Atos 10

Emwɛn e Kooneye

1 Ke bviil li Sedzale, éli ye bɔɔl ngɔmɔ̃ wɛn nkuũ Kooneye. Ndɛ áli mbiri a ambwel-mbwel ba Lom b’onse nkel yi ata m’ambwel-mbwel b’ɔ̃kiri wu Itali. 2 Ye baal a nzɔ a ndɛ bam bueel, ndɛ ákelweel Nziã, bvool ákuru nzuru me ndɛ. Ndɛ ákesa ãndɔɔ m’asio baal nyiĩ. Ndɛ hɛ̃ ákebuɛɛn Nziã lio bwɛn a lio. 3 Tsoo ngelemɔ̃, sua lio li ãtyel ŋ’emeebɔɔn tal, onse emwɛn, ndɛ omwɛn ãnzwel ã Nziã ngãmɔ̃ kal-a-kal ãsam onse nzɔ a ndɛ, bu ãti ndɛ mbel ndiri: «Kooneye!» 4 Ndɛ olɔ ãnzwel etɔ, ebangɛɛ ebɔɔ ndɛ, ndɛ bu afuul mɔ̃ ndiri: «Emã, Mfam?» Ãnzwel ãbveel ndɛ bubu: «Ãbuɛɛn ã yɛ y’ãndɔɔ m’esio yɛ baal nyiĩ ãtɔ ola Nziã. Ndɛ hɛ̃ k’adzɛɛn yɛ wɛ. 5 Meba ŋã, yuɔɔl baal ke Dzope ayeta Simɔ̃ wu abeta me Piɛɛl mbel. 6 Ndɛ oli lɔɔ ke nzɔ a mbuul ngɔmɔ̃ wɛn nkuũ hɛ̃ Simɔ̃, wu abefaal ebaan bvi anyam. Nzɔ a ndɛ eli nku-a-nku ãdza m’ɔ̃ngwa.»

7 Ŋ’eyɛn ãnzwel m’ã́keyɛɛn ye Kooneye, ndɛ oti asal a ndɛ buaal ye ngɔmɔ̃ wu ákuru nzuru me ndɛ onse ambwel-mbwel a ndɛ mbel. 8 Ke mbee a ŋ’eyɛɛn ndɛ bɔ ãndɔɔ mam mbueel m’ãbwel, ndɛ otam bɔ Dzope.

Emwɛn e Piɛɛl

9 Ela esiool, asal ange-buaal ye mbwel-mbwel b’éyuɔɔl Kooneye kɛn áli me nkuul. Ŋ’eyii bɔ tsotsoo ye bviil li Dzope, sua tal dzu, Piɛɛl onɔɔn nkal a sɛɛ e nzɔ li pɛɛl, me ndɔɔ yi abuɛɛn. 10 Ndɛ nzal ewel, bu ayii adzii k’adza. Me lio li ákelaan ndɛ bvi-odza, ndɛ obɔɔ emwɛn. 11 Onse emwɛn olɔ, ywel edzweel nzuru, ndɛ omwɛn eluɔ ngemɔ̃ onge ekɔ ki enɛn ki asiin k’ãnswɛ ãnge-ãnã esool tiil nsie. 12 Onse mwiĩ a eluɔ okyɛ, éli y’anyam b’ɛ̃mpal ɛ̃nã, ye b’adzuu me bal-a-bal, y’anywɛn. 13 Nkii ngamɔ̃ eyɛɛn ndɛ bubu: «Piɛɛl, tɛɛn, bam bvool dza!» 14 Piɛɛl obveel ndiri: «Hɛɛ̃-hɛ̃, Mfam! Lɔɔ-okal, mɛ̃ kɛn a nzi eluɔ ki eluo ngel a bee b’Ayuda, ki ye mbiin wɛ.»✝10.14 Lev 11 15 Nkii oyɔ eyɛɛn ye ndɛ nsa yi yuaal ndiri: «Eluɔ ki elieel Nziã ndiri eli tsɛtsɛ, oyɛɛ ke wal kyɛ onge ki ye mbiin wɛ.» 16 Esi obobɔ nsa tyel. Ke mbee oŋɔ̃, andɛɛl eluɔ okyɛ ebvool ywel.

17 Piɛɛl ãyal ãfi, ndɛ oyii abii otsɛn b’ãndɔɔ m’emwɛn ndɛ, kɛn a me lio olɔ, antam b’eyuɔɔl Kooneye atɔ k’ɔ̃nywã a nzɔ, ke mbee a ŋ’emeefuul bɔ mboo yi eli nzɔ a Simɔ̃. 18 Bɔ abiool, bvool afuul okɛɛn lɔɔ e Simɔ̃ wu ata me Piɛɛl eli oŋɔ̃. 19 Onge bɛn Piɛɛl áketsam me ndɔɔ otsɛn b’emwɛn olɔ, Ɔ̃fel a Nziã olieel ndɛ ndiri: «Tal, baal atyel afuul yɛ. 20 Sool, yi ye bɔ, oyɛɛ ke sa ãnkɛn wɛ, ke ngwel wɛ mɛ̃ mbuul wu ngyuɔɔl bɔ.» 21 Piɛɛl osool, oyɛɛn ye baal obɔ bubu: «Wu ebebii byɛ mɛ̃. Ndɔɔ mã yi eyi byɛ?» 22 Bɔ abveel ndɛ ndiri: «Wu otam bee Kooneye wu oli mbiri a ambwel-mbwel ɔ̃nkam wa Lom. Ndɛ oli mbuul wa dzu, ndɛ abelweel Nziã. Ayuda bueel abeyɛɛn obvɛ me ndɛ. Ãnzwel ã Nziã ngãmɔ̃ ãyɛɛn ndɛ ndiri ata yɛ mbel ke nzɔ a ndɛ, kwɛn oŋɔ̃ ndɛ ayoo b’eyɛɛn yɛ ndɛ.» 23 Obobɔ, ndɛ oswɛɛl bɔ onse nzɔ, bvool ofaal bɔ mboo yi ala twal.

Ela esiool, Piɛɛl otɛɛn oyɛn ye bɔ. Andoo ke kwɛ ba Dzope ayesuul ndɛ. 24 Ke mbee a tsoo ngelemɔ̃, ndɛ otɔ Sedzale. Kooneye ákedzel ndɛ, ndɛ ábvool eburu e ndɛ y’andoo a ndɛ b’ɔ̃kwal. 25 Ŋ’etɔ Piɛɛl, Kooneye wu oyeyɔɔ ndɛ, opfɔɔn tiil obvi ãbuo ke nkwel a ndɛ. 26 Kɛn a Piɛɛl otɛɛl ndɛ y’ayɛɛn m’ɔ̃nywã ndiri: «Tɛɛn, mɛ̃ hɛ̃ kɛn a mbuul ndi!» 27 Ŋ’ékesam Piɛɛl onse nzɔ, ndɛ áketa ɔ̃sam ye Kooneye. Ndɛ oyebɔɔ baal bibi amaabvɔɔn.

28 Ndɛ olieel bɔ bubu: «Byam eyɛɛ wɛn ãngel ã bee b’Ayuda ãluo Ɔ̃yuda k’akal mboo mɔ̃ ye mbuul wɛn k’Ɔ̃yuda wɛ, wuo k’asam onse nzɔ a ndɛ. Kɛn a Nziã osuo mɛ̃ kwɛn mɛ̃ ke nkoo k’ewal mbuul si ngɔmɔ̃ onge wa ye mbiin wɛ, mɛ̃ hɛ̃ ke nkoo k’ebee k’ekal mboo mɔ̃ ye ndɛ wɛ. 29 Obɔ otsɛn bɛn, ŋ’etam byɛ mɛ̃ mbel ota, mɛ̃ k’esi ãnkɛn wɛ, bu ngyi. Oŋɔ̃ emeeyɛɛn mɛ̃ otsɛn b’etam byɛ mɛ̃ owal.»

30 Kooneye obveel Piɛɛl bubu: «Nonɔ̃ ãtsoo ãyii ãnã, mɛ̃ ekebuɛɛn onse nzɔ a mɛ̃, me lio li ãtyel ŋ’emeebɔɔn tal. Enseel oŋɔ̃, mbuul ngɔmɔ̃ wu alaal ekɔ bvi engal opal ke nkwel a mɛ̃. 31 Ndɛ olieel mɛ̃ bubu: "Kooneye, Nziã okiool ãbuɛɛn ã yɛ. Ndɛ hɛ̃ oyeel ãndɔɔ m’ebesio ye baal nyiĩ. 32 Oŋɔ̃ yuɔɔl baal ke Dzope ayeta Simɔ̃ wu abeta me Piɛɛl mbel. Ndɛ oli lɔɔ ke nzɔ a mbuul ngɔmɔ̃ wɛn nkuũ hɛ̃ Simɔ̃, wu abefaal ebaan bvi anyam. Nzɔ a ndɛ eli nku-a-nku ãdza m’ɔ̃ngwa." 33 Kɛn alili oŋɔ̃, mɛ̃ ntam yɛ owal. Yɛ si ngesɛ ŋ’eyi yɛ. Meba ŋã, bia-byɛ bueel eli ke nkwel a Nziã, me ndɔɔ yi eyoo mam mbueel m’etam Mfam yɛ oyɛɛn.»

Ãtee ã Piɛɛl onse nzɔ a Kooneye

34 Obobɔ, Piɛɛl ayebvuru oyɛɛn, olieel bubu: «Taa-taa bam, mɛ̃ ŋe ngyɛɛ kwɛn Nziã k’ali y’ɔ̃bɛɛ wɛ. 35 Kɛn a m’ɛ̃kiri mvieel, mbuul ndyam wueel wu alweel Nziã, bvool asa ãndɔɔ mã dzu, ndɛ asa Nziã esɛ. 36 Nziã oyuɔɔl Endɔɔ e ndɛ ola baal b’Isalayel, m’otsal o bɔ Nsia yi Ngesɛ yi etal opi b’abɔɔ me Yeso Mãsia. Ndɛ wu Yeso Mãsia oli Mfam a baal bam bueel. 37 Byɛ bam eyɛɛ m’ãbwel, bɛɛn ke Ngalile bvool ye Yude wueel, ke mbee a ŋ’éketa Dzaã baal mbel k’ayewal opongo. 38 Byɛ eyɛɛ kwɛn Nziã áluul Yeso wa Nadzalet m’Ɔ̃fel ye waan e ndɛ. M’ãmboo mbueel m’ékebwel ndɛ wu Yeso, ndɛ ákesa baal obvɛ, bvool ákebvuul baal bam bueel b’éketuaal ɔ̃pfu mpal. Ke ngwel wɛ, Nziã áli ye ndɛ. 39 Bee eli baal b’émwɛn ãndɔɔ mam mbueel m’ési ndɛ k’ɔ̃kiri wu Ayuda, bvool ke Yelusalem. Ndɛ wu ébam bɔ, ŋ’ébɛɛl bɔ ndɛ m’ɔ̃ti. 40 Kɛn a Nziã áseel ndɛ me tsoo li ãtyel. Ndɛ áwi ndɛ nkuul yi apal ola baal. 41 Ndɛ k’ápal ola baal bam bueel wɛ, kɛn ola bee b’etsɔɔn ésueel Nziã k’ekal baal b’amwɛn ndɛ, bee b’édzi bvool énywi ye ndɛ, ke mbee a ŋ’ésiool ndɛ onse b’ákwi-ákwi. 42 Ndɛ átam bee k’eyɛɛn baal ndiri ndɛ oli mbuul wu ésueel Nziã me ndɔɔ yi atsiil ãndɔɔ ã baal b’amwiĩ-mwiĩ ye b’ákwi-ákwi. 43 Aliaal-ɛ̃kiɛɛn a Nziã bam bueel áyɛɛn me ndɔɔ a ndɛ, ndiri: "Mbuul ndyam wueel wu akiool ndɛ abɔɔ odzeel b’ãbi me nkuũ a ndɛ."»

Baal bɛn k’Ayuda wɛ ayɔɔ Ɔ̃fel wu Ɔ̃nsensal

44 Piɛɛl kɛn oyɛɛn m’ɔ̃nywã, Ɔ̃fel wu Ɔ̃nsensal osool nkal a baal bam bueel b’ákeyoo Endɔɔ e Nziã. 45 Akiool bam bueel b’áli Ayuda b’áyi ye Piɛɛl ɛ̃kam ɛ̃si bɔ myam bibi, ŋ’emwɛn bɔ kwɛn Nziã okab Ɔ̃fel wu Ɔ̃nsensal me baal bɛn k’áli Ayuda wɛ. 46 Ke ngwel wɛ, bɔ ákeyoo baal obɔ ákeyɛɛn ɛ̃nywã ɛ̃kyam, bvool ákelweel Nziã. Obobɔ, Piɛɛl oyɛɛn bubu: 47 «Baal ba amaayɔɔ Ɔ̃fel wu Ɔ̃nsensal onge bia-byɛ, mbuul nã wu okoo k’aluo k’apongo bɔ m’ãdza?» 48 Piɛɛl bu atam k’apongo bɔ me nkuũ a Yeso Mãsia. Ke mbee oŋɔ̃, bɔ aluɔɔn ndɛ k’akal ãtsoo ke kwɛ ye bɔ.