1 Ami ado mbʌk Sem, Ham ye Yafed, nditọ ideen Nua, e-ekenyʌññọ enieñe nditọ ammọ ideen ke ukwọ amaakekweeñe.

2 Nditọ* Yafed ideen:

Koma, Makọk, Madai, Yafan, Tubal, Mesek ye Tiras.

3 Nditọ Koma ideen:

Askenas, Rifad ye Tokama.

4 Nditọ Yafan ideen:

Elisa, Taasis, mbon Kid ye mbon Rodan.* 5 (Aketo ammọ ke mbon unyam udua mmọọñ ekesuana edọñọ abio ammọ ke aduuk ke mme idịd ammọ, afịd ye usem ammọ.)

6 Nditọ Ham ideen:

Kuus, Iyib, Pud ye Kenan.

7 Nditọ Kuus ideen:

Seba, Hafila, Sabta, Raama ye Sabteka.

Nditọ Raama ideen:

Seba ye Dedan.

8 Kuus akedo ete* Nimrọd, a-akedidooho akpọsọñ awo uko ekọñ ke ederimbod. 9 Anye akedo akpọsọñ atautob ke iso Abọọñ; ntak ado anam nọ esibo, "Nte Nimrọd, akpọsọñ atautob ke iso Abọọñ." 10 Mme akpa ntọọñọ itie ubọọñ amọ ekedo Babilọn, Uruk, Akad ye Kalne ke Sina. 11 Anye aketo isọñ ado akaa Asiria, itie a-anye akebọppọ Ninife, Rehobod Ir, Kala 12 ye Resen, a-asịneke ke ufọọd Ninife ye Kala, a-adooho ataa ekamba abio.

13 Iyib akedo ete anọ

mbon Lud, mbon Anam, mbon Lehab, mbon Naftu, 14 mbon Patrus, mbon Kaslu (a-mbon Filistia eketooho ewuọọñọ) ye mbon Kaftọ.

15 Kenan akedo ete

Sidọn a-akedooho akpa ayịn amọ, ye mbon Hed, 16 mbon Yebus, mbon Amọọ, mbon Keekasi, 17 Mbon Hif, mbon Akaid, mbon Sin, 18 mbon Afaad, mbon Sema ye mbon Hamad.

(Akema mbon ubon Kenan emaesuana, 19 ndin adaña Kenan aketọọñọ ke Sidọn a-akaaha Kera tutu akewuọ Kasa, ye ke ubeñ Sọdọm, Komora, Adma ye Seboyịm, aben tutu akewuọ Lasa.)

20 Nditọ ideen Ham ekedo ami ke aduuk ye usem ammọ, ke isọñ ye idịd ammọ.

21 Emaenyʌñ eman nditọ ideen enọ Sem, e-ekamba ayịneka amọ akedooho Yafed. Sem akedo etebom anọ afịd nditọ ideen Ebee.

22 Nditọ ideen Sem:

Elam, Asọọ, Afasad, Lud ye Aram.

23 Nditọ ideen Aram:

Us, Hul, Keta ye Mesek.*

24 Afasad akedo ete anọ Sela,

ndin Sela ado ete anọ Ebee.

25 Nditọ ideen iba ke ekeman enọ Ebee:

Keed akekere Pelek, sia idaha a-anye akemanake ke ekebakka ederimbod; ndin ekesio ayịneka amọ awodeen Yoktan.

26 Yoktan akedo ete anọ

Almodad, Selef, Hasamafed, Yera 27 Hadoram, Usal, Dikla, 28 Obal, Abimel, Seba, 29 Ọfia, Hafila ye Yobab. Afịd ami ekedo nditọ ideen Yoktan.

30 (Efaak a-ammọ ekedʌññọ amaatara atọọñọ ke Mesa akaa Sefa, ke usakkautịn idịd etəkabod.)

31 Mbon ami ekedo nditọ ideen Sem ke aduuk ye usem ammọ, ke idʌñ ye idịd ammọ.

32 Mme aduuk nditọ ideen Nua edo ami, akeene naña ammọ ekemana, ke mme idịd ammọ. Aketo ke ammọ, mme idịd etaara eyọhọ ederimbod ke ukwọ amaakekweeñe.