Dna n Kworenti
1 N dəye avnu, Bwulus wa gbmiya n Atens wa lo Kworenti. 2 Dna n abaayi, wa gye Yahudiyi ai yi wo ge Akwuila. Wo ɓə gbmi n Pwontus nu, əsa to ɓəə mwa she wo ɓə gbmiɓe n Itali n əwo nyikwoi Pirisila m, ntuge Kladiyus ɓə la əgbe ga Ayahudiyi vnyanya nge ɓa la kwnu n Roma. Bwulus wa lo ntuge woo gye ɓa, 3 jesnu shikwonyi wo ɓə zhni lubwituyi nu cè ngye ɓa, waa kpedna wa kwnu tnutnuzhni n ɓai. 4 Sibyiwyi dəhodəhoi wa kwnuɓənubwozhni n azai fyi n Ayahudiyibwokwnu woi zhni shi wo ɓa myi, woi wunya n Ayahudiyi aba n Agirikiyi n aɓwatnai.
5 She Sila n Timotii ɓə kwnu n Makidoninya ɓa ɓe da wo, Bwulus waa əwohni ga dna n waazizhni kwohnikwohni, woi gbmiɓo ga Ayahudiyi nge Yeisu nu ɓə zhni Kirisiti. 6 Ama she ɓa ɓə gnyiapaapa n Bwulusii jesnu kwaa si ɓai knyiakpmi, wa kwnu əwo aje ya dna n bwugbawnu jesnu wa gna ɓa, "Əfye ami ɓa kwu kpe n əfye atukwo! Mi zhni tnaɓətui nu ntu əɓəye ɓo. Ənya n kwo laka nsaiye kwoi lo n abyei, mi ɓa lo da Abyedo."
7 Nlonu Bwulus wa gbmi n Ayahudiyibwokwnu, wa lo pwuwa n kwo yatu Titiyus Justus pwuwa nyi, Shekwoyi mwamwagayi. 8 Kirisipwus Ayahudiyibwokwnu tukwoda ɓədo n əwo apwuwadai vnyanya ɓa kwu gaiciyaga n Dagayi; jesnu Akworentiyi bəgye n ɓa ɓə kwu Bwulus waazi wo nyi, ɓa kwu gaiciyaga jesnu a kwu batizima zhni ɓa.
9 Dna n sukwo hó, Dagayi wa daɓo n Bwulusii dna n ɓəwyegye: "To wodna m; gwodu ha daɓo, to la cepyi m. 10 Ntuge mi kwnusnu lo n hoi, jesnu əzaho ta znu ho ənya kwo wa wu ho əɓwa m, ntuge mi n azai fyilo n əzhiyaakwo ye n mwa." 11 Ntulonu Bwulus waa dna n Kworenti əye ɓwugyi n tokwnui woi wu ɓa Shekwoyi ɓədagbma.