1 Ke ini ubonawo emaeketọọñọ aditọt ke ibad ke ederimbod, nditọ ibaan emaenyʌñ emana enọ ammọ, 2 nditọ ideen Abasi emaekịt ke nditọ ibaan ubonawo emaeyaiya, ammọ emaenyʌñ edọ awonwaan akeedodo a-ammọ ekemekke. 3 Ndin Abọọñ amaabo, "Sịbidịd mmi idiibaaha ye awo ke nsi-nsi, sia ammọ edo awo, abʌk ye iyiib; mme usen uwem ammọ adiido isua ikie mme edịb."

4 Mbon Nefilim emaeba ke ederimbod ke ini ado, ndin ke ini ado ye ke ini iso nditọ ideen Abasi emaekaa ebịne nditọ ibaan ke ubonawo enyʌñ ekenieñe nditọ eto ammọ. Ammọ ekedo mbon uko, mme awuọetob ideen.

5 Abọọñ amaakịt naña ibak ubonawo akpon ke ederimbod, ndin ke afịd akikere esịd awo ekedoñño ndiọi afịd ini. 6 Abọọñ amaatua ñkpọfiọk abaña adikibot awo ke ederimbod, ndin esịd amọ amaanekke atịmede. 7 Ke ntoro Abọọñ amaabo "Ami ñyaasobo ubonawo a-ami ñkebotto nsio ke iso isọñ, ndian ye mme unam, mme inuen ye mme aduuwem ñkpọ se inyọọn ke isọñ, sia ami mmetua ñkpọfiọk mbaña adibot ammọ." 8 Ado Nua amaakịt mfọn ke iso Abọọñ.

9 Ami ado mbʌk emana ubon Nua.

Nua akedo adinen awo, inieghe ndo ke atu mme awo e-ekebaaha ke ayio amọ. Anye amaanyʌñ asaña mfọn-mfọn ke iso Abasi. 10 Nua akenie nditọ ideen ita: Sem, Ham ye Yafed.

11 Ndin ederimbod amaabiara ke iso Abasi anyʌñ ayọhọ ye afai. 12 Abasi amaakịt naña ederimbod abiara, sia mme awo ke ederimbod emaebiat usʌñ ammọ. 13 Ke ntoro Abasi amaabo Nua, "Ami ñyaanam utịd aba anọ afịd awo, sia ederimbod ayọhọ ye afai ke ntak ammọ. Ami ñyaasobo ammọ ye ederimbod. 14 Ke ntoro dat eto saipres bọp ubom nọ idem mfo. Nam ubeed ke esịd amọ, nyʌñ dat itai deppe esịd ye edem ubom. 15 Naña afo uduubọp ubom ado ami: Anye adiido kubid ikie ita ke unyọọñ, ubom amọ adiido kubid aba mme duob; ñko anye adiikoñ kubid edịb mme duob.* 16 Nam akọm nọ anye, ke idak akọm ado, nam itie keed ana inwañ ke udomo kubid keed* nọ anye akoñño ke isọñ ke afịd ndaha. Sịn usʌñ ke mben ubom ado nyʌñ nam abom ke isọñ, ufọọd ye ke anyọñ. 17 Ami ñyaaben mmọọñ ukwọ ndi isọñ adibiat afịd uwem ke idak mme hefịn, afịd ñkpọ se inie ibifịk uwem ke idem ammọ. Afịd ñkpọ ke ederimbod eyaetak. 18 Ado ami ñyaasọọñọ edioomo mmi ye afo, afo ayaadʌk ubom ado, afo ye nditọ mfo ideen ye anwaan mfo ye ibaan nditọ mfo. 19 Ana afo aben afịd mme aduuwem ñkpọ asịn ke ubom, ayaara ye uman, nọ enịm ammọ uwem ye afo. 20 Iba ke atu afịd aduuk inuen, afịd aduuk unam ye afịd aduuk ñkpọ se inie uwem a-asañake ke isọñ eyaedi ubịne fiin nọ afo anịm ammọ uwem. 21 Ana afo aben afịd ndidia se ido se edia abono se ndufo ye ammọ ediidia."

22 Nua amaanam afịd ñkpọ se Abasi aketemme anye.