1 येशुयि धि ताम पोरो नाइ छारते च्येला खुरि लोब्टुबाला नाइसोङ, 2 "खेला छ्या होतो, तिरिङ यि ङिन ङि च्येला निस्तार कालापसोल हुन, तेहि मि पिजाला क्रुसला धयापयि चाला सुङान ना।"✝ 3 तेहि कैयाफा मिन क्याक्याइबि घोबा पुजारि क्यालखाङला जनतायि केवाकिङान गुरुतेबा झोमसोङ। 4 राङ हतिबे येशुला च्हिरु ल्यायिरे सुङयाप राङ स्योएयापयि च्युइ क्याइसोङ। 5 हिन्नाङ हतिबे नाइसोङ, "कालापसोलयि भेलाला माना।" स्यान अर्थात मितेबे उइला ठुझि होङान ना।

6 येशु बेथानियाला सिमोन लाक्पा काकामि नाझा होएता खिमला धु, 7 पुमो झि च्हुटि शिशाला नाङला घोङ छेया अत्तर खेरते ख्युइ तेहा लेप्सोङ, राङ खो सेतुइना मुइ हति ख्युइ घोबोला च्योसोङ।✝ 8 धि थोङदे लोब्टुबाला सेताङ लासोङ, राङ हतिबाला नाइसोङ, "च्हि चाला झोम मासि सुन? 9 चिचालानाना धि अत्तर घोङ छेयाला च्हरे हति आलाइ टाङनाबाला तेरयाप हुन।" 10 हिन्नाङ येशुयि धि ताम हा:कोरे हतिबाला नाइसोङ, "खे धि पुमोला चिला तुक्का तेरिन? मुइ ता ङाहि चाला लाइ ल क्याइसोङ। 11 चिचालानाना टाङनाबा खे ङ्याबो बारतै हुन। हिन्नाङ ङा खे ङ्याबो बारतै मिहा।✝ 12 मुइ धि अत्तर ङाहि स्हुला च्योरे कुङयापयि चाला ङाला तयार सोसोइबा ना। 13 तेम्बारे, ङा ख्योएला नाज्याइ, पोरो संसारला काँहा धि लोन ल टाइक्ये हुन, धि पुमोयि च्हि क्याइरे हति टाइक्ये मुइ याकि चाला किङान ना।"

14 तेहि लोब्टु च्युनङियि नाङने च्यि यहुदा इस्करियोत नाङानते घोबा पुजारियि तेहा पुइसोङ, 15 राङ नाइसोङ, "तेम्बारे ङाहि खोला येशुला लाक्पाला स्येना, ङाला च्हि तेच्याइ?" हतिबे खोला ङुलयि सिक्का सुम च्यु पिन्देलो। 16 हति भेलाने यहुदायि खोला सुङयापयि मौका पाताला छेलसोङ।

17 ता अखमरियि लोटायि कालापसोलयि ताङसह ङिन लोब्टुबे येशुयि तेहा लेप्ते नाइसोङ, "ख्युइ चाला निस्तार कालापसोलयि भतयार सायापयि व्यवास्था ङि तेहा किता?" 18 ख्युइ नाइसोङ, "भजारला मि झिकि तेहा ढो, राङ हतिला नोइ ‘गुरुज्यु नेन दु, ङाहि भेला धुन्ना लेलेबा धु। ङा ङारि लोब्टुबा ङ्याबो ख्युइ खिमला निस्तार कालापसोल मानि किच्याइ।’" 19 तेहि येशुयि आदेश अनुसार लोब्टुबे क्याइसोङ राङ हतिबे निस्तार कालापसोलयि चाला तयार क्याइसोङ।

20 कमु च्युङदे खो च्युनङि गार लोब्टु ङ्याबो ङ्योप्पा सारु तेसोङ। 21 हतिबा सेन तातितुइना ख्युइ नाइसोङ, "तेम्बारे, ङा खेला नाज्याइ, खि नाङने चिकि ङाला टायि सुङदु जुङान ना।" 22 तेहि हतिबा लेइराङ सम अल च्युङदे चिकि च्येला च्हि खोला ढियाला छेलसोङ, "प्रभु, च्हि हति ङा हिनाइ?"

23 तेहि ख्युइ नाइसोङ, "सुइ ङा ङ्याबो तेरमाला लोटा पिपिला होतो, हति राङ ङाला सुङदु झ्युङान ना।✝ 24 मि पिजा ता ख्युइ भारेला पवित्रशास्त्रला टिटिबा च्वरा ढोङान ना। हिन्नाङ धिक्कार हति मिला। सुइ लाम्ला मि पिजा सुङदु झ्युङान ना। हति मिता माकेबा नाना हति मि चाला ल हुन।" 25 तेहि खोला सुङदु झुङान यहुदायि टिसोङ, "गुरुज्यु च्हि हति ङा हिनाइ?" ख्युइ हतिला नाइसोङ, "ख्योए-ख्योए राङ नेन्दु।"

26 हतिबा ङ्योप्पा सेन ताताताला येशुयि लोटा झि खेरसोङ राङ च्यिनलाब पिन छारते ख्युइ हति च्यासोङ राङ लोब्टुबाला पिनसोङ राङ नाइसोङ, "खेर, सो, धि ङाहि स्हु ना।" 27 तेहि याङ भोटो याङ खेरते कटिनक्या नाइरे ख्युइ हतिबाला जु नाइरे पिनसोङ, "खे पोरो धि नाङने थुङ। 28 चिचालानाना धि सारबा वाचायि ङाहि ठा ना, काङते लेइराङयि चाला तिक्पा माप कियापयि चाला क्युङान ना।✝ 29 हिन्नाङ ङा खेला नाज्याइ, कि अंगुरयि धि ढेबुने ङा हति थु मि थुङ जब थु ङारि आकि राज्यला खे ङ्याबो सारबा अंगुरयि खुवा मिथुङ।" 30 भजन झि लाँ छारते च्येला हतिबा जैतुन रिला यहला थोन्दे पुइसोङ।

31 तेहि येशुयि हतिबाला नाइसोङ, "तिरिङ छाम्मु ङा चाला खे च्येला हटिकिङान ना। चिचालानाना पवित्रशास्त्राला धि च्वरा टिधु, ‘कजसुबा आके रच्चियाला क्याङान ना, राङ तुमयि लुबा कार च्युङ च्युङला थोराङान ना।’✝ 32 हिन्नाङ ङा स्यिस्यियाने सोम्बो च्युङदे खेले ताङला गालिल छेत्रला ढोङान ना।"✝ 33 पत्रुसयि खोला जवाक पिनसोङ, "ख्युइ चाला पोरो च्येला हटि क्याइनाङ ङा ख्योएला नामयाङ मितोङ।" 34 येशुयि हतिला नाइसोङ, "तेम्बारे ङा ख्योएला नाज्याइ, तिरिङ छाम्मु च्याबो भोएयापले ताङला ख्युइ ङाला लाम्मा सुम ङोमिस्येबा नाइरे इनकार किङान ना।" 35 पत्रुसयि खोला नाइसोङ, "ङा ख्योए ङ्याबो सिकोइ च्युङ ना याङ ङाहि ख्योएला ङोमिस्येबा नाइरे इनकार मिके।" स्यान लोब्टुतेबे याङ हति च्वरा राङ नाइसोङ।

36 तेहि येशु गेतसमनि नाङान बगैचा साला हतिबा ङ्याबो पुइसोङ, राङ लोब्टुबाला नाइसोङ, "खे हतिया राङ त्योए, ङा टिझि फाला पुते मोनलाम क्याकच्याइ।" 37 राङ ङ्याबो पत्रुस राङ जब्दियायि पिजा ङि पिजातेबाला खेरते खो बैरा राङ छरा किताला छेलसोङ। 38 तेहि ख्युइ हतिबाला नाइसोङ, "ङाहि उ तिङरिङमुवा बैरायि स्यिस्यिया च्वरा च्युङदु। राङ खे ङेहा राङ त्योए, ङा ङ्याबो लाँरे राङ त्योए।" 39 तेहि ख्युइ टिझि धुनला पुते खोलबु क्यापते मोनलाम क्यापसोङ, "हे ङाहि आके, च्युङना, धि भोटो ङाने घ्याबोला खेर। हिन्नाङ ङाहि धोप्पा क्याक्याइबा च्वरा माना, हिन्नाङ ख्युइ धोप्पा क्याक्याइबा च्वरा सअ।" 40 तेहि ख्युइ लोब्टुबे तेहा पुते हतिबा ङ्याङ्याला ठातेलो, राङ पत्रुसला नाइसोङ, "च्हि खे ङा ङ्याबो घण्टा चियाङ त्योए मिङ्युइबाइ? 41 लाँरे त्योए, मोनलाम क्योप, राङ छोए ताताइबाला मायोङ। आत्मा ता तेम्बारे तयार होतोलो, हिन्नाङ स्हु नोप्पुवा धु।"

42 याङ ख्युइ लाम्मा ङिबा पुते मोनलाम क्यापसोङ, "ङाहि आके, ङाहि धि तुरि भोटो मातुभि मिहा नाना ख्युइ धोप्पा पुरा सअ।" 43 खो याङ लेप्ते हतिबा ङ्याङ्याला राङ धुलो, चिचालानाना हतिबे मि राराता राङ धुलो। 44 हतिचाला याङ ख्युइ हतिबा ताङदेलो, राङ पुते याङ हति छि राङ याङ लोलाइ क्याइरे लाम्मा सुबा मोनलाम क्यापसोङ।

45 तेहि खो लोब्टुबे तेहा लेप्ते हतिबाला नाइसोङ, "खे तरह ङ्याङ्याला राङ ङालसुन ताताता हिनाइ? तोइ, भेला धुनला लेप छारतु। मि पिजा तिक्पा किङानयि लाला थेबाला छेल छारतु। 46 लह, ढो। तोइ। ङाला सुङदु झ्युङान धुनला राङ धु।"

47 येशुयि नेन-नेन राङ, च्युनङियि नाङने च्हि, मदलब यहुदा मिन क्याक्याइबि लोब्टु लेप्सोङ। हति ङ्याबो घोबा पुजारि राङ जनतायि केवा किङान गुरु चाँचाँबि च्हि तुम छोम्मुवा झि तोरबालि राङ पेरका ख्योरे लेप्सोङ। 48 खोला सुङदु झुङान मितेबे हतिबाला ता झि पिन्देलो। "काङ मिला ङा पा च्योर च्याङ, हति राङ ना, हति राङला सुङ।"

49 होप:तामेला येशुयि तेहा पुते हति नाइसोङ, "हे गुरु नामास्ते!" राङ हति खोला पा च्यारसोङ।

50 येशुयि हतिला नाइसोङ, "रुवा, ख्योए च्हि कितु लेप्ते, हति कि।" तेहि हतिबा धुन्ना लेप्ते येशुला सुङदे खेरतेलो। 51 येशु ङ्याबो होएता नाङने च्हि कि लाक्पा च्युक्ते रेँ तोरबालि तोन्देलो, राङ घोबा पुजारियि यक्पुवाला क्याप सोङ, राङ हति नामज्यो तुप्सोङ। 52 तेहि येशुयि हतिला नाइसोङ, "ख्युइ तोरबालि धोपस्युप छ्यु। चिचालानाना तोरवालि खेराङान पोरो तोरवालिने राङ मासि हुन। 53 ख्योए च्हि ठानिकिन, च्हि ङा रेँ आकेला स्युवाक्या मिङ्युइबाइ, राङ ख्युइ हतितुइना राङ तेङलायि लोन खेरङान सिपाहिले किना मा ङाहि चाला मिचोवाइ च्हि? 54 हिन्नाङ हति च्युङ छारते धि ताम धि च्वरा क्याइरे होङकोइ हुन नाइरे पवित्रशास्त्रला टिटिबि धि ताम च्हिरु क्याइरे पुरा हुन?" 55 हति भेलाला राङ येशुयि हति मिझोमला नाइसोङ, "डाकुयि विरोध्रला लेलेबा च्वरा ङाला सुङदु तोरबालि राङ पेरका ख्योरे खे चिला लेप्ते? ङा बारतै मोनलाम क्यासि खिमला छोइ तेरिन राङ ताते, राङ खि ङाला मा सुङसोङ।✝ 56 हिन्नाङ ङोन्सेखिलङानयि पवित्रशास्त्रा पुरा होङ नाइरे राङ धि पोरो च्युच्युङाना।" तेहि लोब्टु पोरो खोला पोरते टोइरे पुइसोङ।

57 येशुला सुङानतेबे खोला घोबा पुजारि कैयाफायि तेहा खेरतेलो। हतिया शास्त्रि राङ केवाकिङान गुरुतेबा झोमधुलो। 58 हिन्नाङ पत्रुस घ्याबोने घोबा पुजारियि खिमयि क्य थु ख्युइ च्येच्येला लेप्तेलो, राङ च्येला च्हि हुन, सो तायापयि चाला नाङला स्युरे कोराबातेबा ङ्याबो त्येसोङ। 59 ता घोबा पुजारि राङ पोरो यहुदि नेतातेबा झोझोमि सायि मितेबे येशुला सोएयापयि ङेबा तेरयापला ख्युइ विरोधला चुन साछि फाताला छेलसोङ। 60 लेइराङ चुन साछि तेरङानतेबा लेप्सोङ, हिन्नाङ हतिबाला च्याङ साछि माखुबालो। च्येला मि ङि धुनला लेप्सोङ। 61 राङ नाइसोङ, "धि मियि ‘ङा कजसुबे मोनलाम क्यासि खिम तिप्ते ङिन सुमला याङ लोङ ङ्युइकिन’ नाइसोङ।"✝ 62 तेहि घोबा पुजारि लाँरे खोला नाइसोङ, "च्हि ख्योए च्याङ जवाक मितेराइ? धि मितेबे ख्युइ विरोधला साछि पिपिना चिना?" 63 हिन्नाङ येशु च्यामाना त्येसोङ। घोबा पुजारियि येशुयि नाइसोङ, "सोम्बो कजसुबायि मिनला ना क्यालदे नाज्याइ, ङेला नोइ, च्हि ख्योए कजसुबायि पिजा ख्रिष्ट हिनाइ?" 64 येशुयि हतिला नाइसोङ, "ख्युइ राङ नाइसोङ। हचु हिन्नाङ ङा ख्योएला नाज्याइ, ता याङ ख्युइ मियि पिजाला पोरो हा:छेयायि लाक्पा याइबा यहला ताताता राङ पान्नाङयि मुक्पि थोला लेलेबा थोङान ना।" 65 तेहि घोबा पुजारियि रेँ कोहिला रालदे नाइसोङ, "धि नि कजसुबाला अल नाइसोङ। ता हुला स्यान साछि च्हि कोइबा? थाल्ला ख्युइ धि कजसुबाला अल नानाइबा थोइ छारसोङ।✝ 66 खि च्हि सम होतो?" हतिबे जवाक पिनसोङ, "खो अपराधि ना राङ सोएयापयि ङेबा होङयाप ना।" 67 तेहि हतिबे ख्युइ खाला छिमा तापते खोला भक्सिन क्यापसोङ, राङ रेन रेनयि जु नेन राङ थालच्या क्यापसोङ, ✝ 68 "हे ख्रिष्ट, लौ, ङोन्सेखेन! ख्योएला क्याङान सु ना?"

69 पत्रुस फिला क्यला ताताता धुलो। यक्मुवा झि ख्युइ तेहा लेप्ते नाइसोङ, "ख्योए याङ गालिलला त्योएङान येशु ङ्याबो होतोइ?"

70 हिन्नाङ पत्रुसयि हतिबा पोरोयि धुनला माना नाइरे नाइसोङ, "ख्योए च्हि नेन, ङाहि ङमिस्येबा।" 71 खो फिला क्यला लेप छारते च्येला स्यान झिकि खोला थोङदे राङ हतिया होएतातेबाला नाइसोङ, "धि मि याङ येशु नासरि ङ्याबो धु।" 72 ख्युइ याङ ना क्यालदे माना नाइसोङ, "ङाहि हति मिला ङमिस्येबा।" 73 टिझि च्येला हतिया होएतातेबा धुनला लेप्ते पत्रुसला नाइसोङ, "तेम्बारे, ख्योए याङ हतिबे नाङने चिना, चिचालानाना ख्युइ ताम नाताने राङ हा:कुन्दु।" 74 तेहि पत्रुसयि खुरि खो राङला छार झुकिन राङ कजसुबायि ना क्येलाला छेलसोङ "ङाहि हति मिला ङोसे राङ मिसेबा।" तेहि हतितुइना राङ च्याबो पोइसोङ। 75 तेहि पत्रुसला येशुयि नानाइबि धि ताम याका च्युङसोङ, "च्याबो भोएयापले ताङला ख्युइ ङाला लाम्मा सुम थाबा माना नाङान ना।" तेहि खो फिला पुते मुन छुनछुन लेइराङ ङुइसोङ।