1 Kemaume de ngau n riak so,

mede penuide ngngwa kera hengin so,

2 kedanemene penui lung au ma teimsia kera riemla,

nah penui mui au makesiabe rangla.

3 Kemteu gade ki tei lula,

nah macetkeyi gade cide teingkieng lula.

4 Maci le kibungdung au ma pemi kehung

nah hezu keyidung le tei pui lula.

5 Kemteu reugwame ge au ngking,

nah mina makecime ge au ngking si reureu lula;

6 pe kemteu puisau gade nang hereu regi lubui,

nah keledeume kekieege kebam ga ngamkelu bamla.

7 Kemteu samdung au kemieme ziemne cok hamdi;

herieki* gade pa marang lama.

8 Mige kemau tei kera riem bamla,

minadung pecu makehebwak mpaube lie qula.

9 Kemie ciem riem kela au kemau,

nah mide rangmsia kelame ge de minadung ngkaula.

10 Keherei kecudau nang ngngi eh mnei dicai,

nang ngking ma.

11 Petau kemak gade teitsetdi lai kebamme de kelilu,

nah daptsetdi kera gage tet gai kecumedung de tei mtak dilu.

12 Nang magade, "Ainie, anui au aide ha au magede cima," de eh rang cai,

n lungning pie kelabe nang dai rang zeubi ci meni?

N teilung gumbeu kelabe, pa ci meni?

Tinggwang mileune de pe bata nzwa ziehi peu lak ni?*

13 A na, heliadui tyeilu kedanemene cide au yi,

nah helia liep gade zau kemie heliadui au n mleu gade kum.

14 Kemteu au n rabe ziemne cinzwa da,

nang cide ngau lucai, caiha bam zie

nah n regui de tei nggah dilak.

15 Kemaume ge makesangme ki sütteu di kera kwa kecube nzwa kwa bam so.

Pe ki teimsia diso!

16 Kedanemene makesangme pia hena kaumie liede cuhdai lula,

dede kemaume de au keherei ne ngkap dila.

17 N ngauraume keherei dau keludau n suiyi so,

nah pa kau kecudau n suiyi so,

18 mecai RAMPAUBE ci luzie nah pa pe suilak,

nah n ngauraume dade pe lunghop teu caili dizie.

19 Kemau teikelame ziemne n lung keherei so,

nah mina kesiamedung de nriak so,*

20 kedanemene kesiame au pe caiha gah,

nah mina kesiame mibung mmüt dizie.

21 A na, RAMPAUBE de nah hegwangpei de rütlu;

penaide ngaurau kelame de ngngwa so,✝

22 kedanemene kaknage gage penuide ngkapti kera gwang zie,

nah penai dade kengkap daikenzwa ge gwang ziebi kecu caune cilu lai?

23 Kemteumedung ne aidungde rang si gai.

Hetuketiakme ge milam pwa kecu au yi ma.

24 Mina kesiamedung dage, "Nang au makesangme ge,"

de eh rang kecume de au minadung ne reset zie nah heleuhdung ngkau zie.

25 Dede mina kesiamedung de ledeu kelame au penui suiyi luzie,

nah penui au mapeu keyidung ngau luzie.

26 Kesangbe rang keli kegai au

muileu gage kemam kegai nzwada.

27 Hegwale n ta tei kera mteilu,

nah luh ga nang teu mai kesiabe maleune mteilu;

cipaucai ne n ki teilu.

28 Pekie kegah gade n kidabe de mmau eh zierang teiso,

nah n sam le mide cwaso.

29 "Pa a dage tei kegai nzwa Ih de pe dage teigai beuzie;

Pa tei kegai de Ih de pe nsam tei beuzie" de eh rang so.

30 Ih kenghetme ge,

kemangbe kube luh tetkah gwang.

31 Cide hetu le lungh pui bam;

hangdeu ceheibangdung le lungh pui bam,

nah pe tangtsu rie de meu dida.

32 Pecai Ih cide piegai eh cipau hade cetgai;

Ih piegai eh keledeu ge cilu.

33 Kaknage ziangmui gailu, kaknage zip gailu,

kaknage batuilwe mtak gailu*,

34 iciude keregame ge nzwa magah n da gwang zie,

nah nang teumaikesiabe pe reunet teulwe sütketyeime nzwa gwang zie.*