1 हति भेला राङ लोब्टुतेबा येशुयि तेहा लेप्ते टिसोङ, "तेङलायि राज्यला पोरोले छेया सुना?" 2 ख्युइ च्यिटा टिमा झिला धुनला क्ये ताङदे हतिबे उइला लाङसोङ। 3 राङ नाइसोङ, "तेम्बारे, ङा खेला नाज्याइ, सम घ्युरतु च्यक्ते खे च्यिटा टिमाबा च्वरा माच्युङना जब याङ तेङलायि राज्यला स्यु मिङ्युइबा। 4 सुइ धि टिमा च्यिटा च्वरा राङला टुङबो सुन, हति राङ तेङलायि राज्यला पोरोले छेया होङान ना। 5 सुइ ङाहि मिनला धि च्वरा च्यिटाला ङ्यानकिन, हति ङाला ङ्यान किन।"

6 "हिन्नाङ सुइ ङाहि थोला हिछेकिङान धि टिमाबे नाङने चिला तिक्पा कितु झ्युकिन, बरु हति झिङबाला लाकोर छेयायि टोउ तारे तिङरिङमुवा छो छोम्मुवाला धोयाप लना।" 7 "तिक्पा कितु झ्युयापयि छोएयि चाला धि संसारला धिक्कार! तिक्पा कितु ख्योङान छोएता हुन, हिन्नाङ धिक्कार, हति मिला सुइ चाने तिक्पा कितु झ्युयापयि छोए हुन। 8 ख्युइ लाक्पा या काङबि ख्योएला तिक्पा कितु झ्यु ना हतिला तुप्ते टिम। लाक्पा ङि कार राङ काङबा ङिकार नामयाङ मिस्यिङानयि मेला ढिमाले त बरु लेम्बा राङ ढुडिया च्युङदे मिजेयि नाङला स्युयाप ख्युइ चाला ल होङान ना। 9 ख्युइ मियि ख्योएला तिक्पा कितु झ्युना हतिला तोन्दे टिम। मि ङि कार ङ्याबो ङ्यालबायि मेला ढिमाले ता मिजि च्युङदे मिजेयि नाङला स्युयाप ख्युइ चाला ल हुन।"

10 च्याङबो क्याइरे त्योए, खे धि टिमातेबे नाङने सु छ्युङदोए माके। चिचालानाना ङा खेला नाज्याइ, तेङलाला हतिबे तेङलायि लोन खेरङानतेबे ङाहि आकेला बारतै झ्यालज्याइ खुङान ना। 11 चिचालानाना मियि पिजा क्युक्युरातेबाला क्योतु लेलेबा ना।✝ 12 "खे च्हि विचार किन? मि रिनयि लु क्याने लु झि घोख्यामदे पुइना, ख्युइ खला सि राङ च्युरकु ला ताङदे टायि होला पुते हति घोख्यामदे ढोङान चिला फातु मिढुवाइ? 13 तेम्बारे ख्युइ हतिला ठेना, तेम्बारे ङा ख्योएला नाज्याइ, हति घोख्यामदे मिढोङान हति खला सि याङ च्युरकुले क्येना हति चिकि चाला खो काङान ना। 14 हति च्वरा क्याइरे तेङला ना हो एता खि आकेयि धोप्पा धि धु, कि धि टिमाबे नाङने याङ च्हि याङ मासि मायोङ।"

15 "ख्युइ भाइयि ख्युइ विरोध्रला अपराध क्याइना, पुते खे ङि मात्र होतितुइना हति दोष तोन। हति ख्युइ ताम ङ्यान ना, ख्युइ भाइ ख्युरि च्युङदे।✝ 16 हिन्नाङ ख्युइ माङ्यान ना राङ ङ्याबो मिरको च्हि वा चिले मा ङि खेर राङ ङि या सुम साछि लाम्ला ताम पोरो पक्का कि।✝ 17 तेम्बारे हति हतिबे ताम ङ्यानयाप याङ माङ्यान ना, चर्चला नोइ। हति चर्चयि नानाइबा याङ माङ्यान ना, हति ख्युइ चाला यहुदि मान्ते मि राङ कर तुइङान च्वरा ना।"

18 "तेम्बारे, ङा खेला नाज्याइ, खि पिरथिविला च्हि तेमकिन, हति तेङलाला तेमङान ना। तेहि खि पिरथिविला काङ ढोलिन, हति तेङलालाङ ढोलङान ना।" 19 "याङ तेम्बारे ङा खेला नाज्याइ, पिरथिविला खि नाङने ङि ताम ढिक्ते चिगा लाना, हति तेङलायि ङाहि आकेने खि चाला होङान ना। 20 चिचालानाना काँहा ङि या सुम ङाहि मिनला झोमिन, हतिया ङा मितेबे उइला हुन।"

21 तेहि येशुयि तेहा लेप्ते पत्रुसयि नाइसोङ, "प्रभु, ङाहि भाइयि लाम्मा चोम ङाहि विरोधला अपराध क्याइसोङ ङाहि हतिला माप तेरच्ये? च्हि लाम्मा तुन थु?"* 22 येशुयि हतिला नाइसोङ, "ङा खेला नाज्याइ, लम्मा तुन माना, खलसुम राङ च्यु गुणा लाम्मा तुन।" 23 "हतिचाला तेङलायि राज्य क्याल:बो झि ङ्याबो थु ङ्युइकिन, सुइ रेँ यक्पुवा ङ्याबो च्हि खेरयापयि धोप्पा क्याइरे। 24 जब हति च्हि खेराला छेलसोङ, तोङ च्यु सेरयि सिक्का रिन खेराङान मिझि ख्युइ तेहा ख्योसोङ। 25 हिन्नाङ हति मियि च्योङ माङ्युबा राङ हति ताक्पोयि हतिला राङ हति केरमानला राङ पिजा पोमु राङ हति पोरो क्यु चोँरे रिन च्योङयापयि आदेश च्युक्तेलो।" 26 "तेहि हति यक्पुवायि पुइमु चुरे हति काङबाला छ्या पुलदे नाला छेलसोङ, ‘ताक्पो, ङाला टझि कु, ङा ख्युइ रिन पोरो च्यातोङ।’ 27 तेहि हति यक्पुवायि ताक्पोयि ङिङच्येरे हतिला ताङदेलो, राङ हति रिन माप क्याइसोङ।" 28 "हिन्नाङ हति यक्पुवा थोन्दे ढुइतुइना राङ ङ्याबो होएता यक्पुवाबे नाङने चिला ठातेलो, सु ख्युइ ङुलयि क्या सिक्कायि रिनयि हिनालो। हतिला झ्यिङबाला सुङदे हतिला नाइसोङ, ‘ख्युइ रिन च्योङ।’" 29 "हिन्नाङ हति ङ्याबोयि यक्पुवायि घो कुरे हतिला स्युवा क्यापसोङ, ‘ङाला टिझि कु, ङा ख्योएला पोरो च्योङ ज्याइ।’" 30 "हिन्नाङ हति माङ्यानसोङ, राङ पुते रिन माच्योङथु हतिला माच्योङ थु खोला झ्याल्ला तिरेलो। 31 हति ङ्याबोयि यक्पुवातेबे हतिबा पोरो थोङदे राङ सम तु च्युङदेलो। हतिबा पुते धि पोरो च्युच्युवा रेँ ताक्पोला स्यातेलो।"

32 "तेहि ताक्पोयि हति यक्पुवाला रेँ चिना क्ये ताङदे नाइसोङ, ‘ए सम अल यक्पुवा, ख्युइ ङाला स्युवा क्यापसोङ, राङ ङाहि ख्योएला ख्युइ रिन माप क्याइरे। 33 ङाहि ख्युइ थोला ङिङच्येच्येबा च्वरा ख्युइ याङ ख्युइ ङ्याबोयि यक्पुवाला ङिङच्येयाप मानाइ?’ 34 तेहि हति ताक्पोयि स्येताङ लाँरे हतिला रिन पोरो मा च्योङथु सिपाहितेबे लाला स्यातेलो।"

35 तेहि येशुयि च्युइ झि क्याइसोङ, "खि रेँ समने माप माक्याइ थु तेङला ला होएता ङाहि आकि खेला हति च्वरा व्यवाहार किङान ना।"