1 Pool otɔ Dɛɛbe, ke mbee oŋɔ̃ ndɛ oyɛn Lisitele. Oŋɔ̃ éli y’ɔ̃yio ngɔmɔ̃ wɛn nkuũ Timote. Ngoo a ndɛ áli Ɔ̃yuda wu áyii ɔ̃kiool, kɛn a tal a ndɛ áli Ɔ̃gelek. 2 Andoo a dzii ba Lisitele ye b’Ikonihum ákeyɛɛn obvɛ bibi me ndɔɔ a ndɛ. 3 Pool ákedzii k’abiri ndɛ. Ndɛ owel ndɛ, otsiil ndɛ nzuru me ndɔɔ Ayuda b’áli m’etswi e nsie obvɛ, ke ngwel wɛ bueel áyɛɛ kwɛn tal a ndɛ áli Ɔ̃gelek. 4 Onse ãbviil mbueel m’ékebwel Pool ye Silas, bɔ ákeliaal akiool ãndɔɔ m’ékuru antam y’akuul-kuul a Yelusalem, bvool áketam bɔ mɔ̃ osa. 5 Ãbvɔɔn ãkewam onse okiool, bvool ɔ̃bvɛn wu akiool ákelɔɔ tsoo bwɛn a tsoo.

6 Ɔ̃fel wu Ɔ̃nsensal oluo Pool ye Silas k’atsal Nsia a Nziã onse etswi e nsie ki Adzi. Obobɔ, bɔ abwel ke Filidzi ye Ngalati. 7 Ŋ’etɔ bɔ tsotsoo a Midzi, bɔ abɔɔ ãtsam m’ayi Bitini. Kɛn oŋɔ̃ bvool, Ɔ̃fel a Yeso k’awi bɔ nkuul wɛ. 8 Obɔ otsɛn bɛn bɔ atsiil Midzi, bu ayɛn buu li Telohas. 9 Me tsia ngɔmɔ̃, Pool olueel ɔ̃tswɛ a twal, ndɛ omwɛn ɔ̃fi-Maseduaan ngɔmɔ̃ tɛ ke nkwel a ndɛ, ákeluɔɔn ndɛ bubu: «Bwel ke Maseduaan, bvool y’awuaal a bee!» 10 Ke mbee emwɛn olɔ, bee*16.10 Yi-bu mboo yɛn Luk wu ákel ɔ̃nkaan wu, áyebvɔɔn ye Pool me ndɔɔ yi ayesuul ndɛ ke dzwɛ. eyii ebii k’eyi Maseduaan, ke ngwel wɛ bee éli y’okiool wɛn Nziã ŋ’ati bee mbel me ndɔɔ yi eyetsal Nsia yi Ngesɛ okɔ.

11 Bee esam ãsua ke Telohas, bu eyɛn nzu-tɛ k’esanga ki Samotelase. Ŋ’etsi bviil, bee eyɛn Nehapolis. 12 Embal oŋɔ̃, bee eyɛn bviil li Filipese. Bviil olɔ eli li ɛ̃kwel li nsie yi Maseduaan, bvool eli ke nsɛn okwɛn o Lom. Bee esi ãtsoo ke kwɛ onse lɔ.

13 Me tsoo li saba, bee epal onse bviil me ndɔɔ yi eyi nku-a-nku a mvieel. Ke ngwel wɛ, bee éketsam wɛn okɔ ol’ekal ye mboo ãbuɛɛn m’Ayuda. Bee ebvi nsɛn, bu ebvi ɔ̃sam ota y’akaal b’ábvɔɔn ke mboo oyɔ. 14 Ngɔmɔ̃ onse akaal obɔ wɛn nkuũ Lidi, áli ɔ̃fi-bviil li Tiatiil. Ndɛ áketiɔ ankaã b’abvɛ-a-bvɛ b’abɛbɛ, bvool ákelweel Nziã. Ndɛ ákeyoo bee. Mfam odzweel ɔ̃kwal a ndɛ kwɛn ndɛ akal y’onkyab onse ãndɔɔ m’ékeyɛɛn Pool. 15 Ndɛ owel opongo ye yam e ndɛ lueel, ke mbee oŋɔ̃ ndɛ oti bee mbel ndiri: «Okɛɛn byɛ emwɛn wɛn taa-taa mɛ̃ nkiool Mfam, oŋɔ̃ eyebuo lɔɔ ola mɛ̃.» Ndɛ bu aywɛɛn bee k’ekiool.

16 Tsoo ngelemɔ̃, bee ékeyi mboo a ãbuɛɛn. Ɔ̃sal ngɔmɔ̃ wu ɔ̃kaal oyemwɛɛn ye bee. Ndɛ áli y’ɔ̃fel wu ɔ̃bi-ɔ̃bi wu ákesa kwɛn ndɛ ayɛɛn baal ãndɔɔ m’ãya. Amfam a ndɛ ákebɔɔ nzi bibi m’ãndɔɔ omɔ̃. 17 Ndɛ ákenɔɔn a bee, bee ye Pool, ákebiool ndiri: «Baal ba ali asal a Nziã-a-Mpuu! Bɔ asuo byɛ nkuul yi abɔɔ obvuul!» 18 Onge bɛn ndɛ ákesa obobɔ ãtsoo bibi, Pool oyi mpuru, okɔɔl, bu alieel ɔ̃fel ondɛ bubu: «Me nkuũ a Yeso Mãsia, mɛ̃ ntam yɛ wɛn pal onse ndɛ!» Ɛ̃kiri-anka oŋɔ̃, ɔ̃fel opal.

19 Ŋ’emwɛn amfam a ndɛ kwɛn kaã e bɔ li éketwal bɔ bvel me ndɛ ŋ’efi, bɔ asiin Pool ye Silas, bu abiri bɔ ke mbal ol’amfam. 20 Bɔ abiri bɔ ol’antwel a Lom, ndiri: «Baal ba ali Ayuda b’abelɔ tsungaa onse bviil e bia-byɛ, 21 bvool abeyiool onkɔɔ bɛn k’awi bia-byɛ ba ke nsie a Lom nkuul yi ekiool wuo yi enɔɔn wɛ.»

22 Embuul bu eyiool hɛ̃ nkal a Pool ye Silas. Antwel atswi bɔ ekɔ, bu atam ndiri apfel bɔ ɔ̃dzii. 23 Ke mbee a ŋ’epfel bɔ bɔ ɔ̃dzii wa kokɔ, bɔ atyel bɔ me bwal, bu atam ɔ̃nkiaal a bwal k’atal bɔ ngesɛ. 24 Ŋ’eyoo ɔ̃nkiaal a bwal ontam obɔ, ndɛ oyewɔɔl bɔ onse etswi e bwal ki ke ntɔ, bu akuru bɔ ntaã me nkwii. 25 Ŋ’eyii sua kuku, Pool ye Silas ákebuɛɛn bvool ákeyam m’olweel o Nziã, baal a bwal b’asiil ákeyoo bɔ. 26 Enseel oŋɔ̃, nsie enziool nzuru yam kokɔ, onziool obɔ osiɔ etsɛn bvi ebɔɔ e nzɔ a bwal. Ɛ̃nywã ɛ̃ nzɔ mvieel bu ɛ̃dzweel nzuru alili oŋɔ̃, bvool ãmpaa ã baal a bwal bueel ãpiool. 27 Ɔ̃nkiaal a bwal odzam me twal. Ŋ’emwɛn ndɛ kwɛn ɛ̃nywã ɛ̃ bwal ɛ̃mɛɛ̃dzweel nzuru, ndɛ odzuru epwel e ndɛ m’obam o nzuru, ke ngwel wɛ ndɛ áketsam ndiri baal a bwal ŋ’amaabal. 28 Pool bu abiool bam kokɔ ndiri: «Bee nzuru obi osa, bee bueel eli ŋã!»

29 Ɔ̃nkiaal a bwal osɔɔ mbunda, bu asam bam onse bwal ye nkaã, y’etiɔɔl e buɔ lueel, ndɛ otyel nzuru ke ntaã e Pool ye Silas. 30 Ke mbee oŋɔ̃, ndɛ opaal bɔ, bu afuul bɔ bubu: «Abetaal, ki esa mɛ̃ emã, me ndɔɔ yi ebvuul?» 31 Bɔ abveel ndɛ bubu: «Kiool Mfam Yeso, obobɔ yɛ àbvuul, yɛ ye baal a nzɔ a yɛ.» 32 Bɔ bu atee ndɛ Endɔɔ e Mfam, ndɛ ye baal bueel b’ákekal onse nzɔ a ndɛ. 33 Kɛn a me lio alili nkal a kuku, ndɛ obiri bɔ me ndɔɔ yi asuɔɔl bɔ ãbwɔɔ. Ndɛ owel opongo alili oŋɔ̃, ye baal a ndɛ bueel. 34 Ndɛ obiri Pool ye Silas ke nzɔ a ndɛ, bu awi bɔ bvi-odza. Ndɛ osia mpaa, ndɛ ye baal a ndɛ bueel, me ndɔɔ yi akiool Nziã.

35 Ŋ’etsi bviil, antwel a Lom ayuɔɔl baal ayeyɛɛn ɔ̃nkiaal a bwal ndiri: «Paal baal obɔ!» 36 Ndɛ oyeliaal Pool ndiri: «Antwel atam ndiri epaal byɛ. Meba ŋã, byɛ ekoo m’opal bvool ekoo m’oyi onse opi.» 37 Pool obveel bɔ bubu: «Bɔ atam k’abɛɛl bee ke nkwel a baal bueel, k’atsiil ndɔɔ a bee kɛn wɛ! Kwɛn ŋɛn bee baal a Lom! Bɔ atyel bee me bwal. Bvool meba ŋã, bɔ ayii adzii k’apaal bee m’edziɔɔn? Mfya! Bam aya ayepaal bee!» 38 Antam a mbal ayeyɛɛn ãndɔɔ omɔ̃ ol’antwel a Lom. Bɔ ayoo buɔ ŋ’eyɛɛ bɔ kwɛn Pool ye Silas baal a Lom ali. 39 Bɔ ayesɔɔ bɔ odzeel, apaal bɔ onse bwal, y’ãyɛɛn m’ɔ̃nywã ndiri apal onse bviil. 40 Ŋ’epal Pool ye Silas onse bwal, bɔ ayɛn ola Lidi. Bɔ amwɛɛn y’andoo a dzii, awi bɔ mpɛn, bu ayɛn.