Mateus 26

येशुला विरोधला छल

1 येशुयि धि ताम पोरो नाइ छारते च्येला खुरि लोब्टुबाला नाइसोङ, 2 "खेला छ्या होतो, तिरिङ यि ङिन ङि च्येला निस्तार कालापसोल हुन, तेहि मि पिजाला क्रुसला धयापयि चाला सुङान ना।"✝26:2 प्रस्थान १२:१-२७ 3 तेहि कैयाफा मिन क्याक्याइबि घोबा पुजारि क्यालखाङला जनतायि केवाकिङान गुरुतेबा झोमसोङ। 4 राङ हतिबे येशुला च्हिरु ल्यायिरे सुङयाप राङ स्योएयापयि च्युइ क्याइसोङ। 5 हिन्नाङ हतिबे नाइसोङ, "कालापसोलयि भेलाला माना।" स्यान अर्थात मितेबे उइला ठुझि होङान ना।

येशुला बेथानियाला घोबोला अत्तर कुकुइबा

6 येशु बेथानियाला सिमोन लाक्पा काकामि नाझा होएता खिमला धु, 7 पुमो झि च्हुटि शिशाला नाङला घोङ छेया अत्तर खेरते ख्युइ तेहा लेप्सोङ, राङ खो सेतुइना मुइ हति ख्युइ घोबोला च्योसोङ।✝26:7लुका ७:३७-३८ 8 धि थोङदे लोब्टुबाला सेताङ लासोङ, राङ हतिबाला नाइसोङ, "च्हि चाला झोम मासि सुन? 9 चिचालानाना धि अत्तर घोङ छेयाला च्हरे हति आलाइ टाङनाबाला तेरयाप हुन।" 10 हिन्नाङ येशुयि धि ताम हा:कोरे हतिबाला नाइसोङ, "खे धि पुमोला चिला तुक्का तेरिन? मुइ ता ङाहि चाला लाइ ल क्याइसोङ। 11 चिचालानाना टाङनाबा खे ङ्याबो बारतै हुन। हिन्नाङ ङा खे ङ्याबो बारतै मिहा।✝26:11 व्यवस्था १५:११ 12 मुइ धि अत्तर ङाहि स्हुला च्योरे कुङयापयि चाला ङाला तयार सोसोइबा ना। 13 तेम्बारे, ङा ख्योएला नाज्याइ, पोरो संसारला काँहा धि लोन ल टाइक्ये हुन, धि पुमोयि च्हि क्याइरे हति टाइक्ये मुइ याकि चाला किङान ना।"

यहुदा येशुला धोका तेरयापयि चाला खाला ङ्यानसोङ

14 तेहि लोब्टु च्युनङियि नाङने च्यि यहुदा इस्करियोत नाङानते घोबा पुजारियि तेहा पुइसोङ, 15 राङ नाइसोङ, "तेम्बारे ङाहि खोला येशुला लाक्पाला स्येना, ङाला च्हि तेच्याइ?" हतिबे खोला ङुलयि सिक्का सुम च्यु पिन्देलो। 16 हति भेलाने यहुदायि खोला सुङयापयि मौका पाताला छेलसोङ।

येशुयि लोब्टुबा ङ्याबो निस्तार कालापसोङ सोइसोङ

17 ता अखमरियि लोटायि कालापसोलयि ताङसह ङिन लोब्टुबे येशुयि तेहा लेप्ते नाइसोङ, "ख्युइ चाला निस्तार कालापसोलयि भतयार सायापयि व्यवास्था ङि तेहा किता?" 18 ख्युइ नाइसोङ, "भजारला मि झिकि तेहा ढो, राङ हतिला नोइ ‘गुरुज्यु नेन दु, ङाहि भेला धुन्ना लेलेबा धु। ङा ङारि लोब्टुबा ङ्याबो ख्युइ खिमला निस्तार कालापसोल मानि किच्याइ।’" 19 तेहि येशुयि आदेश अनुसार लोब्टुबे क्याइसोङ राङ हतिबे निस्तार कालापसोलयि चाला तयार क्याइसोङ।

20 कमु च्युङदे खो च्युनङि गार लोब्टु ङ्याबो ङ्योप्पा सारु तेसोङ। 21 हतिबा सेन तातितुइना ख्युइ नाइसोङ, "तेम्बारे, ङा खेला नाज्याइ, खि नाङने चिकि ङाला टायि सुङदु जुङान ना।" 22 तेहि हतिबा लेइराङ सम अल च्युङदे चिकि च्येला च्हि खोला ढियाला छेलसोङ, "प्रभु, च्हि हति ङा हिनाइ?"

23 तेहि ख्युइ नाइसोङ, "सुइ ङा ङ्याबो तेरमाला लोटा पिपिला होतो, हति राङ ङाला सुङदु झ्युङान ना।✝26:23 भजनसंग्रह ४१:९ 24 मि पिजा ता ख्युइ भारेला पवित्रशास्त्रला टिटिबा च्वरा ढोङान ना। हिन्नाङ धिक्कार हति मिला। सुइ लाम्ला मि पिजा सुङदु झ्युङान ना। हति मिता माकेबा नाना हति मि चाला ल हुन।" 25 तेहि खोला सुङदु झुङान यहुदायि टिसोङ, "गुरुज्यु च्हि हति ङा हिनाइ?" ख्युइ हतिला नाइसोङ, "ख्योए-ख्योए राङ नेन्दु।"

प्रभुयि भोज

26 हतिबा ङ्योप्पा सेन ताताताला येशुयि लोटा झि खेरसोङ राङ च्यिनलाब पिन छारते ख्युइ हति च्यासोङ राङ लोब्टुबाला पिनसोङ राङ नाइसोङ, "खेर, सो, धि ङाहि स्हु ना।" 27 तेहि याङ भोटो याङ खेरते कटिनक्या नाइरे ख्युइ हतिबाला जु नाइरे पिनसोङ, "खे पोरो धि नाङने थुङ। 28 चिचालानाना धि सारबा वाचायि ङाहि ठा ना, काङते लेइराङयि चाला तिक्पा माप कियापयि चाला क्युङान ना।✝26:28 प्रस्थान २४:८; यर्मिया ३१:३१-३४