1 David napei Israel gwangpei Solomon* macisamdung.

2 Macisamdung aidungde au maci nah keledeusam ledeu kerane,

pekie kecoksamdung ledeu kerane,

3 iciu eh nnui keledeusam cide ngaulu eh

petaube, kemzuibe nah kesamsangbe tei eh lungh lu kerane.

4 Macisamdung cidung mang eh kelame de tei mriak lu

nah rehangmedung de peu ma cilu nah ma petaube teilu kerane.

5 Makecime de peu kingnei lu eh penui maci kieesi kelu teilu

nah kecikecet kebamme de peu puisau ngaukelu teilu,

6 macisamdung, samgwa,

nah makecime samdung nah penui samregwadung cilu kerane.

7 RAMPAUBE de kerüt au maci bangdwabe

kemangme maci nah keledeu de mlaila.

8 A na, n pei ncu marang kelia de kingnei lu

nah n pui keledeusamdung de keu kezia diso;

9 cidungde n peu ga peurwa keyi ge zie

nah heteiria n ngwang gage gwak kebam nzwa.

10 A na, kemauketeime ncu penui mau gage teugai kera tei cai,

penui caisui kera keli dilu.

11 Magade penui rang eh, ‘‘Anui da gwang lu,

anui mide teitset kera kwa bam go,

anui mbailu delwe pekie kegah gade mina mau kemakme de ketang go.

12 Anui penuide nring mnwa lugo, Sheol pepum keyime de keupwa di kela nzwa,

nah penuide hekwaki ga nghai mie kecume nzwa teidi go;

13 anui mahei pemi kehung ketsamtsam leune ngau luzie;

anui mi dade rega keludungde le anui ki tei pui luzie.

14 Anuide gwang hemaa lu;

iciude anui pelane rangkangbung ncüt luzie.’’

15 A na, penuide lampui ga nzang tet so;

penui ketet ga n pi peu cia diso;

16 penui pi makesia gage pak gaila

nah penui hejai teilwa gai kera kenang dila.*

17 Nruine keheibe dwa gage helang kelien kegai au kemta ge.

18 Dede mina aidungde penuikatei penui baih teu pwabam la,

penui tsailu kera baih ge.

19 Mina keheibe de petau kemak gade mahei ngau keludung de ainzwa da;

petau kemak mahei de herak teu kelame teilung keuteu dila. *

20 Maci puidiki gade sahbakla,

pa litaknidung gade sahbakla;

21 puidiki peureu gade pa sahbakla,

namdi kirie* kimui gade pa marang bam,

22 "Kemangmedung, nnui daitie ge mang neu bam zieno?

Mide kekiimedung, nnui daitie ge mide kekii ga nnui sui bam zieno,

nah kemiemedung, nnui daitie ge maci ngkau bam zieno?

23 Ih ncu ledeu kebeu de gage nlung kailu;

Ih a kecet de ncu rui gaibeu zie;

Ih a sam de peu ncu cilu zie.

24 Ih qugai, dede nang a kwa kingnei raudi;

Ih a ba kezangpet gaida, dede migede helungkai eh kingnei ma.

25 Dede nang Ih ncu rangkelia de mapie ma

nah ncu ledeukebeu de gage nlung kaima.

26 Nang keherei keludau Ih ncu nui dizie

nah kehing kegwang dau Ih ncu kii zie,

27 kehing rahang nzwa n da kegwang dau

nah kengkap tingkai kenrui nzwa n da kegwang dau,

lungrei nah lungsiet n da kegwang dau.

28 Iciude penui acu qu zie, dede Ih penui sam keli lak;

penui swagah eh acu qu zie, dede penui acu peei gailak.

29 Kedanemene penui maci ngkaula

nah RAMPAUBE mie hinglu kemakne,*

30 penui a keledeu de mzai luma,

nah Ih rangkelia leune mlaidi.

31 Penui ling kegai tsi de penui tyei zie,

nah penui ciemdung tsi dele penui pui luzie.

32 Macikemakme nreu tet kegai dau penuide teitset dila,

nah kemieme ma cetla kemakne penuide teingkap dila.

33 Dede a sam kingnei kelume kwak eh lungh luzie

nah magede lungpang tei kera gah eh kwak luzie."