1 जब हतिबा यरुश्लेमयि धुनला जैतुन रियि बेथफागेला लेप्छारते, तेहि येशुयि लोब्टु ङेला जु नाइरे चाँसोङ, 2 "खे धुनयि युलला क्यु। हतिया क्योबि पाल्ला खेला टे झि राङ हति टेटु तातामा ठेङान ना। हतिला टोलदे ङाहि तेहा ख्याला। 3 सुइ याङ खेला चिगा नाइना, ‘प्रभुला धि कोइबा धु’ नाइ राङ हति हतितुइना राङ हति चोँङान ना।" 4 ङोन्सेखिलङानबे नानाइबा वचन पुरा होङ नाइरे धि च्युच्युवा हिना, 5 "सियोनयि पुमोला नोइ, तोइ, खि क्याल:बो खि तेहा हुन्दु, लेम्बा च्युङदे टेयि थोला स्योन्दे, टेयि च्यिबा, टेटु झिकि थोला।"✝21:5 जकरिया ९:९ 6 तेहि लोब्टुबा पुइसोङ, राङ येशुयि हतिबाला लाइ कोकोइबा च्वरा क्याइसोङ। 7 हतिबे टे राङ हति टेटु ख्योसोङ, राङ हति थोला रेँ कोहिला राराला तिङदे, राङ खो हति थोला स्योनसोङ। 8 मितेबे तुमला लेइराङयि रेँ कोहिला लामला तिङदेलो, राङ स्यानतेबे तोङबोङयि ढाला तुप्ते लामला तिङदेलो। 9 ख्युइ ताङला राङ च्येला ढोङान मि झोमतेबे जु नेन राङ क्ये तोन्देलो, "दाउदयि पिजा होसन्ना! किप्पो खो, सु परमप्रभुयि मिनला हुन! परमप्रभुला होसन्ना!"✝21:9 भजनसंग्रह ११८:२५-२६

10 जब येशु यरुश्लेमला स्युरेलो, भजार पोरोला टाइक्ये च्युङसोङ। मितेबे ढियाला छेलसोङ, "धि सु ना?" 11 मि झोमयि मितेबे जवाक पिनसोङ, "धि गालिलयि नासरतने लेलेबि ङोन्सेखिलङान, येशु ना।"

12 येशु कजसुबायि मोनलाम क्यासि खिमला स्युसोङ। तेहि ख्युइ मोनलाम क्यासि खिमला ङ्योङान छोङान पोरोला त्येसोङ, राङ आलाइ च्येङानयि च्यकचे, राङ ङोम्मु छोङानयि त्योएसा ल-ल क्यापसोङ। 13 ख्युइ हतिबाला नाइसोङ, "धि पवित्रशास्त्रला टिटिबा धु, ‘ङाहि खिम मोनलाम क्यासि खिम नेन।’ हिन्नाङ खि धिला डाकुतेबे अड्डा सोइदु।"✝21:13 यशैया ५६:७; यर्मिया ७:११ 14 काना राङ ढुढियातेबा मोनलाम क्यासि खिमला ख्युइ तेहा लेप्सोङ, राङ ख्युइ हतिबाला टाक्तु च्युसोङ। 15 हिन्नाङ जब घोबा पुजारितेबा राङ शास्त्रिबे ख्युइ क्याक्याइबि हा:लाइयापयि लाइ थोङदे, राङ स्यारा नोज्युङयि मोनलाम क्यासि खिमला, "दाउदयि पिजाला होसन्ना" नेन राङ क्ये तोतोना थोइरे, हतितुइना हतिबा स्येताङ लाँरेलो, 16 राङ हतिबे खोला नाइसोङ, "थोयिन धु, धिबे च्हि नेन धुइ?" तेहि येशुयि हतिबाला नाइसोङ, "हो, थयिनदु। खि टटबा मेताइ, ‘च्यिटाका राङ होमा थुङान च्यिबातेबे खाने ख्युइ पुरा छे तेतेका होतो?’"

17 तेहि येशु हतिबाला पोरते खो यरुश्लेम भजारने थोन्दे बेथानियाला पुते हतिया छान झि ढोम्बोला ताते।

18 नामे थरह भजारला हुइतुइना येशु टोपा तसोङ। 19 लामयि नेमुला ख्युइ भेलडुयि तोङबोङ झि थोङसोङ। खो हति तोङबोङयि धुन्ना लेप्सोङ, हिन्नाङ हतिला ङोलो अर्थात स्यान च्याङ माखुसोङ। तेहि ख्युइ हतिला नाइसोङ, "ता याङ ख्योएला नामयाङ ढेबु मा छ्या" राङ हति भेलडुयि तोङबोङ हतितुइना राङ काम छारसोङ। 20 धि थोङदे लोब्टुतेबे हा:लाइरे नाइसोङ, "धि भेलडुयि तोङबोङ च्हिरु क्याइरे युप्पु झिला काम छारसुइ?" 21 येशुयि जवाक पिन्दे हतिबाला नाइसोङ, "तेम्बारे, ङा खेला नाज्याइ, खेला हिछे होतो राङ जबयाङ संका माक्याइना, भेलडुयि तोङबोङला च्हि क्याइरे हति मात्रा माना, हिन्नाङ धि रिला याङ ‘कोकदे छो छोम्मुवाला ङिल’ नाइनाङ सो होङान ना। 22 हिछे क्याइरे मोनलामला च्हि लाँनाङ हति ख्योएला खुङान ना।"

23 खो मोनलाम क्यासि खिमयि नाङला स्युसोङ, तेहि ख्युइ छोइ तेरितुइना घोबा पुजारि राङ जनतायि केवाकिङान गुरुतेबा ख्युइ तेहा लेप्सोङ, राङ नाइसोङ, "काङ आङयि ख्योए धि लाइ किन, राङ सुइ ख्योएला धि आङ पिन्सुइ?" 24 येशुयि हतिबाला जवाक पिन्सोङ, "ङा याङ खेला टिवा जि ढिज्याइ। ङाला हति जवाक पिन्ना, ङा काङ आङयि धि लाइकिन, सो खेला स्येतोङ। 25 युहान्नायि बप्तिस्मा काने च्युच्युवा ना? तेङलाने कि मिने?" हतिबा राँराँसा जु नेन राङ फाला छ्युला नारे क्याइसोङ, "तेङलाने नाइना, ख्युइ ‘हति हिन्ना खि खोला चिला हिछे माक्यइबा?’ नाङान ना। 26 हिन्नाङ मिने नाइना, ङेला मितेबे झिटा होतो। चिचालानाना पोरोयि युहान्नाला ङोन्सेखिलङान हिना नाइरे मानि किन।" 27 हतिचाला हतिबे येशुला जवाक पिन्देलो, "ङेला छ्या मेता।" ख्युइ हतिबाला नाइसोङ, "ङा याङ काङ आङने धि लाइ किन, सो खेला मिना।"

28 "खे च्हि विचार किन? मि झिकि पिजा ङि होतोलो। ख्युइ छेयायि तेहा पुते नाइसोङ, ‘पिजा पुते तिरिङ अंगुरयि भारिला लाइ कि।’ 29 हति जवाक पिन्सोङ। ‘ङा मिढो।’ हिन्नाङ तेहि च्येला घ्योप्पा केरे पुतेलो।" 30 "तेहि स्यान ङिबायि तेहा पुते ख्युइ हति च्वरा राङ नाइसोङ। हति जवाक पिन्सोङ, ‘ङा ढोज्याइ।’ हिन्नाङ मापुतालो।" 31 "ता धि ङि नाङने सुइ आकि धोप्पा ङ्यानसुइ?" हतिबे जवाक पिन्सोङ, "छेयाति।" येशुयि हतिबाला नाइसोङ, "तेम्बारे, ङा खेला नाज्याइ, कर तुइङान राङ पातान्नितेबा खेले ताङला कजसुबायि राज्यला स्युकिन। 32 चिचालानाना बप्तिस्मा तेरङान युहान्ना खि तेहा केवायि लाम तोन्दु लेप्ते, हिन्नाङ खि ख्युइ थोला हिछे माक्याइसोङ। हिन्नाङ कर तुइङान राङ पातान्नितेबे ख्युइ थोला हिछे क्याइसोङ। खि धि थोङदे याङ घ्योप्पा माक्याइसोङ, तेहि ख्युइ थोला हिछे माक्याइसोङ।"

33 येशुयि नाइसोङ, "स्यान प्ये ङ्योन। स्हा स्यिङ छेया होएते मिझि होतो, सुइ अंगुरयि भारि सोइसोङ, तेहि हति फाला छुलोला भार क्यापते हतिया अंगुर स्युङयापयि स्योङबा पोरते, राङ सो क्यासि खिम सोइसोङ। तेहि स्याइला पिपिनि मिबाला हति जिम्मा पिन्दे खो फियि देशला पुतेलो।"✝21:33 यशैया ५:१-२ 34 जब ढेबयि भेला धुनला लेप्सोङ, ख्युइ स्याइला पिनि मितेबे तेहा ढेबुयि रेँ थोपयापयि भागते लोङदु यक्पुवाबाला चाँरेलो। 35 "हिन्नाङ स्याइयि मितेबे ख्युइ यक्पुवातेबाला सुङदे चिला क्यापसोङ राङ, स्यानतेला सेसोङ, राङ स्यानतेला टोउयि क्यापसोङ। 36 याङ ख्युइ ताङलाने केना मा यक्पुवा चाँरेलो, राङ हतिबे हतिबा लाङ हति च्वरा राङ बानि व्यवाहार क्याइसोङ। 37 ‘ङाहि पिजाला ता हतिबे सम्मान क्यायोङ’ नाइरे टन्दे, च्येस्युवाला ख्युइ रेँ पिजाला याङ हतिबे तेहा चाँसोङ।" 38 "हिन्नाङ स्याइयि मितेबे पिजाला थोङदे खोरे नाङला नारे क्याइसोङ, ‘धि नि ता होङानयि आङकिङान मिना। सअ, हतिला सोता, राङ हति आङ लाला ख्युवा।’ 39 तेहि हतिबे खोला सुङदे अंगुरयि भारि फिला खेरसोङ राङ हतिला सेसोङ।" 40 "हतिचाला जब अंगुरयि भारि ताक्पो हुन, हतितुइना हति स्याइ मितेबाला च्हि क्यायोङङि?" 41 हतिबे खोला नाइसोङ, "ख्युइ हति अल मितेबे स्युल राङ ततु झुङान ना, राङ अंगुरयि भारि स्यान स्याइयि मिला जिम्मा तेराङान ना, सुइ खोला ढेबुयि भाग भेलाला केलकिन।" 42 येशुयि हतिबाला नाइसोङ, "च्हि ख्युइ जबयाङ पवित्रशास्त्रला माटबाइ? ‘काङ टोउला खिम सोङानतेबे टिम्दे हतिते सुरयि तेम्मा टोउ च्युङसोङ, धि कजसुबाने च्युच्युवा ना, तेहि हुइ मिलाधि हा:लइयाप धु।’"✝21:42भजनसंग्रह ११८:२२-२३ 43 "हतिचाला ङा खेला नाज्याइ, कजसुबायि राज्य खेने ठङान ना, राङ च्हि हति च्वरा मितेबाला तेरङान ना, सुइ हति ढेबु छ्यातु झ्युकिन। 44 हति टोउयि थोला ङिलङानते तुबु-तुबु होङान ना, हिन्नाङ सुइ थोला हति टोउ ङिलकिन, हति हतिला तारे फेरु सोङान ना।" 45 जब घोबा पुजारितेबा राङ फरिसितेबे ख्युइ प्ये ङ्यानसोङ, तेहि हतिबे भारेला राङ ख्युइ नानाइबा ना नाइरे हा:कोरसोङ। 46 हतिबे खोला सुङ च्युइ क्याइसोङ, हिन्नाङ हतिबा मि झोमला झिरे, चिचालानाना मितेबे खोला ङोन्सेखिलङान हिना नाइरे सामकिनलो।