1 Mina da heciem riem kecu bam,

dede sam keli kera au RAMPAUBE dade gwang.

2 Mige pa teikela leune pe dade petau lie cetla,

dede RAMPAUBE pe lungcetdung piela.

3 RAMPAUBE dage n ta pelane kaibeu lu,

iciude n mariemdung teicang luzie.

4 RAMPAUBE maleune de makie ge ziemne teigai,

kesiame de de kengkap benai ziemne teigai.✝

5 RAMPAUBE ngang kelame de ngkaula,

dede aide cisiak delu: penui au saja ngau mene talak.

6 Samkakkelu samsang nah kenlum gade kemaudung gi dida,

nah RAMPAUBE de kerüt gade mina kesiabe dade nreu lula.

7 Mige RAMPAUBE suiyi tei luge,

pe ngauraume de peu pecu ngngwa kezuyilu kera tei beula.

8 Ma keceuna ge masang delwe ngaukelu au

petaukemak gade ma kekiee ge ngaukelu swade yiki.

9 Mige pelung gade matei kera riem lula,

dede RAMPAUBE pe pikietdung sau beula.

10 Hegwangpei muileu ga mariem keyi bam,

pe mui kemzuibe cwadi kerabe ma.

11 Makesang riangteukwak RAMPAUBE dade gwangla,

perak ga kemdetkang pelane pe bata.

12 Hegwangme ma kesiadung tei kecudau, cidung au ngkau kerabe,

kedanemene hegwangbam au petaube ketei gade teingkieng lu kecune.

13 Hegwangpei kesangbe kerang muileu de pe suila,

nah pa kesangbe kerangme de hungla.

14 Hegwangpei rata au ketsai samgwame da,

dede kemteume au pe rata tei ncieplu kera teila.

15 Hegwangpei zu ga kebaa ga kering bamla,

nah pe suiyi au heriak tingdau tingrui teugwang beu kela hemwa nzwa da.

16 Kemteu ngaukelu au kecak swade daikenzwa gede yi no.

Rangkanggeu swade kecikecet ngaulu kera kedetlu kerabe.

17 Kemzuime puidiki kesiabe dade nreu tet dila,

pe lampui gum kelabe pe teilung kelilu la.

18 Kekap dwa ngang kecu gwangla,

nah mide mning mdi kecudwa kau kecu gwangla.

19 Hegie kelame de ngngwa sütkelu maa mzi kecu swa au

kegahme kakga henah kelube yiki.

20 Pecu ledeu kegaidung cet teune kegaime keyibe ngau luzie,

nah RAMPAUBE de nlum kelame de samlam beuzie.

21 Kemteume de macet teune kecume lie la,

nah sam keyi ledeu kecu ciem teihemi lula.

22 Kemteume ziemne maci au kering duilet ge,

dede kemangme keledeu au penui kemie nzwa da.

23 Kemriakme mlung au penui mui puisaube,

nah penui muileu gage luulu kebui kaisi beula.

24 Sam kenciep au heliadui nzwa,

rabe ziemne yi nah mira teingkei beula.

25 Mina petau lie cetkela lampui ge bam,

dede cide ketsai gage ngngwa beula.

26 Maketeibe pe taktyeipok ziemne matei heriki lula,

pe mzeu ne pecu kecung beula.

27 Kemta kauge makehebwak tei ncuh beula,

nah pe marang au ru ketei mi ge nzwa.

28 Kesiame makehebwak tei ncuh beula,

nah letkiee sam zangna keyime de de teuntsam dila.

29 Pe zai kesiame pe kidabe dade kenret rangla,

nah pecu lampui kesia le ge nzanggai beula.

30 Miaklisau kelame makesiadung cet nah riem bamla;

muilim tip kebamme makesia teugwang beula.

31 Mipeutam kepu au kendu peurwa ge;

cide au petau tei eh lunghkelu gade ngau lula.

32 Reugwame ge tei kera swade mi rata mzet kemakbe yiki,

nah namdi ngam kelube swade pekatei pe rabe de kezeu kelube ngkieng ki.

33 Ma cilu kerane dacak la,

dede RAMPAUBE dade samli gwangla.✝