16 Mbakwajoopa Atati, na jonojwe apakumpekeanga Ajangatii jongi apakutama na mwangota machobha goa. 17 Jonojwe nga Mboomo ja Annoongo jwaalangia ukweli gwa Annoongo. Bhandu bha pachilambo ngakombola kwaapokela ligongo ngakombola kwalola wala kwaamanya. Nambo mwangota ntendakwamanya ligongo abhi pamo na mwangota na atama nkati jinunji."

18 "Pambakubhoka ngannekanga handa akaakebha, mbakubhuja kabhele kutama na mwangota. 19 Tangu kachoko bhandu bha pachilambo ngamonanga kabhele, nambo mwangota mpakumonanga, ligongo mbakubhee naamomi kabhele, na mwangota mpakubhee na umomi gwa kweli. 20 Lichobha lyalela palipakuhika mpakumanya nenga kubhee mile nkati ja Atati, na mwangota mmilinge nkati jangu, na nenga mile nkati jinunji."

21 "Mundu joajola jwapokela malagilo gangu na kugakamula, mundu jonojwe jwambala nenga. Na Atati atenda kumpala jonijola jwambala nenga, na nenga mbakumpala na kuchilangia kwaachabhe."

22 Ngapena Ayuda, ngabha jonijola Isikalioti, akaalobholela, "Hangwana, ipakubheebholi mwenga kuchilangia kwachitu jika na ngabha kwa bhandu bha pachilambo?"

23 Ayesu akaajangula, "Bhandu bhala bhabhambala nenga bhapakutendanga chinaalobholelanga na Atati bhangu apakwaapalanga bhena bhandu, nenga na Atati bhangu tupakuhikanga kwaachinu kutama nabho. 24 Mundu joajola jwangambala nenga ngatenda chinaalobholela. Na ngani jimujijoha ngabha jangu, bali jibhoka kwa Annoongo jwandumite."

25 "Ndekunnyigananga hikubho yenjeni mi pamo na mwangota. 26 Atati bhangu apakuntumilanga Ajangatii, jonojwe nga Mboomo ja Annoongo kwa lina lyangu, apakunnyigangakila hikubho yoa na kunkomboanga kila chilebhe chingakannobholelanga."