Hibruw 9

Nakavanan tam̄ag mōl vayēg ige Juw so lep van nolol m̄adeg Litiy Ēm̄ Bolol non Ḡod

1 Hēywē, nakavanan tam̄ag mōlvayēg so nēm̄ yon̄ aē lemyam gōh mey a nēm̄ tēvēlgapye, wa tō so ige Juw taqlun̄ goy Ḡod qeleave. 2 Ige tam̄ag mētēymat nahye olol qelegēn. Kēy migilgeg nēm̄ tēvēlgapye vitwag a nidinlat aē vōyō. Nidin mey am̄ag en, kēy ōl so Mahē Yon̄. Lidin gōh, nuqul vitwag aē, nolta, wa nēbrēyt vawē. 3 Tō kēy midin goy nidin gōh mi namalmal vitwag. Tō tekel malmal en, nidin vōyō negi a kēy ōl so Mahē Yon̄ a Noyon̄. 4 Hay lelo din gōh en, nolta vitwag aē wa nabakōs ne kavanan. Nolta nan bihilhil tēnge qōnqōn. Kēy mak nolta nan mi nōḡōl.

Nabakōs yon̄, kēy nuqul walēg mi nōḡōl. Ba hay lelo bakōs nan en nage vētēl alon. Vitwag natbey a mak mi nōḡōl ba namana nahag alon.*9:4 namana nahag alon. Namana nan en, kē negengen vitwag mey a Ḡod melep van hiy ige Juw vel qōn̄ mahē a kēy mavanvan walēg lepnō vadalm̄eg. Exodus 16:31-35 Vōyō negi en, nēqētōwtōw non Aron mey a nakaskas mataw den.✝9:4 Numbers 17:8-11 Tō vētēl negi nan nevet teqetqen̄ a mayap Nele non Ḡod apwon.✝9:4 Deuteronomy 10:1-5, Exodus 25:16 5 Apwo bakōs yon̄ nan en, nototgal vōyō qeleso nin̄sel a kēy mitin̄ mi nōḡōl. Kōyō aklō me nēlēn̄as non Ḡod, ba namneyō nemelmelgoy namte bakōs nan. Kēy ōl namte bakōs nan natno dēmveteg bug. Ba gēn tit vasemlō qēt vēhte qiyig vel haphap del anen.