1 Adam amaanam ima ye anwaan amọ Iif, anye amaanyʌñ ayommo aman Keen. Ndin anye amaabo ate, "Ato ke unwam Abọọñ ami mmeman ayịn awodeen." 2 Akemaana, anye amaaman ayịneka amọ Ebeel.

Ebeel akedo abọọk ufene, Keen akedo atọ inwañ. 3 Akema, Keen amaaben mme mfịd e-eketooho inwañ amọ adi nte uwa adinọ Abọọñ. 4 Ebeel ñko amaanyʌñ aben enọ adi, ikpọ nti akpa mfịd ufene amọ. Abọọñ amaanem esịd ye Ebeel ye uwa amọ, 5 ado Abọọñ ikinemme esịd ye Keen ye uwa amọ. Ke ntak ado, Keen amaanekke ayat esịd, ndin iso amọ amaata efiad.

6 Ndin Abọọñ amaabo Keen, "Nsoo inam nọ afo ayat esịd? Nsoo inam nọ iso mfo ata efiad? 7 Adieke afo anamma se ifọn, nte ami ñkpibọọhọ uwa mfo? Ado adieke afo umuunamma se ifọn, idiọọkñkpọ asʌk akaan ke anyenusʌñ mfo. Anye a-anie udọñ adunie fiin, ado ana afo akara anye."

8 Akema, Keen amaabo ayịneka amọ Ebeel, "Di yak ñnyịn ika inwañ." Ke ini ammọ ebaaha ke inwañ, Keen amaatịppe ikọ ye ayịneka amọ anyʌñ awot anye.

9 Ndin Abọọñ amaabịp Keen ate, "Ebeel ayịneka mfo aba ke mmọọ?"

Anye amaabọọrọ ate, "Ami ndiọọñọke. Ami ndo akpeme ayịneka mmi?"

10 Abọọñ amaabo, "Nsoo ke afo anam? Kpañ utọñ! Iyiib ayịneka mfo a-ato isọñ atua ambịne miin. 11 Idahami afo aba ke idak isuuñọ, enyʌñ ubịne fiin esio ke isọñ a-akekʌppọke inua abọ iyiib ayịneka mfo ato ubọk mfo. 12 Afo umautọ ñkpọ ke isọñ, anye idiinwịmme mfịd unọ fiin aba. Afo adiido ñyooñ i-imiinieghe nduọk adudu ke ederimbod." 13 Keen amaabo Abọọñ, "Ufen mmi akpon akan se ami ñyọ. 14 Mfịn afo amembịne miin asio ke isọñ, ami ndiinyʌñ ndedịbe ke iso mfo; ami ndiinyʌñ ndo ñyooñ ke ederimbod, awo añkịtte miin ayañwot miin." 15 Ado Abọọñ amaabo anye, "Idooho ntoro; awo akeedodo a-awotto Keen ayaabọ usiene ufen amọ akañ itiaba." Akema Abọọñ amaanịm Keen idiọọñọ mbaak awo ndomokeed a-akịtte anye adiwot anye. 16 Ndin Keen amaadakka akpọñ iso Abọọñ akedʌñ ke isọñ mbon Nod*, ke usakkautịn Idịn.

17 Keen amaanam ima ye anwaan amọ, ndin anye amaayommo anyʌñ aman Inọk. Idaha ado Keen akesʌk abọp abio, ndin anye amaaben abio ado akoot adian ayịn amọ Inọk. 18 Emaeman Irad enọ Inọk, Irad ñko akebon Mehuyeel, ndin Mehuyeel akedo ete Metuseel, ndin Metuseel ado ete Lamek.

19 Lamek akedọ ibaan iba, keed akere Ada, anye ako akere Sila. 20 Ada amaaman Yabal; anye akedo ete mbon e-ekedʌññọ ke mme atayad enyʌñ ebọọk ufene. 21 Ayịneka amọ akekere Yubal; anye akedo ete anọ afịd mme abre ndido udʌk ye mme afịt adʌk. 22 Sila amaanyʌñ anie ayịn awodeen, Tubal-Keen, a-akekamake brọns ye ukwak anam nsio-nsio ñkpọ utom. Ayịneka awonwaan Tubal-Keen akedo Naama.

23 Lamek amaabo ibaan amọ,

"Ada ye Sila, ikpañ utọñ.

Ibaan Lamek, ikop ikọ mmi.

Ami mmewot awo ke ntak a-anye akennọọhọ miin unan,

mmewot akparawa ke anye adikinnọ miin unọmọ.

24 Ekpesio Keen usiene akañ itiaba,

ake Lamek adiido akañ ata mme duob mme itiaba."

25 Adam amaamaana anam ima ye anwaan amọ, anye amaaman ayịn awodeen, ndin amaasio anye anyịñ Sed*, ndin anye abo ate, "Abasi annọ miin ayịn mfen ke itie Ebeel, sia Keen amaawot anye." 26 Sed amaanyʌñ anie ayịn awodeen a-anye akekoodo Enos.

Ke ini ado, mme awo emaetọọñọ adikoot* anyịñ Abọọñ.