1 Zing de eh tangku kecangh ketaknage ketei au,

kilung kenggi le pui eh hengyi bam kecu swa yiki lie.

2 Kila kemriakme hengam ketei nabe reu dizie

nah caireiswacingme ge nzwa mapwa pelie ngau lubui.

3 Teikemci li au rangkanggeu ziemne nah mimang mangdi au kecak ziemne,

dede RAMPAUBE helung teimci beula.✝

4 Kemau keteime kesiame samdung kingnei la,

kenretme ge kenretsam kingnei la.

5 Kegahme de rangmsia kelame penuide Damkegaibe de kii la,

nah mi kedame kengkap pe suiyi kelabe saja ngau mene talak.

6 Kecingme peurwa au pe tsamedung da

nah pepui pepei au pena me de kerüt teugwang beula.

7 Kemieme ge marang keci au zeu ma;

hegwangme kenret kerang au zeu me gwareu.

8 Hetauhenim kepeube dwade cide au kereka tsukang ge nzwa;

pa nreu kegai leu ga pa teidau lula.

9 Keheibe de kemau tei kegaime mau gibeu kedibe au keku peei la,

dede kemau teikegai de rang daidai kecume zangna keyide teipang dila.

10 Makecime de kesiu kegai au kemieme gede

pia haige dap kecu swade maci si lula.

11 Mina kesiame makehebwak gwale peei lama,

cine pe zai kesia samgwame de pe dage langgai zie.

12 Kemangme gede pe kemie ta teibam eh dau kecu swa au

hegumpui pena rega teu kedi puige de redau kecube yiki.

13 Mige ma keyibe ziemne kesiabe peu caili cai,

kesiabe madaude peki püt lak.

14 Kesamlim kendeu au mige dui reu pwa kehei leune gage kai kegai nzwa da,

cine kehebwak petdi kemakne ge nreu tet dilu.

15 Kemaume de peu tet kedibe nah kesamsangme de mmau kelabe,

kenana RAMPAUBE ngkaula.

16 Kemieme ge daitei maci kepei gage rangkang mpet bam lai,

kedanemene peda maci lu kera peusui gahlu?

17 Zangname ge pe keku keulia bam muila,

nah caireiswacingme au keherei kecudau kemapie kerane mnalu.

18 Mina pe peusui kegahme teipang gai kelak sampet teila,

nah pe kidabe paudung rui kera püt pung dila.

19 Ma kehebwak pe sui kelame kemau pe suila;

pe kikam pi tei huzu kecume keherei peei bam da.

20 Mina pe lung kengkoime magede keyi ngaulu lama;

petau kemakbe rang kelame kengkap gage kaugai dila.

21 Kemieme pui pei au pekatei pe dage lungrei punggwang gaila,

nah kemie nabe pei au suiyi bam lama.

22 Misui yi kebam au mipum tei mmi beula,

dede misui sia kecu au mira tei cangh dila.

23 Mina kesiame mbai eh hetauhenim keu lula,

tutiak petau kemakbe tiak beula.

24 Kemriakme maci pie bamla,

dede kemieme kideutudung pie bamla.

25 Kemie nage au pepei lungrei

nah pecu mnakelu pui ziemne suisiet ge.

26 Kemzuibe de saja peu kecu au petau ma;

mede kenlangme pe masang kebamme de dap kecu petau ma.

27 Makecime marang kie lama,

nah kecikecet kebamme pelung tiela.

28 Kemieme zing de bamcai pecu au kemriakme gelie cetla;

pa marang mene bam cai, pecu kemriakme ge lie bamla.