1 Akema Abasi amaadiọñ Nua ye nditọ amọ ideen ate, "Inwịm mfịd inyʌñ itọt ke ibad iyọhọ ederimbod. 2 Ndịk ye uteeñe ndufo ayaamʌm afịd mme afai unam ke ederimbod, ye afịd mme inuen ke ikpaanyọñ ye afịd mme ñkpọ se inyọọn ke isọñ, ye afịd mme iyak ke akpainyañ, sia e-eyaak ammọ esịn ke ubọk ndufo. 3 Afịd ñkpọ se idu uwem inyʌñ isaaña ayaado ndidia inọ ndufo. Kpa naña ami ñkinọọ ndufo mme awawa ñkọñ, idahami ami mminọ ndufo afịd ñkpọ.

4 "Ado inaaha ndufo eta unam i-iyiib uwem asʌkkọ asesịne ke idem. 5 Ñko, ami ñyaayem enam ibad ke abaña iyiib uwem ndufo. Ami ñyaayem enam ibad ebaña afịd unam. Ye mme awo keedekeed. Ñko, ñyaayem enam ibad uwem awo mfen ito ndufo.

6 "Awo akeedodo aduọkkọ iyiib awo,

kpa awo adiiduọk iyiib ammọ,

sia ke mbid Abasi

ke Abasi akebot awo.

7 Ama ado ndufo, inwịm mfịd inyʌñ iwak ke ibad; isakka ke ederimbod inyʌñ itọt."

8 Ndin Abasi amaabo Nua ye nditọ amọ ideen e-ekebaaha ye anye ate: 9 "Idahami ami mmesọọñọ edioomo mmi ye ndufo ye nditọ ubon ndufo se idiimana inọ ndufo ke ini iso 10 ye afịd mme aduuwem ñkpọ e-ekebaaha ye ndufo: Mme inuen, mme ufene ye afịd mme unam ikọd, afịd se ikiwuọ ke ubom ye ndufo, afịd mme aduuwem ñkpọ ke ederimbod. 11 Ami mmesọọñọ edioomo mmi ye ndufo: Tutu amama, afịd uwem idiitakka aba ke mmọọñ ukwọ; tutu amama ukwọ idiisoboke ederimbod aba."

12 Abasi amaanyʌñ abo, "Idiọọñọ edioomo a-ami nnamma ke ufọọd mmi ye ndufo ye afịd aduuwem ñkpọ e-ebaaha ye ndufo ado ami, edioomo afịd emana se idiidi: 13 Ami mmenịm akpara mmi ke ntọñanyọñ, ñko anye adiido idiọọñọ edioomo ke ufọọd mmi ye ederimbod. 14 Ini akeedodo a-ami mbenne ntọñanyọñ mfʌk ederimbod ndin akpara awuọ ke ntọñanyọñ, 15 ami ñyaatoiyo edioomo mmi ke ufọọd mmi ye ndufo ye afịd ñkpọ se idu uwem ke utọ ke utọ. Tutu amama mmọọñ idiidooho ukwọ aba isobo afịd ñkpọ se idu uwem. 16 Ini akeedodo a-akpara awuọhọ ke ntọñanyọñ, ami ñyaakịt ñnyʌñ ntoiyo nsi-nsi edioomo ke ufọọd Abasi ye afịd aduuwem ñkpọ ke ederimbod."

17 Ke ntoro, Abasi amaabo Nua "Ami ado idiọọñọ edioomo a-ami nnamma ke ufọọd mmi ye afịd se inie uwem ke ederimbod."

18 Nditọ Nua ideen e-ekewuọhọ ke ubom ekedo Sem, Ham ye Yafed. (Ham akedo ete Kenan.) 19 Mbon ami ekedo nditọ ideen Nua ita, ñko aketo ke ammọ ke afịd awo ekesuana eyọhọ ederimbod. 20 Nua, awo isọñ, amaatọọñọ atọ inwañ fain. 21 Ke anye amaakenwọñ usʌk ukọd amọ, ukọd amaanaam anye ndin anye amaanaa ifed ke esịd atayad amọ. 22 Ham, ete Kenan, amaakịt ifed ete amọ anyʌñ akedọkkọ nditọeka amọ ideen awo iba ako ke esiin. 23 Ado Sem ye Yafed emaeben ewịra edot ke afara ammọ; ndin emaesaña ñkpaedem ekefʌk ifed ete ammọ. Iso ammọ akewọt edem uko mbaak ammọ edikịt ete ammọ ifed. 24 Ke ini Nua akedemmeke ke ukpa mmịn adikịt se akpatre ayịn amọ awodeen akenam anye, 25 anye amaabo,

"Adọdiọọk anọ Kenan!

Anye adiido nsịbñkan ke atu mme ifʌn anọ nditọeka amọ ideen"

26 Anye anyʌñ abo,

Itooro anie Abọọñ, Abasi Sem!

Yak Kenan ado afʌn anọ Sem.

27 Abasi akpekap atat abio Yafed*;

yak Yafed adʌñ ke mme atayad Sem,

ñko yak Kenan ado afʌn anọ Yafed.

28 Ke ukwọ amaakekweeñe Nua amaadu uwem isua ikie ita mme aba mme duob (350). 29 Ke afịd, Nua akedu uwem isua ikie usʌkkeed mme aba mme duob (950), ndin anye akpa.