1 Caugame ledeukebeu de pe sui labi cipaume maci de pe suila,

dede keledeu ngkau kelabe kemangme da.

2 RAMPAUBE mina keyime de ngha beula

dede mina makesiabe riem kelame de mmau la.

3 Kesiabe ne migede de tei ngkieng beulu lama,

dede mina makesangme sap teu ngkau gailak.

4 Henau keyi puige au pe nahpei peurwa ge,

dede hengam punggwang kebeu puige au pera ketim mateei ge nzwa da. *

5 Makesangme kesangbe riem beula,

dede kesiame ne rangkelia au mide cwala.

6 Mina kesiame samdung au mbailwe mide bungde teitset kera kwa bamla,

dede kesamsangme sam ne penuide kelibeu la.

7 Mina kesiamedung de ngamdi zie nah penui gah dila,

dede makesangme kelak saplu zie.

8 Migede pa pe maci daikiee ge bam bi kecu rehi gade twa la,

dede makesia peusui pung kelame de masipei lama.

9 Maidakme ge tei eh kebam be yiki, kilame ge tei eh,

n kemlang ha rang hegie eh ketyeipok kegah swa au.

10 Mina keyime pe kauruine teumaikesiabe pie teune beula,

dede kesiame ngaukenggia bata kecangde siasüt la.

11 Pe deu ga matei kegaibe ketyeipok kekiee hekwa luzie,

dede kemta tadung cai zui kelame au kemangme da.

12 Kenlienme mikedame dade mina kesiame rega kelube regui la,

dede makesangme penuikatei penui ta gade petsi buipet lula.

13 Kesiame ge de pekatei pe sam kesia gage keu lula,

dede makesangme kengngidung gade mbai lula.

14 Mige pe samrang gade makeyi kepui bui lula,

pe bata rehi gade pecu ziehi peu kela nzwa.

15 Kemieme ge pa tetkela lampui de petau lie cetla,

dede kemriakme ge keledeu sam de kingnei lula.

16 Kemieme ge pe rata zette la,

dede rangkemsia siude siukemak nzwa ta kedime au kemriakme da.

17 Makesangbe rang kelabe ma petau rangla,

dede kenret zierang keteime kenretdung rangla.

18 Macet sünne mene zette ma kerangme ge sam au kingtie le bi kedi nzwa da,

dede kemteume sam mide teingkei beula.

19 Makesangbe samdung kelungta bamla,

dede kenret samdung au tingkak nage ziemne gwale ma.

20 Kemau teikera cet kelame mlung ga kecwa lala,

dede kezuyi ziemne heta teikelame da suiyi gwang la.

21 Makesangme da makesia gwang lama,

dede kesiame da keherei le pui dila.

22 RAMPAUBE kenret kerangme de ngkau la,

dede samsang eh lungh kelame de pe suiyi la.

23 Kenriakme ge pe maci hekam lula,

dede kemangme penui maci kemak sah gaila.

24 Pe ba kemrime kedi tei zie,

dede kenghetme de penui kemei tei eh peu mata teizie.

25 Lungrei bam kedime ge pe sui kau dila,

dede sam keyi ne pesuiyi tei beula.

26 Makesangme au pe zangme ziemne puisau ge,

dede kesiame lampui ne penuide kemau gage teugai dila.

27 Kenghetme penui peei kelabe ngau gailak,

dede kemrime ge pemikehung mahei ngau lubui.

28 Makesang lampui ga tet kelame kering ngau lula,

nah lampui cide ga ketsai bamlak.