1 A na, Ih ncu teilo kebeudung de nsungta diso

nah a keledeudung n mlung gage kaizeu lu,

2 kedanemene cidungde ne n teilung tei ntie beuzie,

nah ncu lungciep kaisi beuzie.

3 Peu madaude samkakkelu samsang nah nlumlukebui de ncu püt diso,

cidungde n ngwang gage kang ncütlu,

cidungde n mlung gage raulu.

4 Ciu lucai nang Tinggwang nah mina

suiyi teilu zie nah hezi keyi ngau luzie. *

5 N mlung pekiene teu RAMPAUBE de nlumlu

nah n kecikecet de ga ngngei diso;

6 nang ketei leune ga pecu hetwa peulu

iciude pa n lampuidung tei mzui beuzie.

7 Nkatei ncu le mteu lie cetso;

RAMPAUBE mie hinglu nah kesiabe gade nreu tetdi lu.*

8 Cide n pumteih teingkei beuzie

nah n pum teimcang beuzie.

9 N mahei nah n deu gade ngaukelu

petsiraitudung teu RAMPAUBE de rütlu,*

10 iciu lucai n ciukidung pui luzie

nah zaubung, zau keheci le pui nlim dizie.

11 A na, RAMPAUBE ledeu kegaide mlai diso

nah pa kesiu kegaide ngkau diso,

12 kedanemene RAMPAUBE pa hung kelame de ledeu la,

mipei ge pe na pe suiyi teikelabe de ledeu kela nzwa.*

13 Maci ngau kelube au samlam pungtu;

pa kecikecet de ngau lula.

14 Maci gade kemmi ngaukelu au rangkanggeu gade kemmi ngaukelu swa yiki

nah pe mmi au kecak de swa yiki.

15 Maci au hega swade pemi hung ki,

nang lukeneu keheibe de cide de keukeda gailak.

16 Pe teilung ketie pe ba zetle ga bam;

pe ba mhile ga maheidung nah kerüt bam.

17 Pe lampuidung au ngaugia lampuidung

nah pe lampuidung pelane au lungciepbe.

18 Pa au pecu gipung bam kelume ziemne kering tsingbang ge,

pecu gipung kebamme au pe suiyi bamla.

19 RAMPAUBE maci gade kideube de damgai,

kecikecet teu eh pa tinggimdung teilu.*

20 Pe maci gade duidung lwa petlu

nah hemwadung hezin zaugai.

21 A na, kemteu nah kecikecet de kainzeu lu,

nah peu ci kenade ndade tet diso.

22 Ci kenade n rabe ziemne keringbe zie

nah n ngwang ga hezu keyi ge zie.

23 Iciude nang n lampui kwak eh tet luzie

nah n pi dwak dilak;

24 nang zeu mie kecudau, nang ngngi dilak;

nang zeu mie kecudau, nang zip hemi luzie.

25 Kengngi zette kegwang ziemne ngngi diso

mede kesiabe ne teikemsia teu kegwang dau,

26 kedanemene RAMPAUBE n lambie bam zie

nah hebaih ga paklet lu kera gade n pi keu mzia beuzie.

27 Ngaulubui siak kecume dade keyibe keu kezeu diso,

cide teikera nang kengking kebam dau.

28 N kidame dage,

"Tetcu, delwe gwang dailu, Ih ncünne cide peu zie," de eh rangso,

nang nda rangkang kebam dau.

29 N kidame de teikeherei kera riam so,

pa ncu nlum eh n taiga lungh bam.

30 Pekie kegah gade migede de ngngwa kesamlim so,

pa ncu rezam kera magede teigai kemak cai.

31 Pezai kesiame de nriak so

mede pa keteibe ma keheibe de teiso.

32 Kedanemene kesia keteime de RAMPAUBE ngkaula,

dede kemzuime da pe kekuu bamla.

33 RAMPAUBE reset au kesia keteime kiga bamla,

dede pa kesamsangme ki samlam beula.

34 Mide rangmsia kelame de pa rangmsia la,

dede henah kelame de pe suiyi la.*

35 Mina kemteume kerüt ngau lula,

dede kemieme hengam rünne ngaula.