Kungwina kokuzunda muJelusalema
1 Pabakati baba pelyo neJelusalema, akale bakaswika kuguta lyeBhetifaji, lipo pedunhu lyamaOlivi, pakalepo Jesu wakatuma balayijwa babili, 2 eti kwabali, "Indani munsha ulolingana namwi, mowana idonki lilosungililwa, lili nomwana walyo, muasupule, muabuze kwandili. 3 Kana pelina uchalebeleka namwi chimwe chinhu, moti, ‘She unoada,’ akale iye unoatumija pakalepo."
4 Yechi chakatikana kuti kuzhajikijwe zwakalebwa nompolofeti, eti,
5 "Ibuja, mwananhukajana weZiyoni,
Ilinga, She uwo ukumuzha kwauli,
Akazwininipisa, ekatanha idonki,
eli pezhulu pomwana wedonki."
6 Balayijwa bakenda akale bakanota sokulaywa kwabo naJesu, 7 bakabuza idonki nomwana walyo, akale bakawala ishashiko jabo pezhulu pawo, akagala pezhulu pajo. 8 Bunji bwebunga bwakawala ishashiko jabo mungwagwa, bamwe bakatema inhabi jemiti bakawala mungwagwa beuntambula. 9 Akale ibunga lyakabekwenda lili mbeli kukwe nelyakabeli mushule lilye bakabeshomeja, beti, "Hosana kuMwananhulumyana waDavidi! Ulokombolelwa iye unozha muzina lyaTezi! Hosana upezhuluzhulu!"