1 Ncünne ziemne ngang diso,

dai tingba ge teu gwang zie bi nang ci kemakne.✝

2 Mi kedame de peu ncu twa lu nah nkatei n mui ne mene;

cikemakme ge ne nah nkatei n muileu gade di mene;

3 Tangtsu gu perüt penai heciang gu perüt de cet gai lo,

kemangme ge ne mirata tei kegai de au ci kena swade rüt ki.

4 Rata au pezai sia nah lunghop au pui nlim,

dede cau be heriak kesia dwa sap lulai?

5 Mdu eh herata kegai au yiki

kengkim keku swa.

6 Zangname ge ne rezam kegai de au samsang lie,

dede ngauraume ge ncu hemam mteisüt di lubui.

7 Mi ge tyei nggei lwe kebamdau heliadui keli dizie,

dede mzeu kebamme ge ziemne, kekaabedung de kum dila.

8 Nruine ge pe ciep gade pak kedi nzwa

mige pa lungh kebam gade tet mzia kedi au.

9 Marim keyi nah kehengui de helung suiyi peula,

dede zangname keyi au pe lungsang teu rangkelia gade gwangla.

10 N zangme nah n pei zangme de gi diso,

nah n sinabe ki ga mie so nang keherei kelu benai.

N tai ga kebam n kidabe au yiki n sinabe kemdei ga kebam be de swa.

11 Mriaklu, a na, nah a mlung suiyi tei lu;

ciu eh acu henui tei kelame de Ih penuide a sam keli caili beu zie.

12 Kenriakme keherei ngau eh pekatei pecu hebai lula,

dede macet kemakme mie la nah cide ziemne keherei dizie.

13 Mina cikemakme ge zierang teibeu kelabe gu paini ge keu lu,

nah cipau sampet de kainzeu lu pa kemmha pui ge zierang cuh kecudau.*

14 Caugame pe kidabe de tingcang nuge sahbak eh samlam beu bi,

cipau samlam de au reset ge lie eh cet di lubui!

15 Kesamlim nau ge au

ting kerui benai dui zau taptap kemie nzwa da;

16 pecu kaam kegai au tingkai de kekaam nzwa da,

mede n ba zetle le maca nzap kegai nzwa da.

17 Hegeu ne hegeu de tei nzau la;

ci nzwa eh, mina ne pe zangme de tei nzau lula.

18 Nzütbang kelamluibe pe tsi tyei zie,

nah pe mpaube de gum kelabe de au kerüt peu zie.

19 Dui gade mige pe zu ngau kela nzwa eh,

ciu eh mige mlung be gade pecu ngau lula.

20 Sheol nah Abaddon madaude mnung lula kemak nzwa eh,

mina miak madaude mnung lu lama.

21 Mih le rangkanggeu nah kecak de kesi piela;

nah mige de twa kegai gade pecu kedei pie la.

22 Nang kemangme ge de ketautie ge le, tsiu kakga neu gai liede,

dede pe kemang de au pecu püt lak.

23 Nang n kauruinedung rehi de ci bi maisia

nah n tumdung de n lung nei lu,

24 mahei au bammui lula melu.

Hegwangpeurwa ge ceheu leune ga bammui lula ni?

25 Nang reigau gah di kela de ci maisia nah keheci bwa pet kelade,

nah kideutu ga tsehei hekwalu kera ting de.

26 Cipau meuründung nnui de paini peu zie

nah hemeudung de luh mi peu zie.

27 Hemeu tungdui nnui taktyei ziemne bam zie, nnui kilungme ziemne taktyei,

nah n kila releime de hezu teihemi lu kerane.