonhola kunomwe wabatukutuku yaba pezhulu pokuti undayijwa wangu, chokomende, ndinoti kwamuli aatoyishayiwa indipo iye."