1 Mipui kemteu pui au peki tei ncuh lula,

dede kemie pui au pekatei pe ba le cide teimsia dila.

2 Masang eh lungh kelame RAMPAUBE de hing eh lungh la,

dede masang mene lungh kelabe pecu ngkaula.

3 Kemieme mui gade pe gim dap kera geutie ge petla

dede kemriakme mui au penuide gum beula.

4 Kauruine kegah ga penui kwak mci bamla

dede mei kekiee ngaulu kera au hetumseu kengkieng ga zie.

5 Kesamsang zierang keteime ge nret lama,

dede kenret zierang keteime kenret ngngi mpetla,

6 Mide rangmsia kelame maci peeila dede ngaulu lama,

dede macet teune kecume au maci ngau relui lula.✝

7 Kemieme dade nreu tet dilu,

kedanemene nang pe mui gade maci ngau gailak.

8 Kemriakme maci au pekatei pe lampui cilu kera,

dede kemieme mie au mide kecwa.

9 Kemau reca ratak tei kegai dau kemieme nui neu bamla

dede makesangme kakga suiyi mzila.

10 N mlung suikesia de nkatei n gu

nah cikemakme n suiyi mzi lama.

11 Mina kesiame ki teimsia dizie

dede kemzuime ki yi reureu dizie.

12 Mina petau lie cetkela lampui ge bam,

dede cide ketsai gage rünne ngngwa gaila.

13 Mige pelung keherei bam liede nui bam lubui

nah suiyi kekamle suisiet ngau di lubui.

14 Masang kemakme au pe zai rehi gade pe ziehi ngau zie

dede keyime ge au keyibe ngau zie.

15 Kemieme maleune nlum la,

dede kemriakme pe pikiet cet teune la.

16 Kemriakme ge kesiabe de hing eh nreu tet dila

dede kemieme au kuusüt eh rangmriak kebeusamdung mlaidi la.

17 Pe rata zette kecube au kemie tah teila

nah makesia ciem riem kelame de mi ngkaula.

18 Macikemakme kemie gum lula,

dede kemriakme de maci teu ziehi tei beula.

19 Mina kesiamedung mina keyime dwaga keumie zie

nah mina kenlienme makesangme kirie ga keumie zie.

20 Makegahbe de au pe kangngwame nede ngkaula,

dede makeheibe au pe zangna kiee sütla.

21 Pe kidame de ncau kelame au kemau teibam dida,

dede makegahme de ngha kelame au samlam pungtu.

22 Makesia cet nah riem kelame kemau teidi la meni?

Dede makeyi tei kera riem kelame mi dade samkakkelu samsang nah nlumlu kebui ngau lula.

23 Mrisüt kegai dau kemmi ngau lula,

dede makerang rünne dige, cide magah gage teu gwanggai beula.

24 Kemteume peurwa au penui mahei da

dede kemieme kemie au penuide kemie rünne teugwang si beula.

25 Makesang zierangme mide kelibeu la,

dede kemau zierangme kenret ngngi mpetla.

26 Mige RAMPAUBE de rüt keludau, pa pecu kenlum bam lula;

ma aidung au pe name de gumlu kera kengking bam ge nzwa zie.

27 RAMPAUBE mie kehing au kering duilet ge lie,

iciu eh mige ketsai baih gade nreulu kerane.

28 Hegwangpei kendu au pe mina kekiee ge kebam gade ngau lula

dede mina si mecai pe au magede ma.

29 Pelung ketieme ge au kecikecet keyi bamla,

dede pe rata zette kelame au kemie keulia bam da.

30 Helung kenciep mipum tei mring beula,

dede mide ngau miriak kecu mira teitim dila.

31 Kegahme de mneu kelabe pecu Damkegaibe de reset bam da,

dede kegahme de ngha kelabe pecu kerüt peu bam da.

32 Mina kesiame de pe bata kesiabedung ne teu ngkau dila,

dede makesangme au ketsai gade de kemsiu ngau lula.

33 Maci au lungcet keyime lung ga bamla,

dede kemieme kakgade pa pecu peu ci lula.

34 Ma petaube tei luge heleuhbe de teu ncuh lula

dede kemau au keheibe ziemne hengam ge.

35 Hegwangpei mriak eh bata teikela kilame de pe suila,

dede pe rata au hengam ta tei kecume ziemne.