1 शाऊल जो ओमे जाआं प्रभुउ सेलाहा धमकी देअलो आन माइत टाकीइलाआ धुंदेमेहें ओतू, तो डाया पुंजाराआ जागे गोयू. 2 आन तियापोअ दमिश्कोअ आराधनालयोअ नावोपोअ यी माहितीइ सिट्टी माग्यी के माटीन बोंईं जो कोडो बी प्रभुउ मार्गाआ विश्वासी देखाय तियाहा बांदीत कोइत येरुसालेमोम लेतावे.

3 पोन जाता जाता जेहेलाम तो दमिश्कोअ आहने पोतू, ताहां एक्काइज जुगोम रोत तियाआ शारी वोल उजालो सोमक्यो, 4 आन तो पुंयींपोअ ओदरीत पोड़्यू आन ओ आवाज उनाअयू, "ए शाऊल, ए शाऊल, तू माहूं काहा तारास कोआड़ेहे?"

5 तिये फुशो, "ए प्रभु, तू कोडू होय?" तिये कोयो, "आंय ईसु होय, जियाहा तू तारास देहे. 6 पोन ओमे उठीत कोइत होयरोम जा, आन ताहूं जो कोइलो पोडनारोहो तो ताहूं कोवात जाय."

7 जे माटी तियाअरी ओता, ते ठावकाज उबा रोत गोया; काहाके आवाज ताहराआ उनाअताते पोन कोडोज ने देखाअतोतो. 8 ताहरुउ शाऊल पुंयींपोअ रोत उठ्यू, आन डोआ उगाड़्या तेहेलाम तियाहा कीज ने हुज्यो, ताहराआ ते तियाआ आथ तोइत कोइत दमिश्क होयरोम लेत गोया. 9 तो तीन दिही जाआं आंद्लूज रोयू, आन ने खादो के ने पिदो.

10 दमिश्क होयरोमेहें हनन्या नावोअ एक विश्वासी ओतू, तियाहा प्रभु दर्शनोम कोयो, "ए हनन्या!" तिये कोयो, "ओय, प्रभु."

11 ताहां प्रभु तियाहा कोयो, "उठीत कोइत तियी गेल्लीम जा जियीही ‘सिदी’ कोतेहे, आन यहुदाआ कोअमेहें शाऊल नावोअ एका तारसुसवालाहा फुस; काहाके पाल, तो प्रार्थना कोअया कोअहे, 12 आन तिये हनन्या नावोअ एका माट्योहो मायते आवत्लु आन तियापोअ आथ मिकत्लाहा देख्यू; काहाके फाशुउ पालित सेके."

13 हनन्ये उत्तर आप्यो, "ए प्रभु, आंय या माट्योअ बाप्तिमेहें डाहटा जोंअं पोअ रोत उनाअयुहू के ये माट्ये येरुसालेमोमेहें ताआ विश्वासी माअहुंहूं खुब तारास देदुहू; 14 आन इंहीं बी ओ डाया पुंजारापोअ रोत आधिकार लेत कोइत आयुहू, काहाके जें माहें ताआ भक्ती कोअतेहें, तियां आखाहा तोइत कोइत लेत जाय."

15 पोन प्रभु हनन्याहा कोयो, "तू जा; काहाके तो बिगर यहुदीइ आन राजहांआं आन इस्राएलवाला माअहोंअ सामने माआं नाव कोतापे तेहें काजे माआं निवड़ीइल्यू माटी होय. 16 आन आंय तियाहा कोहीं के माआ नावोअ काजे तियाहा केहेलो केहेलोह दुख वेठीइलो पोड़े."

17 ताहरुउ हनन्या उठीत कोइत तिया कोअमेहें गोयू, आन शाऊलोपोअ आथ मिकीत कोइत कोयो, "ए शाऊल पाही, जो प्रभु ईसु ताहूं इंहीं आविइलोअ वेले वाटे ताहूं दर्शन आप्योतो, तियेज माहूं मोकल्युहू के ताहूं फाशोअ देखाओ वोले आन पवित्र आत्मा वाअहीं पोआइत जाय." 18 आन ताअहांज तियाआ डोआमेहें रोत खरपण्ये जेहें की तेबी ओदरीत पोड़्यो आन तियाहा देखाओ वोल्यो, आन तिये उठीत कोइत बाप्तिस्मा लेदो; 19 आन रोटू खादू ताहां तियाहा फाशीइ टोणकाय जोड़्यी.

तो थोड़ाक दिही दमिश्कमेहें विश्वासी माअहोंअरी रोयू.

20 तो शाऊल ताब्बुड़ आराधनालयोमेहें जात कोइत परसार कोऊ वोल्यू के ईसु देवोअ बेटुह्हू होये.

21 आखे उनाअनारे बोगलाइत कोइत कोने वोल्ये, "केहें ओ तो माटी नाहां के जो येरुसालेमोमेहें या नावोअ भक्ती कोअनाराहां आरवीइतुतो? केहें ओ इंहीं याअकाजे ने आयुतो के तियांहां बांदीत कोइत मुख्य पुंजाराआ जागे लेत जाय?"

22 पोन शाऊल जाअखुज ताकतवान ओवतू गोयू, आन यी गोठीइ पुरावू आपित कोइत के ईसुज ख्रिस्त होय, तो दमिश्कमेहें रोनारा यहुद्याआं सोब बोंद कोअतू रोयू.

23 जेहेलाम वारुज दिही ओत गोया, ताहराअ यहुदी मिलीत कोइत तियाहा माईंत टाकीइलोअ कदर काड्यी. 24 पोन तियांआं कदर शाऊलोहो जाआंत गोयी. ते तियाहा माईंलाअ काजे रातेन दिही होयरोअ गेटोपोअ हेंहींत बोहीत रोताते. 25 पोन राती तियाआ सेला तियाहा बोखामेहें बोहाड़ी देदू आन होयरोअ मेरेमेरे बांदल्या पितड़ाआ खिड़कीमेहें रोत निसे उतारी देदू.

26 येरुसालेमोमेहें पोतीत कोइत तिये सेलांअरी पेलाइलाअ कोशित कोअयी; पोन आखा तियाहा बिताते, काहाके तियांहां विश्वास ने ओतू, के तोबी सेलू होये. 27 पोन बरनबास नावोअ एक सेलू ओतू, तिये तियाहा मदत कोअयी, तो तियाआ आरीइ सेलाआ जागे लेत जात कोइत तियांहां कोत आप्यो, के ये कि कोइते वाटे प्रभुहू देख्यू, आन तिये याअरी केहेलिही गोठी कोअयी; आन कोयो के ये दमिश्कमेहें की कोइते वोडी हिम्मतो वाअहीं ईसुउ नावसे परसार कोअयू. 28 तो तियांअरी रोयू आन येरुसालेमोमेहें आवतू जातू रोयू आन हिम्मते वाअहीं प्रभुउ नावसे परसार कोअतू रोयू. 29 आन ग्रीक बाशा गोगनारा यहुद्यांअरी गोठी कोइत सोबा-सोबी ओत जातुतो; पोन ते शाऊलोहो माईंलाअ कोशित कोआ वोल्या. 30 ओं जाईंत कोइत विश्वासी पाही शाऊलोहो केसरिया लेताया, आन तारसुस होयरोम मोकली देदू.

31 एहें कोइत आखे यहुदीया, गालील आन, शोमरोनोमेहें मंडड़ीही आराम मिल्यू, आन ते पान्गीइती गोयी; आन पवित्र आत्माआं शांतीमेहें आन प्रभुउ बिकेमेहें वादती गोयी.

32 तेहलाम एहलोहो ओवो के पेत्र हारेक जागे फिरतू फिरतू, तियां देवोअ माअहोंअ जागे बी पोतू जें लुद्दामेहें रोतेते. 33 तिहीं तियाहा एक एनियास नावोअ लखवाअ बिमारीवालो माहुंउं मिल्यो, जों आँठ वोरह्ये ओत गोये खाट्लाजमेहें ओतो. 34 पेत्रे तियाहा कोयो, "ए एनियास! ईसु ख्रिस्त ताहूं हुदारेहे. उठ, ताआ आथरुउ विस." ताहरुउ तो ताब्बुड़ उठीत उबू रोयू. 35 ताहरोअ लुद्दा आन शारोनोम रोनारा आखा तियाहा देख्योन प्रभुउ वोगेहे वोल्ये.

36 याफामेहें तबीता* मोन्ज्ये दोरकास नावोअ एक विश्वासी बाय रोतीते. ते खुब हाजे हाजे कामे आन दान कोअतीते. 37 तियांज दिहोमेहें ते बिमार पोड़ीत कोइत खारबात गोयी; आन तियां तियीही उंगलावीत कोइत उपर्‍यीइ खुलीम मेक्यी. 38 याअकाजे के लुद्दा याफा सेरोअ आहने ओतो, सेला उनाअया के पेत्र तिहीं होय, ताहां बेन माटी मोकलीत कोइत तियाहा विनंती कोअयी, "ताब्बुड़ आमाआं जागे आवेए." 39 ताहरुउ पेत्र उठीत कोइत तियांअरी गोयू, आन जेहेलाम तो तिहीं पोत्यु ताहां तें तियाहा उपर्‍यीइ खुलीमेहें लेत गोये. आन आखी रोंडाअली बोईं रोड़ती रोड़ती तियाआ जागे आवित कोइत उबी रोयी, आन जे डोगले आन साअके तबीता तियांअरी रोत्ली तेहेलाम जिवती ओती ताहां बोणायेते, देखाड़ी वोल्यी. 40 ताहरुउ पेत्र आखाहा बारथे काडी देदे, आन मांड्या पोड़ीत कोइत प्रार्थना कोअयी आन तोड़ोअहें पालीत कोइत कोयो, "ए तबीता, उठ!" ताहरीइ तियी डोआ उगाड़्या; आन पेत्राहा देखीत कोइत उठीत बोठी. 41 पेत्र तियीही आथ आगाड़ी कोइत उठाड़्यी, आन आखा विश्वासी माअहोंहों आन रोंडोअ बोईंहीं हादीत कोइत तियीही जिवती कोइत देखाड़ी देदी. 42 ए गोठ आखा याफा सेरोमेहें पसरीत गोयी; आन वारुज जोंअं प्रभु पोअ विश्वास कोअयू. 43 आन पेत्र याफामेहें शिमोन नावोअ एका सांबड़ाआ धंदू कोअनाराअहीं डाहटा दिही जाआं रोयू.