1 Ŋ’ákuru wɛn ebvaan bee eyi Itali, awi Pool ye baal a bwal akyam ke kwɛ me mviɔɔl ɛ̃ mbiri a ambwel-mbwel ngɔmɔ̃ wɛn nkuũ Dzulihus, wa nkel yi ɔ̃kwɛn wu ɔ̃nɛn Oguste. 2 Bee eyesam onse ãsua mã bviil li Adalamite, m’ã́keyi ãbuu mã nsie yi Adzi, bu eyɛn. Alisitaake wu ɔ̃fi-Maseduaan wa bviil li Tesalonik, áli ye bee.

3 Ela esiool, bee etɔ Sidɔ̃. Onge bɛn Dzulihus ási Pool obvɛ, ndɛ owi ndɛ nkuul yi ayetal andoo a ndɛ b’oŋɔ̃, kwɛn bɔ awuaal a ndɛ. 4 Bee embal oŋɔ̃ m’ãsua, bu eyɛn nku-a-nku esanga ki Swipele, me ndɔɔ yɛn amfel ákebveel bee mbee. 5 Ŋ’etsiil bee ãdza m’ɔ̃ngwa mã tsotsoo a nsie yi Silisi ye yi Pamfili, bee etɔ Mila, ke Lisi. 6 Oŋɔ̃, mbiri a ambwel-mbwel obɔɔ ãsua mã bviil li Alekesandele m’ã́keyi Itali. Ndɛ oswɛɛl bee onse mɔ̃.

7 Ãtsoo bibi, bee ékeyi m’ɔ̃kwal m’ɔ̃kwal, bu eyetɔ bviil li Kinide ye fool lam bibi. Kɛn a mfel k’ákewa bee nkuul yi eyi nkwel m’olɔ wɛ. Obobɔ, bee ebwel me li esanga ki Kelete, sua Salomone. 8 Bee esyel nkwel onse fool lam bibi, bu etɔ mboo yi ata m'«Ãbuu m’ãbvɛ», tsotsoo a bviil li Lasee.

9 Onge bɛn bee lio ebwel lam bibi, bee k’ebekoo k’enɔɔn a nkuul a bee wɛ: Dzwɛ al’eyii ye fool lam bibi, bvool eyii ebii epfu e baal. Tsoo li abesa ãbuɛɛn mã me nzal* al’emeebwel. Pool bu awi baal ãnkunkwa bubu: 10 «Andoo a mɛ̃, mɛ̃ mwɛn wɛn dzwɛ li ãsua li k’èywɛn a mpal wɛ, ekal me ndɔɔ ãsua mam, ekal me ndɔɔ a eluɔ bvi obɔɔ̃, onkyam me ndɔɔ a bia-byam.» 11 Kɛn a mbiri k’áketa kaã m’ãyɛɛn ã Pool wɛ, ndɛ éketa kaã me wu ákedzoo ãsua ye nga-mɔ̃. 12 Ndɔɔ yinkyɛ yɛn, onge bɛn buu k’ébvaan m’obwel b’ɔ̃bvu wa mfyɛ oŋɔ̃ wɛ, baal bibi onse ãsua akuru k’ambal oŋɔ̃. Bɔ ákebii k’atɔ buu ngelemɔ̃ li Kelete li ata me Fenikese, m’etswi ki edziin tal, kwɛn ɔ̃bvu wa mfyɛ abwel bɔ okɔ.

13 Emfe-mfel ki efa etswi ki nsɛn ebvi opob, baal b’ãsua abvi otsam ndiri bɔ ol’asi m’éwɛɛ bɔ. Bɔ bu ayɛn bvool akie k’asyal nkwel nku-a-nku ekwel ki esanga ki Kelete. 14 Kɛn a ke mbee a muaan-lio, mfel a mpuru wu ata me «mfel wu etswi ki epal tal» ofi ãnkio m’esanga, bu abvi opob. 15 Mfel obiri ãsua, ndɛ obvel mɔ̃ mpɛn. Bee bu eyɔɔl mfel obiri bee. 16 Bee ebwel ke nsɛn a muaan-esanga ki ata me Kahuda, ki ékebal bee mfel etsi-tsiri. Onse fool lam, bee esi mpɛn k’esiin bvuaal b’obvuul baal. 17 Bee eyelɔ bvuaal obɔ onse ãsua. Bee hɛ̃ ewel ɛ̃sii mi ɛ̃nɛn me ndɔɔ yi edzii ãsua, kwɛn mɔ̃ ãkal y’ɔ̃kiin. Bɔ ákebal owɛɛl ãsua ãyesiɛɛn nkal ɔ̃nka wu esɛɛ bvi Libi, bɔ bu atyel eluɔ ki esa kwɛn mɔ̃ ãbee me ntiin oyi. Mfel bu ayii abiri mɔ̃ m’ɔ̃kwal m’ɔ̃kwal.

18 Mfel a mpuru ákenziool bee kɛn onziool kokɔ. Ela esiool, baal abvi eluɔ bvikyɛ otyal onse ãdza. 19 Tsoo li ãtyel, bam b’adzoo atyel esɔɔl bvi ãsua m’ãdza. 20 Ãtsoo bibi, tal k’épal wɛ, angam-a-ngam hɛ̃ k’ápal wɛ. Onge bɛn mfel áli kɛn ye mpuru, bee kaã li ebvuul efi lam.

21 Esi ãtsoo bibi mɛn bee k’édzi wɛ. Obobɔ, Pool ayetɛɛn onse baal b’ãsua, olieel bubu: «Andoo a mɛ̃, ale kɛn byɛ ekeeyoo mɛ̃, bvool al’ekeebee Kelete ombal. M’emfa okyɛ, bia-byɛ k’ekeemwɛɛn ye mfel a mpuru wu wɛ, bvool k’ekeedzeel eluɔ wɛ. 22 Kɛn a meba, mɛ̃ ewa byɛ luo wɛn ekal ye mpɛn, ke ngwel wɛ ngɔmɔ̃ onse byɛ k’àkwa wɛ, kɛn ãsua ãyi nkel. 23 Ngwanyã, ãnzwel ã Nziã wɛn mɛ̃ ndi wa ndɛ bvool esal me ndɛ, ãpal ola mɛ̃ me tsia wu. 24 Mɔ̃ ãlieel mɛ̃ bubu: "Pool, bee ye buɔ okal, ebvaan atsiil ãndɔɔ ã yɛ ke nkwel a Sedzaal, bvool Nziã, me nyiĩ a ndɛ yi nɛn, abvuul baal bueel b’ali ye yɛ onse ãsua, me ndɔɔ a yɛ." 25 M’emfa okyɛ, andoo a mɛ̃, ekal y’onzɔɔ̃, ke ngwel wɛ mɛ̃ ndi y’okiool me Nziã wɛn ãndɔɔ ãbwel kɛn a m’emfa ki eyɛɛn ndɛ mɛ̃. 26 Kɛn ãsua ã̀tyal bia-byɛ nkal esanga ngemɔ̃ bubu.»

27 Ondɛ al’eyii tsia wa kuun y’anã wɛn mfel afa ye bee ngwel abwel a bee ngwel nkal a nzal yi Meditelane. Sua kuku, b’asal m’ãsua ayebɔɔ ãtsam ndiri bee al’eyii ebiɔɔn ekwel. 28 Bɔ atyel emvɛɛl, bu amwɛn kwɛn dzio li ãdza éli ametele ãku-ãtyel ye nsiaan (37). Bɔ asyel ãnku-nkwel, bvool atyel emvɛɛl, bu amwɛn kwɛn dzio al’eyii ametele ãku-mbuaal ye mpuɔ̃ (28). 29 Onge bɛn bɔ ákebal kwɛn ãsua ãbee ãnkɔɔn obvool, bɔ atyel alongo anã b’atɛɛl ãsua. Bɔ áli ɔ̃kwal mbaa-mbaa kwɛn bviil otsa tswa-a-tswa. 30 Kɛn a onge bɛn b’asal m’ãsua ákebii k’abal, bɔ atyel bvuaal onse ãdza. Bɔ asi empa onge b’atyal alongo b’atɛɛl ãsua ke nkwel. 31 Pool olieel mbiri y’ambwel-mbwel a ndɛ bubu: «Okɛɛn baal ba k’akal onse ãsua wɛ, byɛ k’ekoo m’obvuul wɛ.» 32 Obobɔ, ambwel-mbwel atsiil ɛ̃sii ɛ̃ bvuaal, bu ayɔɔl bɔ otsi.

33 Ye k’etsa bviil, Pool oluɔɔn baal bueel k’adza. Ndɛ olieel bɔ ndiri: «Nonɔ̃ eyii ãtsoo kuun y’ãnã m’ebekiaal byɛ ɛ̃kwal ke ywel, bvool m’eli byɛ me nzal, k’edza eluɔ wɛ. 34 Obobɔ, mɛ̃ nduɔɔn byɛ wɛn edza, ke ngwel wɛ byɛ eli ye kɔɔ e bvi-odza me ndɔɔ yi ebvuul. Onse byɛ, mbuul si ngɔmɔ̃ wu èpiool onkyam efu li ɔ̃tswɛ a ndɛ k’àkal wɛ.» 35 Ndɛ aman obobɔ oyɛɛn, owel mampa, obveel Nziã ãtuɛɛn ke nkwel a baal bueel, otsiil ndɛ, bu abvi odza. 36 M’emfa okyɛ, baal bueel abɔɔ mpɛn, bu adzi hɛ̃. 37 Bee bueel éli ɛ̃nkam mviaal y’ɛ̃kuun-nsiaan y’asɛɛn (276) onse ãsua. 38 Ŋ’edzi baal bueel ayool, bɔ atyel nsia e bele m’ãdza, kwɛn ãsua ãkal yɛɛ.

39 Ŋ’etsi bviil, b’asal m’ãsua k’abeyɛɛ nsie wɛ, kɛn a bɔ ataal ekwel ke ntɔ a mpampa, akuru k’ayesiɛɛn ãsua oŋɔ̃, okɛɛn bɔ al’akoo. 40 Bɔ anyiɔɔn alongo b’atɛɛl ãsua, kwɛn bvɛ eyi me nzal. Bɔ hɛ̃ apeel ɛ̃sii mi eluɔ ki ebebiri ãsua, kwɛn bɔ adzoo mɔ̃. Bɔ asuul ekɔ ke nkwel a mɔ̃, kwɛn mfel atsɛɛn mɔ̃, bɔ bu asyel sua ekwel. 41 Kɛn a bɔ ayetsob y’esɛɛ, ãsua k’ãbetsiɔ̃ wɛ. Etswel ki nkwel esam onse esɛɛ, kyɛ k’ebekoo k’epal wɛ. Epoo bvi kokɔ bu ebwel etswel ki mbee.

42 Ambwel-mbwel ákuru k’abam baal a bwal, kwɛn mbuul si ngɔmɔ̃ onse bɔ abee obal m’onyiã. 43 Kɛn onge bɛn mbiri a ambwel-mbwel ádzii k’abvuul Pool, ndɛ oluo bɔ k’asa b’ékuru bɔ. Ndɛ otam kwɛn b’ayɛɛ k’anyiã abva m’ãdza ɛ̃kwel, me ndɔɔ yi ayi k’ekwel. 44 Baal b’asiil ánɔɔn a bɔ nkal ãbɛɛ wuo nkal etswel bvi ãsua. Obobɔ, baal bueel asiɛɛn kɛɛ-kɛɛ, ndɔɔ pyɛ.