1 Ke ini ado, afịd ederimbod ekenie usem keed ye edeme ikọ keed. 2 Nte mme awo ekesuanake ekaiya ukañ usakkautịn, ammọ emaekịt unaisọñ ke Sina enyʌñ edʌñọ do.

3 Ammọ emaebo emọ-emọ, "Idi, yak ñnyịn inam itiad ubọbufọk, inyʌñ ifọp ammọ nọ anekke afọn." Ammọ ekekama mbad ke itie itiad, enyʌñ ekama itai ke itie mbad. 4 Ndin ammọ emaebo, "Idi yak ñnyịn ibọp abio inọ idem ñnyịn, yak anie tọwa a-akesịmme mme hefịn, nọ ñnyịn inịm anyịñ inọ idem ñnyịn; imiidooho ntoro ñnyịn iyaisuana ikanna afịd iso isọñ."

5 Ado Abọọñ amaasọiyọ adi adikịt abio ye tọwa a-mme awo ekebọppọ. 6 Ndin Abọọñ amaabo, "Adieke adooho nte idịd keed a-asemme usem keed ammọ etọọñọ enam ñkpọ ami, ibaaha se ammọ eduak adinam a-adiisọñ ammọ adinam. 7 Idi, yak ñnyịn isọiyọ ika ikitịmede usem ammọ mbaak ammọ edikop usem emọ-emọ."

8 Ke ntoro Abọọñ amaasuan ammọ asio ke ndo adọñ ke afịd iso isọñ, ndin ammọ emaetre adibọp abio ado. 9 Ntak ado anam ekoot anye Babel sia do ke Abọọñ aketịmede usem afịd ederimbod. Tọọñọ ke itie ado ke Abọọñ akesuan ammọ ayọhọ afịd iso isọñ.

10 Ami ado mbʌk emana ubon Sem.

Isua iba ke ukwọ amaakeweeñe, ke ini Sem akesọññọ isua ikie, anye amaabon Afasad. 11 Ndin anye amaakebon Afasad, Sem amaadu uwem isua ikie ition anyʌñ abon nditọ ideen ye nditọ ibaan mfen.

12 Idaha Afasad akedooho isua edịb mme duob mme ition, anye akedo ete anọ Sela. 13 Ndin ke anye amaakebon Sela, Afasad amaadu uwem isua ikie inaañ mme ita (403), anyʌñ anieñe nditọ ideen ye nditọ ibaan mfen.

14 Ke Sela amaakeyọhọ isua edịb mme duob, anye amaado ete anọ Ebee. 15 Ndin anye amaakedo ete inọ Ebee, Sela amaadu uwem isua ikie inaañ mme ita (403), anyʌñ anieñe nditọ ideen ye nditọ ibaan mfen. 16 Ke ini Ebee amaakeyọhọ isua edịb mme duob mme inaañ, anye amaabon Pelek. 17 Ke anye amaakebon Pelek, Ebee amaadu uwem isua ikie inaañ mme edịb mme duob (430), anyʌñ anieñe nditọ ideen ye nditọ ibaan mfen.

18 Ke ini Pelek akeyọhọke isua edịb mme duob, anye amaabon Reu. 19 Ndin ke anye amaakebon Reu, Pelek amaadu uwem isua ikie iba mme usʌkkeed (209), anyʌñ anieñe nditọ ideen ye nditọ ibaan mfen.

20 Ke ini Reu akeyọhọke isua edịb mme duob mme iba, anye amaabon Seruk. 21 Ndin ke anye amaakebon Seruk, Reu amaadu uwem isua ikie iba mme itiaba (207), anyʌñ anieñe nditọ ideen ye nditọ ibaan mfen.

22 Ke ini Seruk amaakeyọhọ isua edịb mme duob, anye amaabon Nahọ. 23 Ndin ke anye amaakebon Nahọ, Seruk amaadu uwem isua ikie iba (200), anyʌñ anieñe nditọ ideen ye nditọ ibaan mfen.

24 Ke ini Nahọ amaakeyọhọ isua edịb mme usʌkkeed, anye amaabon Tera. 25 Ndin ke anye amaakebon Tera, Nahọ amaadu uwem isua ikie mme duob mme usʌkkeed (119), anyʌñ anieñe nditọ ideen ye nditọ ibaan mfen.

26 Ke Tera amaakeyọhọ isua ata mme duob (70), anye amaabon Ebram, Nahọ ye Haran.

27 Ami ado mbʌk ubon emana Tera.

Tera akedo ete Ebram, Nahọ ye Haran. Ndin Haran akedo ete Lọọd. 28 Ke ini ete amọ Tera akesʌkkọ aba ke uwem, Haran amaakpa ke Ọọ mbon Kaldi, ke isọñ emana amọ. 29 Ebram ye Nahọ emaedọ ibaan. Anwaan Ebram akekere Serai, anwaan Nahọ akenyʌñ akere Milka; anye akedo ayịn awonwaan anọ Haran, ete Milka ye Iska. 30 Ado Serai akedo ada, sia anye ikikanna iyommo idịb.

31 Tera amaaben ayịn amọ Ebram, ayeyịn amọ Lọọd ayịn Haran, ye anwaan ayịn amọ Serai, anwaan Ebram. Ndin ammọ emaedaaña ekpọñ Ọọ, abio mbon Kaldi ekaiya Kenan. Ado ke ammọ emaekedisịm abio Haran, ammọ emaedʌñọ do.

32 Tera amaadu uwem isua ikie iba mme ition (205), ndin anye akpa ke Haran.