Akpa Ñwed Samwel 2

Akam Hana

1 Ndin Hana amaabọñ akam anyʌñ abo:

Esịd mmi adaara ke Abọọñ;

nnʌk*2:1 Nnʌk awuọñọ adudu; se ñko ke 1 Sa 2:10 mmi akoñ ke Abọọñ.

Inua mmi abuuro mbuuro akan mme asua mmi,

sia ami mmenem esịd ke adinyaaña mfo.

2 Ibaaha awo ndomokeed se isana nte Abọọñ;

awo mfen ibaaha ke imiibọhọke afo;

itiad ndomokeed ibaaha nte Abasi ñnyịn.

3 Kuukaa iso utañ ikọ ke ntañidem

me ayak inua mfo atañ ikọ usọñanyen-usọñanyen,

sia Abọọñ ado Abasi a-adiọọñọke ñkpọ,

ñko ato ke anye edomo mme adinam ese.

4 "Ebuuñ mme utịgha mme ñkpọsọñ awo,

ado mbon e-eketuakka ukod eteññe edo mbon se inie adudu.

5 Mbon ekediaha eyʌkkọ enọ idem ammọ ke ukpekpe utom ebọ ndidia,

ado mbon e-ekekoppo abiọọñ ikoppo abiọọñ aba.

Anye a-akedooho ada aman nditọ itiaba,

ado anye a-akenieghe uwak nditọ ideen aduọọk idodanyen."

6 "Abọọñ aben ñkpa adi anyʌñ anịm uwem;

anye asuuhọ awo asịn ke udi anyʌñ adịppe awo ke anyọñ.

7 Abọọñ adọñ uweene ye imọ;

anye asuuhọ awo anịm ke isọñ anyʌñ adịppe ke anyọñ.

8 Anye adịppe uweene asio ke ntọñ

anyʌñ adịppe mbon unana asio ke itie ntọñ;

anye anịm ammọ ye nditọ mbọọñ

anyʌñ anam ammọ enie ebekpo ukpono."

"Sia mme itiad idakisọñ ederimbod anie Abọọñ;

do ke anye adot ederimbod."

9 Anye ayaakpeme ñkpad mbon e-enamma akpanikọ ye anye,

ado eyaekʌp inua mbon ibak ke ñkịm-ñkịm itie.

Idooho ke adudu ke awo anie adikan;

10 eyaenuak mbon se ifaaña mfaaña ye Abọọñ

Ñkoñ Ñkan Abasi ayaasiak aduma ato ke anyọñ;

Abọọñ ayaakpe ikpe utịd ederimbod.

"Anye ayaanọ adidem amọ inweek

anyʌñ abenne nnʌk mbon a-anye ayette adan ke anyọñ."