1 Zau au mide kii kela ge nah zau kengkingbe au regi kela ge;

zausak kecune pe lampui cita kedi keheibe de kemriakme ma.

2 Hegwangpei de kehing au hingho mra kebamde de hing kecu nzwa da;

pe rata tei kecume pe teilung ngkap dila.

3 Kesamlim kecu mbai kelu au keheibe ziemne ma keyi ge,

dede kemieme kesamlim bangdwa beula.

4 Kenghetme herei tingdau luh puu lama;

pa luhlüt tingdau mei peei la dede magede ngau gailak.

5 Mige lungcetdung au dui kecok nzwa,

dede makecime cide twak mpet lula.

6 Mina kekieege pa dai kenzwa gede masang bi kecu rangla,

dede kesangbe de cau pei mpet lubui no?

7 Makesangme ge pezai samsang eh tetla,

nah pe namedung pe lampui pwa kelame de samlam beuzie.

8 Hegwangpei hetu ketiakbam ga kebambe

makesiabe leune pie eh pe dwa gade keugi dila.

9 Cauge rang lubui no, "Ih a lungcet kai mci pwabam;

Ih a kemau gade mci dida"?

10 Perüt teu masang kemak nah ndet masang kemak

kenana de RAMPAUBE ngkaula.

11 Rehang relei mege de pe bata gade ci lula,

pe zai mci nah masang mi mebi kecu gade.

12 Mi kwen masiu kera nah mimiak ma ngau kera kenana de,

RAMPAUBE ne teigai.

13 Kezip de hung so mecai nang ma gah dizie;

ma teinang bamlu, iciude nang tyeikap gaikelak ngau luzie.

14 Makeluibe, "Cide kemta! Cide kemta!" de eh rangla,

dede pa mpetlwe pemi lia kelude rang eh hegie bamla.

15 Kecak nah pemi kehung tangtsu kekiee ge bam,

dede maci sam kerang au pemi kehung nia gelie.

16 Sangme pau teibeu kera sampet kebeube ge pai kai nzeulu,

nah mci kemak pui pau teibeu kera sampet kecudau cide samkak keluge teilu.

17 Mide kecwa gade tangku ngaukelu nggum la,

dede bam sangne pemui tsutia le pui dizie.

18 Keledeusam kingnei kelu gade mariem yi lula,

nah kemteu puisau si mene hereu ga renia kera lüt so.

19 Ledkieesam kengkim kaizeu lu lama,

cine nang mina marang kekiee zu kecume dade mbai lu.

20 Mige pepui mede pepei de reset cai,

pe mibung muiting kecu gade tei mmüt dizie.

21 Mabam keraidau ngau kelwa kelu au,

kekam lebie pekeyi cam dizie.

22 "Kemau aide ziemne Ih ncu gibeu lak!" de eh rangso,

RAMPAUBE de kwalu iciude pa ncu kelibeu zie.

23 RAMPAUBE perüt teu nsam kemak ngkau la,

nah riangteukwak teu samsang kemak au yi ma.

24 RAMPAUBE anui pikietdung saulia beula;

cine pe teilung dailam mie zeubi kecu caune ci lulai?.

25 "Ma aide au mci," de rang zette kedi

nah sampet kedi caine pekie daibi de cet kecu au mina ziemne hebaih ge.

26 Hegwangpei kemriak ge makesia teikelame de peei mpet lula,

nah ngaunggia mene penuide saja peuzie.

27 Mina rabe au RAMPAUBE mibung ge,

pelung ga kebam pelane peei lula.

28 Ngaugia nah kesamsang ne Hegwangpei de peu kwak lula;

keku ne pe hegwang peu kwakbam lula.

29 Rehangme kendu au penui kengking,

nah kecingme hezukeyi au penui peutam kepu deda.

30 Ma kehung daukelu gade ma kesiabe teimci beula,

nah keledeu ne helung teimci lula.