1 A na, a maci de gage nlung kailu;

a kecikecet de kingnei teune lu,

2 iciu eh nang petaube teilu kerane

nah n samdung maci gumlu kerane.

3 Kedanemene kemmha pui samdung au helia dui zau kemie nzwa

nah pe sam au maca swa mdui ki,

4 dede penli kedi dau pa au kekaa bang ge nzwa kaa dizie,

kingtie pe mui keyibe ne dang kegai nzwa zie.

5 Pepi ketsai gage tet hungla;

pe pikietdung Sheol* gage tet gaila.

6 Pa kering lampui gage pe lung kai lama.

Pe pi kietdung huii lala; pa dai gage tetgai labi ci lama.

7 Cu, a namedung, a sam kingnei lu;

a mui gade kepet samdung kingnei tadi eh nreu tet kedi teiso.

8 Pe dade n lampui kai mdei dilu,

nah peki kikam taiga gwang nna deso.

9 Mecai n da kerüt kebam de mikedamedung de peu dizie

mede n teilung pezai kesiame dage kai dizie;

10 cikemakmedung ne n mabam leu pwa dizie;

nang bata de cikemakme kiga nlüt dizie.

11 Nah teilung kekamle

n teih nah n pum teingkap kegai dau nang teei eh mra dizie.

12 Nang ncam eh rang zie, "Ih daikenzwa gede keledeusam de mlai dino

nah a lung keledeu mlai dino!

13 Ih a keledeumedung sam mzai lu meda

mede a keledeumedung sam kingnei lu meda.

14 Ih au mtei dwa gade, minadung gwang ngkwa kebam kak gade

ngkap zingdi nage da."

15 Nkatei ngu duibung* gade dui saklu

nah nkatei n tekwa duilwa kebam gade dui saklu.

16 Peu ngu duirwakdung kehei leune ga pui nlim zie ni

nah peu ngu reuceu dui namdi sum ga lwamie zieni?

17 Peu cidungde nkatei n ziemne lu

nah n da kebam cikemakmedung ziemne so.

18 Peu ngu duilet de samlam beulu

nah n nau kelube puide de nsui lu,

19 kedanemene pa au heti nzwa hezuyi nah pe zaiyi.

Peu pe keku ncu kemnung peu muilu;

peu pe keku le ncu twagwa bammui lu.

20 Kedanemene a na, ncu daitei peu kemmha puide kemeu pwabam lai?

Nang daitei mi keda nau zuyi de nsui laino?

21 RAMPAUBE mige ma teikela leune ngaula

nah pa ketet lampui leune pie bamla.

22 Kesia keteime de pekatei pe maudung gage keu dizie;

pe mau lang gage pecu keu pwabam dizie.

23 Peda puisau bam kemakne pa tsai dila;

pa mang kemtei dene pecu petau kemak gage teugai dida.