Mateus 23

कायदाआ मास्तर आन फरिसी यां रोत जाबालीत रोवा

1 फाशुउ ईसु माअहोंहों आन तियाआ सेलाहां कोयो. 2 "कायदाआ मास्तर आन फरिसी मोशेए गादीपोअ बोठाहा; 3 तियाहा काजे ते तुमुहूं जों किबी कोय, तों मानजा आन कोअजा, पोन तियांआं होस कामे मा कोअहा; काहाके ते कोताहा खोरा, पोन नाहां कोअता. 4 ते जियाहा उसलीइलोअ बी कठीण होय, एहेलाहा पाअया वोजाहा बांदीत माअहोंअ खांदोपोअ मिकी देताहा; पोन ते तियांहां आंगी वाअहीं जाआं आधार नाहां देता. 5 ते तियांआं कामे माअहोंहों देखाड़ीलोअ काजे कोअताहा: ते तियांआं आथोमेर्‍येए वसन लेखल्ये पत्रे पोले कोअताहा, आन तियांआं साअकाआ कोरी नांबी कोअताहा. 6 पांगातीमेहें मुख्य मुख्य जागा, आन आराधनालयोमेहें मुख्य मुख्य जागा तियांहां गोमताहा. 7 बाजारोमेहें ‘सलाम,’ आन माअहोंमेहें ‘मास्तर’ कोवड़ाइलोअ तियांहां हाजो लागेहे. 8 पोन तुमू ‘मास्तर’ मा कोवड़ाअहा. काहाके तुमू पाव्हीइले होय आन तुमा आखाआ एकुज मास्तर होये. 9 आन यी धरती पोअ तुमू कोडाहा ‘बा,’ एहें मा कोहा, काहाके तुमाआं होरगामेहें एकुज आब्हू होये. 10 आन मालक बी मा कोवड़ाअहा काहाके तुमाआं आखाआ ख्रिस्त ओ एकुज मालक होय. 11 जों कोडो तुमामेहें वोडो होय, तो तुमाआं सेवक बोणे. 12 जों कोडो सोताहा वोडो माने, तों हानो बोणे आन जों कोडो सोताहा हानो बोणावेहे, तों वोडो बोणे."

कायदाअ मास्तर आन फरिसीइ ढोंगड़ायीइ शिक्शा

13 "ए वोडार्‍या! कायदाअ मास्तर आन फरिसी, तुमाआं कि हाल ओवे! तुमू माअहों विरुध्दामेहें होरगाआ राजोअ बाएं बोंद कोअताहा, आन नेते तुमू तियामेहें फोहताहा के ने तियामेहें फोहनाराहां फोहुंहूं देताहा. 14 ए वोडार्‍या! कायदाअ मास्तर आन फरिसी, तुमाआं कि हाल ओवे! तुमू रोंडाअली बोईंइ कोओहो खात जाताहा, आन देखाड़ीलोअ काजे जाअखीलिही वाआ जाआं प्रार्थना कोअता रोताहा: तियाहा काजे तुमुहूं वादार डोंड जोड़े.*23:14 ओं वसन थोड़ाक जुना लेख्यामेहें नाहां जोड़तो

15 "ए कायदाअ मास्तर आन फरिसी, तुमाआं कि हाल ओवे, तुमू ढोंगी! तुमू एका जोओंहों तुमाआं वोगेहे वालीइलोअ काजे आखा दोर्‍या आन देसोमेहें फिरताहा;आन जाहां तो तुमाआं वोल आवित जाहे, ताहां तियाहा तुमा रोत बेन वाटा नरकाआ भागिदार बोणावी देताहा!

16 "ए आंदला पुढार्‍यों, तुमाआं कि हाल ओवे! तुमू सिकाड़ताहा के, ‘जर एकदो मंदिरोअ शप्पत खाय ते किज ने, पोन जर मंदिरोअ होनाअ शप्पत खाय ताहां तों बांदाइत जाय.’ 17 ए फोगा आन आंदलां! की वोडो होय, होनो के मंदिर, जों होनाहा पवित्र बोणावेहे? 18 तुमू बी सिकाड़ताहा, ‘जर एकदो देवान्‍याआ शप्पत खाय ते कीज ने, पोन जे भेट देवान्यापोअ होय, जर एकदो तियाआ शप्पत खाय ते तो बांदाइत जाय.’ 19 ए आंदलां! की वोडो होय, भेट के देवान्यो जियापोअ भेट पवित्र ओवेहे? 20 तियाहा काजे जों देवान्याअ शप्पत खाहे ताहां तों तियाआ, आन जो किबी तियापोअ होय, तियाआ बी शप्पत खाहे. 21 आन जों मंदिरोअ शप्पत खाहे, तों तियाआ आन तियामेहें रोनाराआ देवोअ बी तो शप्पत खाहे. 22 ✝23:22 यश 66:1; मत्तय 5:34 आन जो होरगाआ शप्पत खाहे, तो देवोअ राजगादीइ आन तियी पोअ बोहनाराअ बी शप्पत खाहे.

23 "ए ढोंगी कायदाआ मास्तर आन फरिसी, तुमाआं जुदी विते! तुमू पुदिना, वरालो, जिरो याआं दाहवू भाग ते आपताहा, पोन तुमू नियमोअ महत्वाआ गोठी मोन्ज्ये: न्याय, दया, विश्वास ए गोठी तुमू सोड़ी देताहा; तुमू ए गोठी बी मानता आन ते गोठी बी ने सोड़ता ताहां हाजो आवतो.✝23:23 लेवी 27:30 24 ए आंदला पुढार्‍यों, तुमू सिमणाहां ते टाली देताहा, पोन उटड़ाहा गिइंत लेताहा!

25 "ए ढोंगी कायदाआ मास्तर आन फरिसी, तुमाआं कि हाल ओवे! तुमू वाटकी आन ठाली उपोअ उपोअ ते उजालताहा, पोन ते मांयते हिंसा, आन स्वार्थाम पोआले होये. 26 ए आंदला फरिसी, पेल वाटकी आन ठालीही मायतेए वोगेहे रोत उजाल, ताहांज ते बाअथे बी खोरो उजलीइल्यो रोय!

27 "ए वोडार्‍या कायदाअ मास्तर आन फरिसी, तुमाआं कि हाल ओवे! तुमू रंग लागाड़ल्यी कबरेए होस होय जो उपोअ रोत ते हाजो बी देखाअहे, पोन मांयते ते मोल्या माअहोंअ आटके आन आखी जातीइ घाणी वाअहीं पोआली होय. 28 एहेंज कोइत तुमू बी उपोअ रोत धर्मी देखाअताहा, पोन मांयते ढोंगड़ाय आन खाराबी वाअहीं पोआइत रोयाहा."

फरिसीहीं डोंड

29 "ए वोडार्‍या कायदाअ मास्तर आन फरिसी, तुमाआं कि दशा ओवे! तुमू भविश्यवक्ताआ कबर होबाड़ताहा आन धर्मीइ कबर बोणावताहा. 30 आन कोताहा के, ‘जर आमू आपाआ डायहांअ दिहोमेहें रोता, ताहां ते भविश्यवक्ताआं खुनोमेहें भागिदार ने बोणता.’ 31 पोन जियां भविश्यवक्ताहां माअया, तियां खुनीइं तुमू पोर्‍या होये, एहेलिही तुमू सोताहा साक्शी आपताहा. 32 ताहां, जावा, आन तुमाआं डायहां सुरवात कोअल्यो आरदो पापोअ कुंडो पुरो पोई द्या! 33 ✝23:33 मत्तय 3:7; 12:34; लुक 3:7 ए हापों, आन हापोंअ पिलां! तुमू नरकाआ डोंडोम रोत कि कोइत वासाअहा? 34 तिहींवाअहीं पाला, आंय तुमाआं जागे भविश्यवक्ता, हुशार माट्योहों, मास्तरोंहों नेहें मोकलोहो; आन तुमू तिहींमेएं थोड़ाक जोओंहों माइत टाकहा, आन क्रुस खांबोपोअ टांगहा; आन थोड़हाहा तुमाआं आराधनालयोमेहें सापका देहा, आन एका होयरोमेहें रोत एका होयरोम ओड़ताज फिरहा. 35 ✝23:35 उत्प 4:8; 2 इति 24:20-21 या वाअहीं धर्मी हाबेलो रोत ते बिरीकियाआ पोर्‍यू जखर्‍याआ जाआं, जियाहा तुमू मंदिर आन देवान्याअ विसमेहें माईंत टाक्यु, जेता बी धर्मी माट्योंअ रक्त धरतीपोअ वोहाड़्योय, तियां आखाआ खुनोअ पापोअ डोंड तुमाआं मुंडी पोअ आवित पोड़े. 36 आंय तुमुहूं खोरो कोहो, के यां आखा खुनोअ डोंड यी पिढ़ी पोअ आवित पोड़े!

ईसुउ येरुसालेमोअ काजे मेर

37 "ए येरुसालेम, ए येरुसालेम! तू जो भविश्यवक्ताहां माइत टाकेहे आन जियांहां ताआ जागे खबर्‍या मोकल्या तियांहां डोणाटेहे! केताहा तेबी वाआ माआं इश्शा ओवी के जेहलीही कुकड़ी तियीइ पिलाहां तियीइ फाकड़ाआं थुड़ी एकठे कोअहे, तेहेंज कोइत आंय बी ताआ पोर्‍याहा एकठे कोइत लेंव, पोन ताहूं ने गोम्यो. 38 पाला, ओमे तुमाआं मंदिर उजाड़्यो पोड़े. 39 काहाके आंय तुमुहूं कोहो, के ओमे रोत जाअहूं जाआं तुमू ने कोहा, ‘आशिर्वादीत होय तो, जो प्रभुउ नाव से आवेहे’ ताअहूं जाआं तुमू माहूं फाशेए केदिहींज ने देखहा."