1 A na, nang a sam de luulu

nah Ih ncu hezai kaikebeu de kainzeu pwabam lucai,

2 macisam kingneilu

nah kecikecet gage n mlung ngngei gailu.*

3 Nang maci ziemne n nggia kie

nah cide ziemne mragai cai,

4 nang cide de rangkanggeu kepeei nzwa peei cai

nah nang maci kebai pwakebam maheidung kepeei nzwa peei cai,✝

5 iciu lucai nang RAMPAUBE mie kehing de ci luzie

nah nang Tinggwang maci ngau luzie.

6 Kedanemene RAMPAUBE maci peula,

pemui gade maci nah kecikecet gwang la.✝

7 Pa pe suiyi tei kelame ziemne maci hekwa beula,

pa au masang eh tet kelame de gum beula,

8 makesang lampuidung pa gum beula

nah pa pecu nlum kelame lampui gum beuzie.

9 Iciude nang daipaibe samsang, mzui nah matei kensam bi kecu ci luzie,

nah lampui keyi leune ci luzie.

10 Kedanemene maci n mlung ga lüt luzie

nah maci de ne n rabe suiyi tei beuzie.

11 N lungcet dene n mapie beuzie,

kecikecet ne ncu gumbeu zie.

12 Cidungde ne ncu lampui kesia gade keli beuzie,

nah kecwa sam kerangme dade,

13 lampui petaube püt kedime

nah kemui lampui ga tet kelamedung.

14 Penui kemau tei kecudau penui suiyi la

nah kesiaketei de penui suiyi la.

15 Penui masangkemak lampui ga pwala

nah mide cwa eh penui pipa kebai dila.

16 Maci nah n lungcet dene ncu kemmha pui dade,

nah pezai petaukemak pui nah kemta sam kerangdung gade keli beuzie.

17 Pa pe nahpei de pütdi la

nah pa Tinggwang dage samkak kelude nsungta dila.

18 Kedanemene pe ki ketsai ga nghim hung dila,

nah pe pipadung ncu herau gage saugai beuzie.

19 Mina peda kemieme pelane cailigwang dailak

nah penui kering lampuidung de ngau gailak.

20 Cine nang mina keyime lampui ga tetgwang zie

nah mina masang kelame lampuidung sui gwang zie.

21 Kedanemene petau tei eh kelame hangdeube ga lungh dizie,

nah masang kelame cika lungh bam dizie.

22 Dede kesiame de au hangdeube gade keu mpet dizie,

nah kenlum kegahme de cikade keugi dizie.