Mateus 25

मिजे माक्याइबा च्युयि प्ये

1 "तेहि तेङलायि राज्य च्यु मिजे माक्याइबा ङ्याबो थु ङ्युइकिन। हतिबे राँ राँसि बत्ति खेरते ख्योबोतेबा ठातु पुतेलो।✝25:1 लुका १२:३५ 2 हतिबे नाङने ङाते रिक्पा मेता राङ ङाते रिक्पा होएता धुलो। 3 चिचालानाना जब रिक्पा मेतातेबे रेँ बत्ति खेरते, हतितुइना हतिबे ङ्याबो मोरकु माखेरालो। 4 हिन्नाङ रिक्पा होएतातेबे रेँ बत्ति ङ्याबो चुटिला मोरकु खेरतेलो। 5 तेहि ख्योबोति हुइतुइना पुला क्याइरे, हतिबा पोरो ङि सिरेलो राङ ङ्यालदेलो।"

6 "हिन्नाङ छान फेला ‘ख्योबो तोइ, खोला ठातु सअ,’ नाङानयि क्ये लेप्सोङ।"

7 "तेहि हति मिजे माक्याइबा पोरो पुमो लाँरेलो, राङ राँ राँसि बत्ति तयार सोइसोङ। 8 रिक्पा मेते मिजे माक्याइबि पुमोतेबे रिक्पा होएतातेबाला नाइसोङ, ‘खि मोरकुयि नाङने ङेला टिझि नाङ, चिचालानाना ङि बत्तिनि सिहाला छेलसोङ।’" 9 "हिन्नाङ रिक्पा होएतातेबे जु नेनगा जवाक पिनसोङ, ‘ङे राङ खे ङिकारला छाङयापयि होचोम मोरकु मेरो, बरु पसला तिया पुते राङ रेँ चाला ङ्योइ।’" 10 "हतिबा ङ्योरु ढुइतुइना ख्योबो लेप छारसोङ, राङ तयार होङानतेबा खो ङ्याबो मिजेयि भतयारला नाङला स्युसोङ, तेहि को रुपसोङ।" 11 "तेहि च्येला हति स्यान मिजे माक्याइबा पुमोतेबा हाङ लेप्सोङ राङ झु नाला छेलसोङ, ‘प्रभु-प्रभु, ङि चाला को फे!’"✝25:11 लुका १३:२५ 12 "हिन्नाङ ख्युइ जवाक पिन्दे नाइसोङ, ‘तेम्बारे, ङा ख्योएला नाज्याइ, ङाहि ख्योएला ङोमिस्येबा।’" 13 येशुयि जवाक पिन्सोङ, "हतिचाला लाँरे त्योए, चिचालानाना हति ङिन राङ हति भेला खेला छ्या मेता।"