1 Mushule mwamazhuba mashanu ana limwempela Jesu wakatola Pita, naJemusi, naJoni unhu nonuna, akatanha nabo idunhu ilefu beli boga. 2 Wakashandulwa chimo mbeli kwabo, chiso chiche chakapenya sezhuba, zwimbalo zwizwe zwakachena solupenyo. 3 Akale ilingani kwakaboneka kwabali Mozesi naElija belebeleka naye. 4 Akale Pita wakati kuna Jesu, "Tezi, zwibuya kuti tipo yopano, kana chilichido chenu, ndobaka zwitumba zwitatu yopano, chimwe chicho, chimwe chaMozesi, akale nechimwe chaElija."

5 Echinolebeleka kwakaswika igole linopenya likabafukija, akale iwhi linova mugole lyakati, "Yoyu Mwananhulumyana wangu unodikanwa, unondishantisa kasa, unwhilileni."

6 Balayijwa pabakawha yezwi, bakawila pasi bekatibhama belizhele lutyo. 7 Koga Jesu wakabandila akabaguma, akati, "Nyamukani, musibe nolutyo." 8 Pabakanyamula misholo yabo, abajakabona umwe unhu kuzhe kwaJesu ega.

9 Pabakabebhuluka idunhu, Jesu wakabalaya eti, "Musibuje unhu zwamwabona, kuswikila Mwananhulumyana woNhu amuka kubafi."

10 Balayijwa bakombhuza, beti, "Ani banolebani bakwali bomulawo kana beti, ‘Elija unokwelela kuzha kutanga?’ "

11 Wakashandula eti, "Elija unoozha, akale unoobwiliza zwinhu zwose muzwakabeli, 12 koga ndomubuja kuti Elija wakezha kale, akale ibo abajakonziba, koga bakata paali zwose zwibakabeda. Sezwo akale Mwananhulumyana woNhu unoojiila mumaboko abo."

13 Ndipo balayijwa pabakawhisisa kuti wakabeleba Joni uMbhabhatizi.

14 Pabakaswika pakabeli nebunga lyabanhu, unhulume wakezha akafhigama mbeli kukwe akati, 15 "Tezi, unwhileni ishe mwananhulumyana wangu, nokuti una zwisuntu akale umuyabula kasa, tunjinji unosowila mumoto kana muvula. 16 Akale ndombuza kubalayijwa babo, koga abajatubula kuunchilisa."

17 Jesu wakashandula, eti, "A! Chizekulu chisinodimbwa chinaluchinyo, ndooba namwi kuswikila lini? Kuswikila lini ndimutila moyo ndefu? Umbuzeni yokuno kunami." 18 Jesu wakalikalalila idimoni, likabhuda mwaali umbiseni, akale akava achila pakalepo.

19 Kova balayijwa bezha kunaJesu beli boga, beti, "Ani isu ini zwakoneja kuti tilibhise?"

20 Wakati kwabali, "Nokuti kudimbwa kwenu kushoma. Chokomende ndinoti kwamuli, mungoba nokudimbwa kunanga semhuji yemasitadi, mungati kudunhu yeli, ‘Ibhuda yopa, unde yokuya,’ linova lyenda, apana chichamukona." 21 *Koga unshobo yoyu autobhuda, kuzhe komunamato nokuzwiminya kulya.

22 Bekabungana muGalili, Jesu wakati kwabali, "Mwananhulumyana woNhu unoopilwa mumaboko abanhu, 23 akale banoombulaya, kova emuswa nezhuba lyatatu."

Ibo bakanyajikana nazwo.

24 Pabakaswika kuKapenaume, batelesi bomutelo wetempeli bakezha kunaPita, bakati, "Undayiji wenu unobhisa mutelo na"

25 Wakati, "Eya."

Paakezha kusha, Jesu ndiye wakatanga kulebeleka naye, eti "Umuyeyani, Simoni? Mashe enyika anolipisa aani untelo? Bana babo kana bamwe?"

26 Akale paakati kuna iye, "Kunabamwe,"

Jesu wakati kuna iye, "Nokudalo banabanhulumyana balosungunuka. 27 Nokudalo, kuti tisibanyemeje, inda kugungwa, upose kalozo, utole ihobe ichatanga kubhatwa, ungoyishamula undomo wayo unowana ikobeli lilokosha, ulitole ubape libe indipo yangu nawi."