1 हति च्येला येशु मोनलाम क्यासि खिमने थोन्दे ढुइतुइना ख्युइ लोब्टुतेबा खोला मोनलाम क्यासि खिमयि भवनतेबा तोनयाप नाइरे ख्युइ धुनला लेप्तेसोङ। 2 हिन्नाङ ख्युइ हतिबाला नाइसोङ, "खि धि पोरो थोङिनदु, मानाइ च्हि? तेम्बारे, ङा खेला नाज्याइ, टोउ झि कि थोला टोउ झि मितोता, पोरो तिप्ते ढिमङान ना।" 3 येशु जैतुन रिला तोतितुइना लोब्टुबा खो चिक्पा होएताला ख्युइ तेहा लेप्ते टिरेलो, "ङेला नोइ, धि तामबा जब हुन, राङ ख्युइ क्य राङ धि काल्बायि सिनि ता:च्हि हुन?" 4 तेहि येशुयि हतिबाला जवाक नाइसोङ, "च्याङबो क्याइरे त्योए, सुइ याङ खेला आच्या माच्याला माभोर। 5 चिचालानाना लेइराङ ङाहि मिनला ‘ख्रिष्ट हिना’ नेनगा होङान ना, राङ लेइराङला आच्या माच्या सोङान ना। 6 खि मा राङ मायि क्येतेबा थोइङान ना। माझि, चिचालानाना धि होङकोइ राङ हुन, हिन्नाङ सिनयाप हतितुइना राङ मिहा। 7 चिचालानाना मितेबे विरोधला मितेबे, राङ राज्ययि विरोधला राज्य लाँङान ना, देशयि विरोधला देश, कुरु कुरुला साला अनिकाल राङ सोङुल होङान ना। 8 हिन्नाङ धि पोरो ता च्यिटा क्येयापयि तुकि सुरु मात्रा ना।" 9 "तेहि हतिबे खेला तुका खुँयापयि चाला स्योएङान ना, राङ खेला सोएङान ना, राङ ङाहि मिनयि चाला पोरो मितेबायि खेला सम अल किङान ना।✝24:9 मत्ति १०:२२ 10 तेहि मि लेइराङ घो ख्यामङान ना, राङ धोका तेरङान ना, राङ चिकि स्यानला विश्वाशघात क्याइरे स्योएङान राङ सम अल किङान ना। 11 लेइराङ चुन ङोन्सेखिलङान लाँङान ना राङ लेइराङला घोख्यामदु झुङान ना। 12 अल मा च्युच्युवाति लेइराङयि करि ङ्युङदु ढोङान ना। 13 हिन्नाङ अखमरि थु त्योएङानते क्योपङान ना।✝24:13 मत्ति १०:२२ 14 तेहि कजसुबायि राज्यि धि लोन ल पोरो संसारला मितेबा पोरोयि साछियि चाला टाइक्ये किङान ना, हति च्येला च्येस्युवा सिनयापते होङान ना।"

15 "हतिचाला जब खि दानिएल ङोन्सेखिलङाने नानाइबि मासि होङयापयि अल क्यु पवित्र साला ल्हाँल्हाँबा थोङान ना।✝24:15 दानिएल ९:२७; ११:३१; १२:११ टङानति हा:कुवा कि, 16 तेहि यहुदियाला होङानतेबा रि यहला टोइरे क्यु। 17 खिमयि खानाला होएतातेबा रेँ खिमला होएता क्यु धोनयापयि चाला हअला मापुप।✝24:17 लुका १७:३१ 18 स्यिङ राङ भारिला होएता तेबा रेँ कोहिला लेन्दु लक्ते मायोङ। 19 हाय! टोपा होएतातेबा राङ होमा लुइङान हति ङिनला चोम झिझिरा हुन। 20 हिन्नाङ कुङघाला या ङालसुइ ङिनला खे टोइरे ढोज्याइ मायोङ नाइरे कजसुबाला मोनलाम क्योप। 21 चिचालानाना हति भेलाला धि च्वरा दसा घर होङान ना, काङते काल्बा छ्याने राङ थाल्ला थु च्युच्युवा मेता, न त याङ जब याङ हुन।✝24:21दानिएल १२:१; प्रकास ७:१४ 22 कजसुबायि हति ङिन ङुयुवा मासोइबाझि नाना सु मि याङ सोन मिङ्युइबा, हिन्नाङ धाधामाबे चाला हति ङिन घटाइ किङान ना। 23 तेहि खेला सुइ याङ हति भेलाला ‘तोइ, ख्रिष्ट ङिहा होतो, कि हतिया होतो’ नाइना हिछे माके। 24 चिचालानाना चुन ख्रिष्टतेबा, चुन ङोन्सेखिलङानतेबा लाँङान ना, राङ च्युङना ता कजसुबायि धाधामाला याङ घोख्यामदु झुयापयि चाला छेया-छेया तातेबा राङ हा:लाइयापयि लाइतेबा तोनङान ना। 25 टामबाला पोर, ङाहि खेला भेला होङयापले ताङलाराङ नाइ छाछारा होए।" 26 "तेम्बारे हतिबे ख्योएला ‘तोइ, खो च्याङ मेते साला धु’ नाइरे नाइना फिला थोन्दे माढो। तेहि ‘तोइ, मो नाङयि कोठाला हिप्ते त्यतु नाइनाङ’ याङ हिछे माके।*24:26 लुका १७:२३-२४ 27 चिचालानाना च्हिरु क्याइरे बिजुलि स्यारने होए भारितुइना नुप थु राङ साल्बो हुन, हति च्वरा क्याइरे मि पिजा याङ क्येरे होङान ना। 28 काँहा स्यिस्यियायि रो हुन, हतिया च्यारक्योए याङ झोम्दे तोकिन।"✝24:28 लुका १७:३७

29 "हति दशा घरयि ङिनयि च्येला, ङिमा मुन्ना होङान ना, राङ धा:यि रेँ होए तेरङान माना ना, राङ कार्मातेबा पान्नाङने ङिलङान ना, अर्थात पान्नाङयि शक्तितेबा घुलङान ना।✝24:29 यशैया १३:१०; ३४:४; इजकिएल ३२:७; योएल २:१०-३१; ३:१५; प्रकास ६:१२-१३ 30 तेहि मि पिजायि हा: लाइयापयि लातेबा पान्नाङला थोङान ना, राङ पिरथिवियि पोरो मितेबा टाङतुङान ना, राङ हति भेलाला हतिबे मियि पिजाला पान्नाङयि मुक्पातेबाला शक्ति राङ छेया छे ङ्याबो होङान थोङान ना।✝24:30 दानिएल ७:१३; जकरिया १२:१०-१४; प्रकास १:७ 31 ख्युइ रेँ तेङलायि लोन खेरङान तेबाला केलिङयि छेया क्ये ङ्याबो चोङान ना, राङ हतिबे पान्नाङयि धुन झिने स्यानयि धुन थु छ्ह सिने ख्युइ धाधामातेबाला झोमधु झुङान ना।"

32 "हिन्नाङ भेलडुयि तोङबोङने छोइ झि खेर: जब हति ढालाबाला ङोलो भुइकिन राङ तोङबोङयि ध परिवर्तन हुन, तेहि याकार लेप्तु नाइरे खि हा:कुन। 33 धि च्वरा क्याइरे खि याङ जब धि ताम पोरो च्युच्युवा थोङिन, तेहि भेला कोयि धुनला धु नाइरे हा:कुवा कि। 34 तेम्बारे, ङा खेला नाज्याइ, कि धि पोरो पुरा होङ-होङ थु धि काल्बा मि तोरे मिढुवा। 35 तेङला राङ पिरथिवि स्यिक्ते ढुन, हिन्नाङ ङाहि वचन नामयाङ स्यिक्ते मिढुवा।"

36 "हिन्नाङ हति ङिन राङ भेलायि भारेला आकि अर्थात स्यान सुलाङ च्याङ छ्या मेता, न त तेङलायि लोन खेरङानतेबा न कजसुबायि पिजाला। 37 मि पिजायि केयाप राङ नोआयि ङिन च्वरा होङान ना।✝24:37 उत्पत्ति ६:५-८ 38 चिचालानाना च्हिरु क्याइरे श्यलले ताङला नोआ डुङगा छोम्मुवायि नाङला स्युभि ङिन थु, मितेबा सेन राङ, थुङिन राङ मिजे किन ताताता हुन, 39 तेहि श्यल लेप्ते हतिबाला पोरोला च्हारे माखेर थु हतिबे हा:माकुवा लो। मियि पिजा केयाप याङ हति च्वरा होङान ना।✝24:39 उत्पत्ति ७:६-२४ 40 हति भेलाला मि ङि भारि राङ श्यिङला लाइ किङान होङान ना, च्यिते खेराङान ना राङ, स्यानते भोरङान ना। 41 पुमो ङि लाकोर कोरिन ताताता होङान ना, च्हि खेराङान ना, स्यानते भोरङान ना।"

42 "हतिचाला लाँरे त्योए, चिचालानाना काङ ङिन खि प्रभु हुन, सो खेला छ्या मेता। 43 हिन्नाङ धि हा:को कि खिमयि ताक्पोयि कुम्मा छाम्मुयि काङ भेलाला हुन हा:कुवा नाना, खो लाँरे राङ त्योएङान ना, राङ रेँ खिम तोल्दु झ्युङान मानाना।✝24:43 लुका १२:३९-४० 44 हतिचाला खे याङ तयार त्योए, चिचालानाना मि पिजा विचार माक्याइबि भेलाला होङान ना।"

45 "हिछेकिङान राङ बुद्धि होएता यक्पुवा सुना, काङला हति ताक्पोयि रेँ प्येरायि यक्पुवाबाला थारे भेलाला ङ्योप्पा पिनोङ नाइरे लाइ कोकोइबा हुनाइ? 46 हति यक्पुवा ल ना, सुला ताक्पो हुइ तुइना हति च्वरा क्याक्याइबा ठेङान ना। 47 तेम्बारे, ङा खेला नाज्याइ, ताक्पोयि हतिला रेँ क्यु पोरोयि थोला जिम्मा क्यायाप धामङान ना। 48 हिन्नाङ तेम्बारे हति अल यक्पुवायि ‘ताक्पो पुला हुन नाइरे’ सम ला टान्ना, 49 राङ ङ्याबो लाइ किङान यक्पुवातेबाला क्याक्तु राङ स्यिस्यिया ङ्याबो सारु राङ थुङाला छेल ना, 50 हति यक्पुवायि ताक्पो हति माकुबि ङिन राङ विचार माक्याइबि ङिन होङान ना। 51 तेहि ताक्पोयि खोला तुबु-तुबु सोङान ना राङ हतिला समनाँतेबे उइला ढिमङान ना राङ, काँहा मितेबा ङुङान ना राङ सो चेङान ना।"