1 Sam kenciep teu keli kegai gade rata teu nreu lula,

dede sam kesia rata tei ncuh gaila.

2 Kemteume mleu maci de ketwa peula

dede kemieme mui gade kemie sam lwa petla.

3 RAMPAUBE miak au maleune gala,

kesiame nah keyime de kwa eh.

4 Teikengkei mleu au kering tsingbang ge,

dede cwakela mleu au rabe de teitset dila.

5 Kemieme ge pe pei ledeu kebeude mlai la,

dede ledeu kegai gade ci kelume au kemriakme.

6 Makesangme kiga au mahei kekiee bamla,

dede kesiame mangau au pecu tei keherei dila.

7 Kemteume muileu maci teizang beula

dede kemieme mlung au ciciu lama.

8 RAMPAUBE mina kesiame ratakdung ngaurau la

dede kemzuime kekie pe suila.

9 RAMPAUBE au kesia me de ngkau la

dede pa au petau kecube peei kelame de pesui la.

10 Lampui petaube püt kedime keherei kecule ledeu kera kwa bamla,

nah keledeu ngkau kelabe au tsai dizie.

11 Sheol* nah kengkap RAMPAUBE dwaga let pwa bam,

iciu cai mina lungning dainzwa mbai lulai?

12 Mide kii kelame au pecu ledeu kecu pe sui lama;

pa kemriakme da mie lak.

13 Misui yi kebam dau mi zu nuirum bamla,

dede lungrei misui tei tsai dila.

14 Lungcet keyime maci peei la

dede kemieme mui au kemie sam le pui bamla.

15 Keherei kelame teilung au hairei tei bam muila,

dede misuiyi kebamme hengyi bam muila.

16 RAMPAUBE mie hing eh manage kebam au yiki

mahei kekiee ge eh daitei ziebi cimene kebam swade.

17 Keku bam eh ngngwa ginei ketyeibe au

kengaurau eh heteih yitube tyei kebam swade yiki.

18 Pe rata kesiame kesamlim kecu teucuh beula,

dede pelung ketieme ngngwa keyi teugwang beula.

19 Kenghetme lampui au hetu rie nzwa delie,

dede makesangme lampui au puidiki tei pwa kebam nzwa lie.

20 Kemteu nabe pe pei suiyi tei beula,

dede kemiebe pe puide ncaula.

21 Pe peusui tei kemakme kemie ta pe suila,

dede kecikecet kebamme lampui kemzuibe pwala.

22 Puisau kegah ga mariem mau dila,

dede puisau kekiee kebam ga matei petau lula.

23 Mige ma petau tei eh keli kegai dau pe suiyi lula;

peting siakdau sam petaube rang kegai daiyi gede yino!

24 Kemriakme kering lampui lebie pwa hangla,

iciu eh penui Sheol* gade nreu tet dilu kerane.

25 RAMPAUBE ngang kelame ki teimsia dila,

dede pa hemipuidung mabam gum beula.

26 RAMPAUBE mina kesiame kecet ngkaula,

dede ngaukenggia samdung au pe dwade mci.

27 Keregame pe kilung ga ma kehebwak teugwang beula,

dede hetauhenim ngkau kelame ring luzie.

28 Kemzuime au sam keli kecu dwa pe lung gade macetla,

dede mina kesiame au makesia leune rangla.

29 RAMPAUBE au mina kesiame dade mdei dila,

dede pa kemzuime kekie kingneila.✝

30 Mimiak kebaa au milung ga suiyi keugwang beula,

nah samliakeyibe au mipum teihemi beula.

31 Mina kangge lung petau tei kera ncu ledeu kebeu dau nang kingnei lucai,

nang kemriakme kakga bam luzie.

32 Pecu ledeu kegaide mlai kelabe pekatei pecu ncau bam da,

dede pecu ledeu kebeude kingnei kelube maciki lula.

33 RAMPAUBE de kehing au maci ledeu beula,

nah mitwa pung kemak dwa henah railu maisia.