1 Ke ini ayọhọ-ayọhọ isua iba amaakeboiyo, Fero amaadappa ndab: Anye akeda ke mben Inyañ Nail,

2 ndin ke esịd inyañ ado enañ itiaba emaewuọñọ edọọk edi, efọọn enyʌñ ekpoon, ndin edita ñnyanyaha ke mben inyañ. 3 Ammọ emaekeboiyo, uman enañ itiaba mfen, ediọiyọdiọi idem enyʌñ eba akpọ-akpọ, emaewuọñọ ke Nail edọọk edida ke mben inyañ ekpere mme akpa enañ. 4 Akema mme uman enañ e-ekediọiyọdiọi idem enyʌñ eba akpọ-akpọ emaedita mme umanenañ itiaba ekefọọnọ idem, enyʌñ ekpoon. Akema Fero amaademme ke idab.

5 Anye amaatịmme adaiya idab anyʌñ adappa ndab ayọhọ akañ iba: Iwuod abakpa itiaba, esọọñ idem enyʌñ efọọn, etịppe ewuọñọ ke itak keed. 6 Mbon ado emaekeboiyo, iwuod abakpa itiaba mfen emaetịppe, esaat enyʌñ etie nte ñkpọ a-afịm edem usakkautịn abiada. 7 Mme nsaad iwuod abakpa ami emaekoono mfọọn abakpa itiaba emen. Akema Fero amaademme ke idab; akịt ke akedo ndab.

8 Ke usiere ubakusen esịd amọ amaatịmede, ndin anye amaadọñ ekoot afịd mbiaidiọñ ye mbon aniọñ ke Iyib. Fero amaadọkkọ ammọ mme ndab amọ, ado awo ndomokeed ikikanna ikappa inọ anye.

9 Ndin etubom mme akamaiko amaabo Fero ate, "Mfịn ami entoiyo mme ndudue mmi. 10 Aba ini Fero akeyatta esịd ye nditọufọk amọ, ndin anye amañkọp miin ye etubom mme atem uyo ke ufọk adaiso mbon ukpeme. 11 Ñnyịn keedekeed imaidappa ndab ke akonayio keed, ndin ndab keedekeed akedo anie ukappa ndab anie. 12 Ndin ayịn Hibru keed amaaba do ye ñnyịn, ayịnufọk adaiso mbon ukpeme. Ñnyịn imaidọkkọ anye mme ndab ñnyịn, anye amaanyʌñ idọkkọ ñnyịn se mme ndab akewuọñọ, anọ awo keedekeed se ndab amọ akewuọñọ naña anye akedappa. 13 Ndin mme ñkpọ emaedisu ukem-ukem naña anye akenyʌñ akappa mme ndab ado inọọ ñnyịn: Emaetịmme emben miin enịm ke itie mmi, ndin awo anye ako emaekọọñ ke eto."

14 Akema Fero amaadọñ ekoot Yosef, ndin emaeben anye usọp-usọp eto ke ñkpakọb edi. Ke anye amaakekwaat ñwaebek anyʌñ akpəho afọñ amọ, anye amaadi ke iso Fero.

15 Ndin Fero amaabo Yosef, "Ami mmaadappa ndab, ndin awo ndomokeed ikanna ikappa anye. Ado ami mmekop nte ebo ke afo umaukop ndab amesikan adikappa."

16 Yosef amaabọọrọ Fero ate, "Ami ñkanna adinam ado, ado Abasi ayaanọ Fero ibọọrọ a-anye ayemme."

17 Ndin Fero amaabo Yosef, "Ke ndab mmi ami ñkeda ke mben Inyañ Nail, 18 ndin ke ufọọd inyañ umanenañ itiaba emaewuọñọ edọọk edi, ekpoon enyʌñ efọọn, ammọ emaedita ñnyanyaha ke mben inyañ. 19 Ammọ emaekeboiyo, uman enañ itiaba mfen emaewuọñọ edi, ebañña akpọ-akpọ, udọñọ-udọñọ, enyʌñ esasaat. Akenam ñkịtte utọ ndiọi idem uman enañ ado ke afịd isọñ Iyib. 20 Mbon e-ekedoññoke nsaad-nsaad ye udọñọ-udọñọ emaekoono uman enañ itiaba e-ekekpoonokpoon, e-ekenyʌññọ ewuọñọ edi akpa eta. 21 Akpesʌkado a-ammọ eketañña mme mfọọn idem enañ ami eta, ukpəhọde ikibaaha ke idem ammọ, sia ammọ ekesʌk etie udọñọ-udọñọ naña ekeba akpa." Akema ami mmaademme ke idab.

22 "Ke ndab mmi ami mmaakịt iwuod abakpa itiaba, eyọhọ enyʌñ efọọn, eduyịt ke itak keed. 23 Ammọ emaekeboiyo, iwuod abakpa itiaba mfen emaetịppe, enyʌñ eyeeme, esaat enyʌñ etie nte ñkpọ a-afịm edem usakkautịn abiada. 24 Mme nsaad iwuod abakpa emaekoono mme mfọọn iwuod abakpa itiaba emen. Ami mmaatañ ami nnọ mbiaidiọñ, ado ndomokeed ke atu ammọ ikikanna inam nọ añnwaña miin."

25 Akema Yosef amaabo Fero ate, "Mme ndab Fero ado keed ye ukem-ukem. Abasi a-ayaara anọ Fero se anye ayem adinam. 26 Mfọọn umanenañ itiaba edo isua itiaba, mfọọn iwuod abakpa itiaba edo isua itiaba ñko; anye ado keed ye ukem ndab. 27 Mme akpọ-akpọ, ndiọi umanenañ itiaba e-ekewuọñọke edi akpatre edo isua itiaba, ñko mme iwuod abakpa itiaba i-imiikiwuọñọke ñkpọ, a-afịm edem usakkautịn akebiara edoñño akañ isua itiaba."

28 "Ado kpa se ami ñkedọkkọ Fero: Abasi a-awọt Fero se anye ayem adinam. 29 Ekamba eduek isua itiaba ayaadi ke afịd isọñ Iyib, 30 ado akañ isua itiaba ayaakeene ammọ. Ndin eyaefre afịd eduek se ikiba ke Iyib, akañ ayaanyʌñ akịm isọñ akappa. 31 Awo idiitoiyoke eduek a-akebaaha ke isọñ ado, sia akañ se idiikeene anye ayaasọñ ubọk ataa eti-eti. 32 Ndin ntak ekenọọhọ ndab ami esọk Fero ke usʌñ iba awọt abo ke Abasi amaabiide ayọhọ-ayọhọ, ndin idiikpeeneke Abasi ayaanam.

33 "Ndin idahami yak Fero ayem awo aniọñ ye eti iwuod anyʌñ asịn anye nte aseñkpọ mbaña isọñ Iyib. 34 Yak Fero amek mme adaiwuod ke isọñ Iyib nọ ammọ ebọ ayọhọ mbaak ition eto ñkpọ idọk ke Iyib ke ufañ isua itiaba ake eduek adiiba. 35 Utom ammọ adiido adibọ afịd ndidia ke mme nti isua e-ediighe ke iso, enyʌñ eboon abakpa ke idak adudu Fero, eboon enịm se ediidia ke mme abio. 36 Mme ndidia ami edo se enịm enọ idʌñ, ediinyʌñ idia ke mme isua itiaba a-akañ adiiba ke Iyib, mbaak idʌñ adiwuuro ke ntak akañ."

37 Akikere ami amaafọn ke utọñ Fero ye afịd mme ñkpoon mbon utom amọ. 38 Akema Fero amaabịp ammọ abo, "Nte ñnyịn imiikeme adikịt utọ awo a-abaaha nte ete ami, awo a-sịbidịd Abasi adʌññọ anye ke idem?"

39 Ndin Fero amaabo Yosef, "Sia Abasi amaakeyaara afịd ami unọ fiin, ibaaha awo a-anieghe aniọñ ye eti iwuod nte afo. 40 Afo ayaado andise ñkpọ mbaña ufọk mmi, ndin afịd mbon mmi eyaesuuk iwuod enam se afo atañ. Ami ndiikpon ukan fiin ke ebekpo ikpọọñ."

41 Ndin Fero amaabo Yosef, "Ami mmumek fiin nte aseñkpọ mbaña afịd isọñ Iyib." 42 Ndin Fero amaasio ñkpannuun ke nnuunubọk amọ asịn ke nnuunubọk Yosef. Anye amaanyʌñ asịn anye eti uyaiya afọñ linen anyʌñ akọọñ anye ñkpọ itọñ kold ke itọñ. 43 Fero amaanam Yosef awat ke sariọd nte udiana amọ ke ukara, ndin mme awo emaesio ñkpo ke iso amọ ete, "Inọ usʌñ!" Naña ekesịn anye nte aseñkpọ mbaña afịd isọñ Iyib ado ami.

44 Akema Fero amaabo Yosef, "Ami ndo Fero, ado imiitooho ke uyio mfo awo ndomokeed ididịppeke ubọk me ukod ke afịd Iyib." 45 Ndin Fero amaanọ Yosef anyịñ Safenad-Panie anyʌñ anọ anye Asenad ayịn awonwaan Pọtifera, aku ke Ọn, nte anwaan amọ. Ndin Yosef amaawuọ asaaña ke afịd isọñ Iyib.

46 Yosef akesọñ isua edịb mme duob ke ini anye akedʌkkọ utom Fero, adidem Iyib. Ndin Yosef amaadakka ke iso Fero anyʌñ asaaña ke afịd Iyib. 47 Ke ukpa isua itiaba eduek, isọñ amaanwịm ataa uwak ñkpọ. 48 Yosef amaabọ afịd ndidia se ekenie ke mme isua itiaba e-eduek akebaaha ke Iyib anyʌñ anịm ndidia ke mme abio. Ke abio keedekeed anye amaanịm ndidia ato se eketọ ke ñkanñkʌk inwañ amọ. 49 Yosef amaabon ataa uwak-uwak abakpa, a-atieghe nte ntan ke mben akpainyañ; amaawak eti-eti tutu anye atre adibad sia amaawak akan ibad.

50 Mbemiso mme isua akañ edisịm, nditọ ideen iba emaemana enọ Yosef ato Asenad, ayịn awonwaan Pọtifera, aku ke Ọn. 51 Yosef amaasio akpan amọ anyịñ Manase* anyʌñ abo, "Sia Abasi a-anam ami mfre afịd mfịna mmi ye afịd ufọk ete mmi." 52 Ndin udo amọ anye amaakoot Ifrem* anyʌñ abo, "Ado sia Abasi a-anam ami ñnwịm mfịd ke isọñ ukuud mmi." 53 Akema isua itiaba eduek ke Iyib amaakweeñe, 54 ndin isua itiaba akañ amaatọọñọ, kpa naña Yosef aketañ. Akañ amaaba ke afịd mme idʌñ, ado ke afịd isọñ Iyib ndidia amaaba. 55 Ke ini a-akañ aketọọñọke adituuk afịd awo ke Iyib, mme awo emaetua ebo Fero inọ mmimọ ndidia. Ndin Fero amaabo afịd mbon Iyib, "Ikaa ibịne Yosef inyʌñ inam se anye abo ndufo enam." 56 Ke ini akañ amaakesuana asịm afịd abio, Yosef amaabeere mme ufọk unịm ndidia, anyʌñ anyam abakpa anọ mbon Iyib, sia akañ amaanekke asọñ ubọk ke afịd isọñ Iyib. 57 Ndin afịd ederimbod emaedi Iyib edidep abakpa nto Yosef, sia akañ amaanekke asọñ ubọk ke afịd itie.