1 Kenlienme mige penui de gwa meliede pak la, dede makesangme au hingho na nzwa kuu.

2 Hangdeube ga kemau de ziemne, peuketeume kiee bam,

dede macet nah maci kebam pei ge dade heleuhbe sap tie lula.

3 Ma kegah pei ge keda kegahme de tei keherei kela de

tingrui kesia ne taktyei bang beu kemak nzwa da.

4 Hezai gi kedime kenlienme de twa la,

dede hezai kai nzeu kelame penuide ngngwa renia la.

5 Kesiame kemzuibe ci lama,

dede RAMPAUBE de pei kelame ma leune ci bam.

6 Magah eh kesang lampui ga tet kelabe au yiki,

mige mahei eh masang kemak lampuidung ga ketet swa.

7 Hezai kai nzeu kelu be au maci kebam napei ge,

dede matyei neu zu kelame de zangna tei kelabe au pe pei de tei hengam la.*

8 Peqai keu kiee eh pe mahei tei kelabe

kegahme de kenggia beu kelame ziemne pe mahei hekwa la la.

9 Mige pe kwen hezai kekingnei gade nreu tet dicai,

pe kekie liede kemneu ge.

10 Kemzuime gede kemau lampui ga sau kebeu be

pekatei pe baih ga kaumie zie,

dede kemau kegahbe au mabam keyi bam zie.

11 Mahei kecume ge pekatei pe miak gade mriak lie bam lubui,

dede kegahme ge kecikecet kebamme ge pecu peei mpetti zie.

12 Makesangme ngking kelu dau, cika kemdu kedi ge bam;

dede kesiame kengking teu kelu dau, minadung de peei mpet dila.

13 Pe mau kebai kedibe de yipet gailak,

dede pe mau pet kelube nah cidungde gi kelube de au ngaugia keulia zie.✝

14 Kerüt gade lungh bammui kelabe* de au samlam pung,

dede keheibe pe mlung tei tak kedi au keherei gage kaugai dizie.

15 Kedi kesia ge au hingho kenrabe mede hegum pe zai kesia ge nzwa lie

makegahme reu ga.

16 Kedi pe lungcet keyi kegahbe au zaisiet ge,

masang kemak de kengkaube pe tingbazie tie zie.

17 Magade mige mide hejai tei lwadi eh mau di liecai,

pa tsai di kemakta hing eh rwapwa kelame ge dizie

nah migede pecu ngha lak.

18 Makesang ga tet kelame de au kai kwak luzie,

dede lampui kenkoi ga tet kelabe au kau zette dizie.

19 Pe deu ga heta tei kela be au taktyei kekiee ge bam zie,

dede kemta caisui kelame au kegah kieesüt zie.

20 Kesamsangme au samlamdung disüt kecu bam zie,

dede mahei zette kedime au saja ngau mene ta dilak.

21 Heneuherüt keulia kecu yima,

dede tangku kwak ge ziemne mina ma teimau dizie.

22 Ma mzaham kecume ge maheidung gage kelwa gaila,

dede pa magah pe reuga gwang kera de ci lama.✝

23 Caugame mige de ledeu gai bi, pecaine pe dade suiyi ngau kiegwa luzie

mina pe mui gade pecu kecwa sam rang kegaime swade.

24 Keheibe de pe pui pe pei gu rega eh, "Mau melie," rangla cai

pa au kengkap kangngwame ge delie.

25 Kehengimme kehebwak teucuh beu la,

dede RAMPAUBE de nlum kelabe au lung yi lu zie.

26 Pekatei pe mlung be de nlum kelabe au kemang kau ge,

dede maci ga tet kela be au kenggi gade mbai dizie.

27 Kegahme de peu kegaime au teumaikesia magede gah dilak,

dede caugame penui dage pe miak ngkuidi bi reset kekieege ngau zie.*

28 Kesiame cuh ge, mina penui katei penuide hebai la;

dede penui kap dige, kemzuime kiee si dila.