1 A na, a samdung kainzeu lu

nah Ih teilo kebeudung nlung gage kainzeu lu.

2 Ih teilo kebeudung de teilu, iciude nang ring luzie

nah a keledeusam de ma kedabe leune reu kai kwaklu.

3 Cidungde n zurangdung gage keulu;

cidungde n mlung gage raulu.

4 Maci dage ranglu, "Nang au a tipui,"

nah lungcet de n kibaume lie qulu,

5 iciu eh kemmha pui dade ncu teu mbailu kerane,

mipui kesiame kemdui samdung dade mria lu kerane.

6 A ki kebaki ga

rapwa kebam gade Ih pie mpet gai.

7 Ih minadung macikemakme de piegai,

nah rehangmedung kakgade

rehangme kemang kauge de Ih ngau.

8 Cipau rehangbe kemmha lungh kebam kimiak taiga puidiki ga tetla,

nah pa cipau puide ki le tet mie.

9 Cide tinghegi, mui lai eh kebamdau,

tingmui nah muiting kedi dau.

10 Cika mipui ge pecu redau,

helipui ge nzwa pe henet teulu, kemau lung pung bam.

11 Pa au hengam kegah nah pecui ketei pui ge;

pa pe kilungga bam gimlu lama.

12 Cu puidikidung ga nah pecai litakni ga lazie,

nah pa mide teirezam gai kerane kimiak leune ga mbailwe kwabam.

13 Cine pa rehangbe de tuibing lu eh pecu kemam gai,

pa pezu kuusüt eh peda ranggai,

14 "Ih henai kezuyi reca teigai,

Ih a sampetdung teicang luda,

15 cine Ih ncu redau kera tet petla,

ncu peei luneu eh, nah Ih ncu ngau luda.

16 Ih a zeu ga zeukam kam luda

Egypt deudi gade ngaukelu langcimpai pegiak ketei le.

17 Ih a zeu perimkehengui

myrrh, aloedung nah cinnamon le perim tei mmi pwabam.

18 Gwanglu, anai tingcang kecang kemrai bam go;

anai kemrai tadung tei eh kehega süt go.

19 Kedanemene a nahpei au kilung ga gah;

pa beuhdei tetdi.

20 Pa pe rangkang bungge keu pungla;

pa hekei bungri benai ne cailigwang zie."

21 Pa pe samrang kekiee le pecu teu nreudi;

pa pe sam keyidung le pecu petaukemak gage saugai beu.

22 Hetumseu gitset kera teugwang kela nzwa

pa zette pecai sui tetdi,

heti ge baih gage keukedi nzwa,

23 lakpitsi ge le pe nceu reudi kemaktane.

Pa au nruine ge hetak ga lim kemie nzwa da.

Cide pe teilung teingkap di zielie kecu pa ci ma.

24 Cu, a namedung a kwa kingnei lu;

Ih kerang samdung gage nnui lung kailu.

25 Peu n mlung pe lampuidung gage nreu tetgai diso;

pe lampuidung gage tet maugai diso

26 Pa minadung kekiee gede reu ngkau kap dida;

pa mina kekiee gede teitset dida.

27 Pe ki au ketsaime deu lampuidung ga bam;

cidungde ketsai kemui zeubung ga nghung la.