Luuka 2

Yeisu gaga dna n Dagayipwuwa

22 She əɓa əbmyikwnu anyazhnazhna kwnunu əsa ɓə la si, ngye shi Mwusa owa ncei da, Yusufu n Mariyamwui, ɓa la wo lo ncei ń Urishelima, ɓa lo ɓəə dna wo ń Dagayi akwnu 23 (ngye shi kwo kafyilo n Dagayi owa, "Əɓyinugbai kpmisnui dəhodəhoi a ɓaa wo knyignyi ga Dagayi"), 24 jesnu a ga nyagbmi, ntuge a nu Dagayi owa n kwa gna: "Alukpe ngwnu-aba kwo alukwukwu ɓyii ngwnu-aba."

25 Nsayii, əzaho ɓə dna ń Urishelima ai yi wo ge Simyiyon, wo ɓə zhni ɓəfyeceyi nu jesnu n wyenyiyi ń Shekwoyi vyi. Wo ɓə gnyi woi pmi atnazhni Israila nya nu, jesnu Zafnu Gyigyiyi ɓə kwnusnu n woi. 26 Zafnu Gyigyiyi ɓəə kwu gna wo nge wo taa fyí, to woi gye Dagayi Kirisiti əwye m. 27 Zafnu wa to wo ədu əɓwa, kwa zhni wo wa lo Dagayipwuwa. She azamayi ɓə loɓe n Yeisui nabai ɓa nu əɓo n owa n cei znutu nyi, 28 Simyiyon wa gwo wo shi ń əwo akwnu, wa ci Shekwoyi woi gna:

29 "Dagayi Duduyi vnyanya,

shi ho ɓə lá ɓəgbeshi shi nyi, nsaiye kwu əho tnutnuyi gnami wa lo n bwugbafui.

30 Ntuge əmi awye ɓa kwu əho gnyignyi gyewye,

31 n ho kwu kwo zhni ń abye vnyanya awye nyi:

32 bwuznagna ntu ɓəwyegye ɓo ga Abyedo jesnu ntu Israila əho aza latu ɓo."

33 Əɓo n a ɓə da tu ń əɓyi yi tukwo nyi; ca wo əɓyi dada n əwo əyai. 34 Nlonu Simyiyon wa tu ɓa anabəlika wa gna Mariyamwu əwo əya: "Əɓyi ye ń wonyi, əwo ɓətukwo ge, wa zhni aza bəgyé ɓa myiya nu; azaho ɓa kwukazhi ń Israila, jesnu wo ɓaa zhni əznù nu, ń a ɓa daɓo tu n əkwo tukwo, 35 nabai ń a ɓa kpmi adu bəgyé ɓənubwozhni ya wu. Jesnu əbeyaakwo ɓa fnyi əhohni wyewyeyi ce."

36 Njesnu sheɓəgwognayi ɓə dna n ɓo ce, Ana Pyenuwel nyigwnu, woi gbmi n Asha əbyé. Wo ɓəə la kwo dəidəi; wo ɓəi gyianyì n əwo əɓai aye tnaaba nu ɓwasnu dna n amwula, 37 jesnu n dəye avnu, waa zhni nyigbayi nya aye shiinyimwanyimwa-ceanyi. Wo to ɓə gbmiya ń Dagayipwuwa m, ama wa ce woi ga Shekwoyi mwamwa ń sukwoi ń nyipyei n əgbewnai ɓədo n aduwazhnii. 38 Wa laka ɓe da ɓa n əsayii, wa sa Shekwoyi ami, jesnu wa daɓo tu ń əɓyi yi tukwo ga aza vnyanya, n ɓa ɓə zhi ń əwyei tu n Urishelima shnashná əɓo nyi.