1 Mahei kekieege swade hezi keyi be kedet lu,

nah rangkanggeu nah kecak swade hetwakepung be yiki.

2 Keheibe nah kegahbe aide kegucüt bam,

RAMPAUBE au penai hangnana de damkegaibe.

3 Kemriakme keherei gwang kezeu ngaulwe cide gade mbai lula,

dede kemangme cide ga lütla nah cide ziemne reila.

4 Kehenah nah RAMPAUBE kerüt ziehi au

mahei, ketwa nah ringketie.

5 Kenlienme lampui ga hetu nah baih bamla;

pe teilung gum kelume cidungde gade mbai luzie.

6 Hename gede pa dainzwa lungh maisia bi ledeu beulu,

iciude pa hecing kelucai cipau keledeu de gade nreu caili tet dilak.✝

7 Keheime kegahme reu kengkieng teula,

nah rangkang kereleube au releu kebeube baangme da.

8 Mzuikemak leuh gi kegaibe, kekap rum zie,

nah pe rata tie de gah dizie.

9 Mbang kelabe de samlam beuzie,

pa kegahme de ketyeipok mzi beula kecune.

10 Mide rangmsia kelame de gwagi dilu, ciciude regi kecu gah dizie;

nah kesamlim, nah mide kii kecu gah dizie.

11 Helung kemci

pe sui kelabe,

nah sam keyi rang kelabe,

pa au hegwangpei de pe zangbe tei zie.

12 RAMPAUBE maci de pie regum bamla,

dede pa mide kecwame samdung kelien gi dila.

13 Kenghetbe rangla, "Lampuiki ga hingho la!,

Acu namdi sum gade teitset dizie."

14 Kemmha pui mui au hekwaki kecok ge;

cide gage kau kegaime keheibede de RAMPAUBE pe rata sütla.

15 Hename mlung ga ma kemtabe kainzeu pwa bamla,

dede ledeu kegai gade cide gwagi dila.

16 Pe mahei tei ngkiee lu kerane makegahme de teikeherei kelabe,

mede makeheime de peudi kelabe, magah dizie.

17 N kwen ngkeilwe makecime samdung kingnei lu,

nah a maci de gage nlung kailu,

18 kedanemene nang cidungde kainzeu lucai,

nah cidung pelane n muileu ga mtei pwa bam lucai, cide n ziemne keyi ge zie.

19 Peu n kenlum RAMPAUBE da bamlu kerane,

Ih henai cidungde ncu ledeu beula.

20 Ih n ziemne sam camrei raupwa la,

cidungde maci nah keledeu samdung,

21 ncu kesangbe nah nlumlukebui sam ledeu beu kerane,

ciciude ncu langkegaimedung de nang sam kesangbe keli beulu kerane.

22 Kegahme ge gu pa au magah lu de eh rega teu diso,

mede herieki ga kengha teu maikesiame de nneu so,

23 RAMPAUBE ne penui tutiak nzang zie,

nah pa kegahme gu rega teu kedimedung teilung luu teu dizie.

24 Pe rata kesiame de ngngwa zangna teiso,

nah pe lunghop kesiame de ngngwa zangna teiso,

25 mecai nang pe zaidung de keteu luzie

delwe nang n rabe de kengkap gage kaidi lubui.

26 Sampet tei kecu ga kesuizwa eh bateu kecume ge teiso,

mede mikedame pau ruibeu zielie sampet so.

27 Nang peu gailak di cai,

penui nzeu kecang de luu teu dizie.

28 N paume herai tsu kai kenzeude

keu mpetti so.

29 Nang mige pe bata yisüt kecume gede ngau ni? Pa hegwangme dwa ga sap zie;

pa mina magede kemakme dwa ga sap lak.