1 Mina kedame de ncüt kemakme pekatei pe hengin peeila,

nah pa tutiak kemzuibe leune de ngngwa rang repia lala.

2 Kemieme ge kecikecet gade magede pe suiyi ngaulu lama,

dede pe lungning keuliakegai rünne gade.

3 Kemaume ge kegwang dau, makesia nzang gwangla,

kengngam nah mide rangkemsia de si eh.

4 Mige samdung au duikedi nzwa cuk;

maci duilet au hereuki duilwa kebam nzwa da.

5 Kemaube lam pwa kecu petau ma,

mede maukemakbe de peu kemzuibe ngaulu ta kedi.

6 Kemieme ge kesamlim peda teugwang lula,

nah pe mui kedap ge kiela.

7 Kemieme ge sam au pekatei pecu tei kengkap,

nah pe sam le pekatei pecu baih gage keu lula.

8 Ledkieesam kerang au taktyei nggumsüt kecu nzwa,

nah cidungde mipum lung ga gwang dila.

9 Heta tei kenghetme ge au

matei msiasüt kelame ge sinabe.

10 RAMPAUBE zi au tsukwa kehu kengkieng ge;

cika makesangme pak mie eh kwak lula.

11 Keheime ge mabam au pe namdi riekelu deda,

nah pe kemning gade cide au tsukwa kecehu ge nzwa.

12 Mige kau kemak dwa pe lung hegie bamla,

dede henah gai mai ketwa ngau gailak.

13 Mige sam kingnei rai mene sam keli cai,

cide au kemie nah hengam.

14 Mige mateei kebamdau rabe ne pecu peu ringbam luzie,

dede rabe de rezam dicai caune lia lulai?

15 Kemriakme maci ngau lula,

nah makecime cide kingnei kera peei bamla.

16 Mige mtamapeu kepeu de ziemne

mina kenlangme de redaulu kera lampui ngkeibeu lubui.

17 Hetiakbam gade marang keraibe pecu renia kebambe gwang ma keteucu kemaktane

pe be petau kecu nzwa bamla.

18 Dacak ketei kesamlim kecu tei ndui beula,

nah kengkiengme hangna renia kebamde kezeu beula.

19 N kibaume de ngha lu iciude penui ncu namdi kengkieng kirie nzwa gum beuzie,

dede nang penuide ngngwa kesamlim cai, penui n ziemne kikamdung ngkui dizie.

20 Sam keyi au taktyei keyi ketyei nzwa mnung lula,

sam petaube kemnung teugwang beula.

21 Ketsai nah kering au mi mleu ne kezeu pwabam,

nah mi mleu de hung kelame cide tsi tyei zie.

22 Henau keyi ngau kelube makeyi ge ngau luda;

nah RAMPAUBE dade suiyi ngau lula.

23 Kegahme ngaugia kiela,

dede makeheibe sam siasüt eh keli la.

24 Kangge zangna kekiee kebam rangla, nah penui ne pecu teimsia dila,

dede zangna kangge au caiherei swacing swade nna kila.